ಜುಜೆಚೊ ರುಪ್ಯಾಚೊ ಗೊಬ್ಳೊ....

ಫಾರಾವ್ಯಾಚ ಕಾಳಾರ್ ಸಂಸಾರಾಂತ್ ಸಾತ್ ವರ್ಸಾಂಚಿ ದುಕಾಳ್ ಪಡ್ಲಿ
ಇಜಿಪ್ತಾಂತ್ ಧಾನಿ ಮೆಳ್ತಾಲಿಂ ದೆಕುನ್ ಲೊಕಾನಿಂ ಇಜಿಪ್ತಾಚಿ ವಾಟ್ ದರ್ಲಿ
ಜಾಕೊಬಾನಿ ಅಪ್ಲ್ಯಾ ಭುರ್ಗ್ಯಾಂಕ್ ಧಾನಿ ಹಾಡುಂಕ್ ಏಜಿಪ್ತಾಕ್ ದಡ್ಲಿ
ಆದಿಂ ಜಾಕೊಬಾಚ ಭುರ್ಗ್ಯಾನಿಂ ವಿಖ್‍ಲ್ಲ್ಯಾ ಭಾವಾಚಿ ಅತಾಂ ಘರ್ಜ್ ಪಡ್ಲಿ

ಅಪ್ಲ್ಯಾ ಭಾವಾಂಕ್ ಪಳೆತಾಚ್ ಜುಜೆಕ್ ತಾಂಚಿ ಒಳಕ್ ಮೆಳ್ಳಿ
ಅಪ್ಣಾಚಿ ಒಳಕ್ ತಾಂಚೆ ಥಾವ್ನ್ ಲಿಪೊನ್ ತಾಣೆ ತಾಂಚಿ ಪರಿಕ್ಶ ಕೆಲಿ
ವರ್ಸಾಂ ಉಪ್ರಾಂತ್ ಅಪ್ಲ್ಯಾ ಭಾವಾಂಕ್ ಪಳೆವ್ನ್ ಜುಜೆನ್ ದುಖಾಂ ಗಾಳಯ್ಲಿಂ
ಭರ್ಪೂರ್ ಧಾನಿಂ ತಾಂಕಂ ದೀವ್ನ್ ಅಪ್ಲೊ ಭಾವ್ ಬೆಜ್ಮಿಕ್ ಹಾಡುಂಕ್ ತಾಕಿದ್ ದಿಲಿ

ದುಸ್ರೆ ಪಾವ್ಟಿಂ ಜುಜೆಚೆ ಭಾವ್ ದುಡು ಆನಿ ಕಾಣಿಕ್ ಘೆವ್ನ್ ಏಜಿಪ್ತಾಕ್ ಪಾವ್ಲೆ
ಜುಜೆಕ್ ಬೆಟ್ತಾತ್ ತಾಚ ಪಾಯಾಂಕ್ ನಮಸ್ಕಾರ್ ಕಾರ್ನ್ ಮಾನ್ ಕೆಲೆಂ
ಜುಜೆನ್ ದೆಕ್ಲೆಲ್ಯಾ ಸಪ್ಣಾಚೊ ಆರ್ಥ್ ಅತಾಂ ಪರಿಪೂರ್ಣ್ ಜಾಲೆಂ
ಜುಜೆನ್ ವಳಾಕ್ ದಾಕಯ್ನಾಸ್ತಾಂ ಅಪ್ಲ್ಯಾ ಭಾವಾಂಕ್ ಜೆವಾಣ್ ಕೆಲೆಂ

ಅಪ್ಲ್ಯಾ ಭವಾ ಬೆಜ್ಮಿಕ್ ಅಪ್ಣಾಂವ್ಕ್ ಜುಜೆನ್ ಏಕ್ ಗುಟ್ಮಾಳ್ ಕೆಲೊ
ಧಾನಿ ಭರ್ಲೆಲ್ಯಾ ಭವಾಚ ಗೊಣ್ಯೆಂತ್ ಅಪ್ಲೊ ರುಪ್ಯಾಚೊ ಗೊಬ್ಳೊ ಗಾಲೊ
ಭಾವ್ ಶಹರತಾವ್ನ್ ಬಾಯ್ರ್ ಪಾವುಲ್ಲೆಂಚ್ ತಾಣೆಂ ತಾಂಕ ಧರಯ್ಲೊ
ಅಪ್ಣಾಚೊ ಗೊಬ್ಳೊ ಸೊರುಲ್ಲ್ಯಾಕ್ ಬಂದೆಂತ್ ಘಾಲುಂಕ್ ಬೆಷ್ಟಾಯ್ಲೊ

