ಆವೈಚೊ ಸಂಗಾತ್...........

ಆಯಿಲ್ಲೀಯ್ ತುಂ ಗಾಲ್ಫಾಕ್ ದೀಂವ್ಕ್ ಪುತಾಕ್ ಸಂಗಾತ್
ಕಶೆಂ ವರ್ಣುಂ ಮಾಂಯ್...ತೆ ಆಪುರ್ಬಾಯೆಚೆ ದೀಸ್
ಊಂಟಾಕ್ ಮೆಳ್‍ಲ್ಲ್ಯಾ ಉದ್ಕಾಬೊರಿ ಜಾಲಿಯ್ ಮೊಲಾಧೀಕ್
ಮಾಗ್ತಾಂ ದೆವಾ ಪಾವೊಕಾರ್ ಮುಕಾರಿ ಅಸಲೆ ದೀಸ್

ದಾಕ್ಟೊ ಹಾಂವ್ ಅಸ್ತನ, ಪೋಯ್ಸ್ ಪಾವ್ಲೊಂ ಇಸ್ಕಾಲಾಕ್
ಜಿಣಿ ಮೊಜಿ ಸರ್ಲಿ ಪೊಯ್ಶಿಲ್ಯಾ ತ್ಯಾ ಹೊಸ್ಟೆಲಾಂತ್
ಚಿಂತುನ್ ತುಕಾ ರೊಡ್ಲೊಂ, ಪಾಸ್ಳೆಕ್ ತುಜಾ ಆಶೆಲೊಂ
ಈಷ್ಟ್ ಮೆಳ್ಳೆ, ಖೆಳೊನ್ ವಾಡ್ಲೊಂ, ಪೂಣ್ ಮೋಗ್ ತುಜೊ ಮೆಳ್ಳೊನಾ.

ವರ್ಸಾಂ ದವ್ಲಿಂ, ಕಾಲೇಜ್ ಜಾಲಿ, ಡಿಗ್ರಿ ಮೆಳ್ಳಿ
ಕಾಮ್ ಸೊದುನ್ ಪೋಯ್ಸ್ ಪಾವ್ಲೊಂ ಪರ್ಗಾವಾಕ್
ತುಜ್ಯಾ ಮಾಗ್ಣ್ಯಾನ್, ವರ್ತ್ಯಾ ಎಕಾ ಕಾಮಾಕ್ ಲಾಗ್ಲೊಂ
ದುಡು ಕೆಲೊ, ರಾವ್ಳೆರ್ ಬಾಂದ್ಲೆಂ, ಪೂಣ್ ಮೋಗ್ ತುಜೊ ಮೆಳ್ಳೊನಾ.

ಚೆಡ್ವಾಕ್ ಬೆಟ್ಲೊಂ, ಮೊಗಾರ್ ಪೊಡ್ಲೊಂ, ಕಾಜಾರ್ ಜಾಲೊಂ
ಬಾಯ್ಲೆ ಸಂಗತಾ ಕುಟಂಬ್ ಜಾವ್ನ್ ಜಿಯೆಂವ್ಕ್ ಶಿಕ್ಲೊಂ
ಕಾಷ್ಟ್ ಗೆಲೆ, ಸುಖ್ ಮೆಳ್ಳೆಂ, ಜಿವಾನ್ ಸಲೀಸ್ ಜಾಲೆಂ
ಬಾಯ್ಲ್ ಮೆಳ್ಳಿ, ಬುರ್ಗಿಂ ಜಾಲಿಂ, ಪೂಣ್ ಮೋಗ್ ತುಜೊ ಮೆಳ್ಳೊನಾ.