ಬೆಜ್ಮಿಚ ಚಿಲಾಂತ್ ಜುಜೆಕ್ ಅಪ್ಲೊ ರುಪ್ಯಾಚೊ ಗೊಬ್ಳೊ ಮೆಳ್ಳೊ
ಶಿಕ್ಶಾ ಜಾವ್ಮ್ ಜುಜೆನ್ ಬೆಜ್ಮಿಕ್ ಬಂದೆಂತ್ ಘಲುಂಕ್ ಪರ್ಮಾಣ್ ಕೆಲೊ
ಜುಜೆಚ ಭಾವಾನಿಂ ತಾಶೆಂ ಕಾರಿನಾಯ್ ಮ್ಹಣ್ ಪರತುನ್ ಮಾಗ್ಲೊ
ಭಾವಾಂಚ ಮೊಗಾನ್ ಜುಜೆನ್ ಅಪ್ಲೊ ಪರಿಚಯ್ ಸಂಗ್ಲೊ

ಅಪ್ಲ್ಯಾ ಭಾವಾನಿಂ ಜುಜೆಕ್ ವಿಕ್‍ಲ್ಲ್ಯಾಕ್ ತೊ ಜೆಜಾರ್ ಪಾವ್ಲೊ ನಾಂ
ದೇವಾಚಿ ಇಚ್ಚಾ ತಶಿ ಅಸ್‍ಲ್ಲಿ ದೆಕುನ್ ತಾಣೆ ತಾಂಕ ಪಯ್ಸ್ ಕೆಲೊ ನಾಂ
ಅಪ್ಲ್ಯಾ ಘರಣ್ಯಾಕ್ ಆನಿ ಬಾಪಯ್ಕ್ ನಾಸ್ ಜಾಂವ್ಕ್ ತಾಣೆಂ ಸೊಡ್ಲೆಂ ನಾಂ
ದೇವ್ ಜುಜೆ ಸವೆಂ ಅಸುಲ್ಲೊ ದೆಕುನ್ ಕಿತೆಂಚ್ ತಾಕ ಉಣೆ ಜಾಲೆ ನಾಂ

ರೈತಚೊ ವಾವ್ರ್.....

ಸುಗ್ಗಿ ಅಯ್ಲ್ಯಾ ಭಾವಾ ಅಮಿಂ ಖುಶೆನ್ ನಾಚುಯಾಂ
ರೈತ್ ಭಾವಾಚ ವಾವ್ರಾಕ್ ಅಮಿಂ ಸಲಾಂ ಕರುಂಯಾಂ
ಭುಂಯ್ ಖೊಸುನ್, ಸಾರೆಂ ಭೊರ್ಸುನ್ ಕರ್ತಾ ತಾಚೆಂ ಕಾಮ್
ಭಿಂ ವೊಂಪುನ್, ಫಳ್ ಕಾಡುಂಕ್ ವಾರಯ್ತಾ ತಾಚೊ ಘಾಮ್

ಫಾಂತ್ಯಾ ಪಾರಾರ್ ಸುರುಜಾತ ರೈತಾಕ್ ಅಪ್ಲೊ ದೀಸ್
ಖೊಸುಂಕ್ ತಾಣೆಂ ಗಾದ್ಯಾಕ್ ದೆಂವ್ಲ್ಯಾರ್ ರೆಡೆ ದಿತಾತ್ ಸಾಂಗಾತ್
ಕಾಮ್ ತಾಚೆಂ ಸುಲಭ್ ಜಾಯ್ತ್ ಅಸ್ಲ್ಯಾರ್ ಉದ್ಕಾಚಿ ಸುವಾತ್
ಸುಖ್ಯಾ ಭುಂಯ್ಕ್ ಖೊಸುನ್ ಖೊಸುನ್ ಹೊಗ್ಡಾಯ್ತಾ ಅಪ್ಲಿ ಸಕಾತ್

ವಾರೆಂ ವಾದಾಳ್ ಲೆಖಿನಾಸ್ತಾಂ ಕಾಮ್ ತೊ ತಾಚೆಂ ಕರ್ತಾ
ಪಾವ್ಸಿಲೆ ದೀಸ್ ಸುರು ಜಾತಾಂ ಗಾದ್ಯಾಂತ್ ಭಿಂ ತೊ ವೊಂಪ್ತಾ
ಗರ್ಜೆ ತೆಕಿತ್ ಪಾವ್ಸ್ ಅಯ್ಲಾರ್ ಅಂಬೊರ್ ಹಾಸೊ ತೊ ಹಾಸ್ತಾ
ಪಾವ್ಸ್-ವೊತಾನ್ ಸಾಂಗಾತ್ ದೀನಾತ್ಲ್ಯಾರ್ ಕಾಳ್ಜಾ ಭಿತರ್ ತೊ ರಡ್ತಾ

ವಾಡೊನ್ ರಾವ್‍ಲ್ಲೆಂ ಬೆಳೆಂ ಸಾಂಬಾಳುಂಕ್ ರಾತಿಚಿ ನೀದ್ ತೊ ಖಳ್ತಾ
ಮನ್ಜಾತ್-ಸುಕ್ಣ್ಯಾಂಕ್ ಪಯ್ಸ್ ದವರುಂಕ್ ಹರ್ ಪ್ರಯತ್ನ್ ತೊ ಕರ್ತಾ
ಪೋಸ್ ತಾಚೊ ಕರ್ಚ್ಯಾ ಖಾತಿರ್ ಕುಟ್ಮಾ ಥಾವ್ನ್ ತೊ ಪಯ್ಸ್ ಉರ್ತಾ
ತಾಚ ವಾವ್ರಾಕ್ ಫಳ್ ಜಾವ್ನ್ ಕುಟಾಂಬ್ ತಾಚೆಂ ವಾಡ್ತಾ

ಕಾಸ್ಟ್ ಕಾಡ್ನ್ ಶೆತಾಂತ್ ತೊ ಘೊಳ್ತಾ ದೀಸ್ ಆನಿ ರಾತ್
ತಾಚ ಘಮಾಕ್ ಫಳ್ ಜಾವ್ನ್ ವಾಡ್ತಾ ಅಮ್ಚೊ ದೇಶ್
ಬೆಳ್ಯಾಕ್ ಪಾವೊತೆಂ ಮೋಲ್ ನಾಂ ಮ್ಹಣ್ ರಾಗಾರ್ ತೊ ರಾವಾತ್
ಚಿಂತುಂಕ್ ಸಕ್ಚೆ ನಾಂವ್ ಮ್ಹಜಿ ಆನಿ ತುಜಿ ಗತ್

ಫಾರಾವ್ಯಾಚೆಂ ಸಪಣ್....ಜುಜೆಚಿ ಜಾಣ್ವಾಯ್.

ಫಾರಾವ್ಯಾಕ್ ಏಕ್ ಸಪಣ್ ಪಡ್ಲೆಂ ತ್ಯಾ ಸಪ್ಣಾನ್ ತಾಕ ಕಷ್ಟಾಂತ್ ಗಾಲೆಂ
ನೀಲ್ ನ್ಹಂಯ್ ಥಾವ್ನ್ ಸಾತ್ ಪುಡ್ಪುಡೀತ್ ಗಾಯೊ ವಾಯ್ರ್ ಯೇವ್ನ್ ಚರುಂಕ್ ಲಾಗ್ಲ್ಯೊ
ತಶೆಂಚ್ ಸಾತ್ ಭಾಗೆಟ್ಯೊ ಗಾಯೊಯಿ ವಾಯ್ರ್ ಅಯ್ಲ್ಯೊ ಅನಿ ಚರುಂಕ್ ಲಾಗ್ಲ್ಯೊ
ಭಾಗೆಟ್ಯಾ ಗಾಯಾನಿಂ ಪುಷ್ಟ್ ಗಾಯಾಂಕ್ ಗ್ರಾಶಿಲ್ಯೊ, ಫಾರೊಹ ಜಾಗೆ ಜಾಲೊ.

ಫಾರಾವ್ಯಾಕ್ ಪರ್ತುನ್ ನೀದ್ ಪಡ್ಲಿ ಆನಿ ಅನ್ಯೆಕ್ ಸಪಣ್ ಪಾಡ್ಲೆಂ
ಏಕಾಚ್ ದೆಂಟಾರ್ ಸಾತ್ ಅಖಂಡ್ ಆನಿ ಪಿಕ್ಯೊ ಕಣ್ಶ್ಯೊ ವಾಡ್ಲ್ಯೊ
ತಶೆಂಚ್ ಅನ್ಯೆಕ್ ದೆಂಟಾರ್ ಸಾತ್ ಸುಕೊನ್ ಗೆಲ್ಲ್ಯೊ ಕಣ್ಶ್ಯೊ ವಾಡ್ಲ್ಯೊ
ಪೊಲ್ ಕಣ್ಶ್ಯಾಂನಿ ಅಖಂಡ್ ಕಣ್ಶ್ಯಾಂಕ್ ಗಿಳುನ್ ಸೊಡ್ಲೆಂ, ಪಾರೊಹ ಜಾಗೆ ಜಾಲೊ

ಅಪ್ಲೆಂ ಸಫಣ್ ಚಿಂತುನ್ ರಾಯ್ ಮೊಸ್ತು ಖಂತಿಷ್ಟ್ ಜಾಲೊ
ತಾಚೊ ಆರ್ಥ್ ಸೊಡೊಂವ್ಕ್ ಅಪ್ಲ್ಯಾ ಜ್ಯೊತಿಶ್ಯಾಂಕ್ ಉಲೊ ದಿಲೊ
ರಾಯಾಕ್ ಆರ್ಥ್ ಕಳ್ಳೆಂ ನಾಂ, ಮತಿಕ್ ಸಮಾಧಾನ್ ಮೆಳ್ಳೆಂ ನಾಂ
ಜುಜೆವಿಶಿಂ ರಾಯ್ ಜಾಣಾ ಜಾಲೊ, ಯೇವ್ನ್ ಮೆಳುಂಕ್ ಪರ್ಮಾಣ್ ಕೆಲೊ

ಜುಜೆ ಬಂದೆತಾವ್ನ್ ಬಾಯ್ರ್ ಅಯ್ಲೊ ಆನಿ ಫಾರಾವ್ಯಾಕ್ ಮೆಳೊಂಕ್ ಗೆಲೊ
ದೆವಾಚೆಂ ನಾಂವ್ ಮುಕಾರ್ ಗಾಲ್ನ್ ಸಪ್ಣಾಚೊ ಆರ್ಥ್ ತಾಣೆಂ ಸೊಡಯ್ಲೊ
ಏಜಿಪ್ತಾಂತ್ ಸಮ್ರದ್ದೆಚಿಂ ಸಾತ್ ವರ್ಸಾಂ ರಾಜ್ ಕರ್ತೆಲಿಂ
ಉಪ್ರಾಂತ್ಲ್ಯಾ ಸಾತ್ ವರ್ಸಾನಿಂ ಖಠೀಣ್ ದುಕೊಳ್ ಪಡುನ್ ನಾಸ್ ಜಾತೆಲಿಂ

ಫಾರಾವೊ ಜುಜೆಚ ಜಾಣ್ವಾಯೆಕ್ ಮೆಚ್ವಾಲೊ ತಾಕ ತಾಣೆಂ ಕರ್ಬಾರಿ ನೆಮ್ಲೊ
ಸಮ್ರದ್ದೆಚ ಸಾತ್ ವರ್ಸಾನಿಂ ಜುಜೆನ್ ಖಾಣಾವಾವ್ರ್ ಯೆಕ್ಟಾಂಯ್ ಕೆಲೊ
ಜುಜೆಚ ಜಾಣ್ವಾಯೆವರ್ವಿಂ ಏಜಿಪ್ತಾಚೊ ಲೋಕ್ ಶಾಭಿತ್ ಉರ್ಲೊ
ಫಾರಾವ್ಯಾನ್ ಅಪ್ಲಿ ಮುದಿ ಜುಜೆಚ ಬೊಟಾಕ್ ಘಾಲ್ನ್ ತಾಕ ಅಧಿಕಾರಿ ಕೆಲೊ

ಸಗ್ಳ್ಯಾ ಸಂಸಾರಾರ್ ದುಕಳಾಚಿ ಕಠಿಣಾಯ್ ಚಡತ್ ಗೆಲಿ
ಏಜಿಪ್ತಾಂತ್ ಖಾಣ್ ಉಣೆ ಜಾಲ್ಲೆಂಚ್ ಲೊಕಾನಿಂ ಫಾರಾವ್ಯಾಕ್ ಬೊಬ್ ಮಾರ್ಲಿ
ಫಾರಾವ್ಯಾನ್ ಸಗ್ಳ್ಯಾ ಲೊಕಾಂಕ್ ಜುಜೆಕ್ ಮೆಳುಂಕ್ ಆಜ್ನಾ ದಿಲಿ
ಇಜಿಪ್ತ್ ಗಾರ್ ನೈಂ ಅಸ್ತಂ ಸಗ್ಳ್ಯಾ ಸಂಸಾರಾಚ ಲೊಕಾಂನಿ ಧಾನಿ ಮೊಲಾಕ್ ಗೆತ್ಲಿಂ

ಹೆಂ ಮಜೆಂ ಮಾಗ್ಣೆಂ....

ನಿತಳ್ ಕಾಳಿಜ್ ದೀ ತುಂ ಮಾಕಾ
ಕರ್ಚಾಕ್ ಮೊಗ್ ಸರ್ವಾಂಸೊ
ಮೇಟಾಂ ತುಜಿಂ ದಾಕಯ್ ಮಕಾ
ಚಲ್ಚಾಕ್ ವಾಟ್ ಸತಾಚಿ

ಉತ್ರಾಂತ್ ತುಜಾ ಉಲಯ್ ಮಕಾ
ವ್ಹಡ್ವಿಕ್ ತುಜಿ ಗಜೊಂವ್ಚಾಕ್
ಜಾಣ್ವಾಯೆನ್ ಭೊರ್ ತುಂ ಮಾಕಾ
ಕ್ರತ್ಯಾಂ ತುಜಿಂ ಸಮ್ಜೊಂಚಾಕ್

ಭೆಸಾಂವ್ ತುಜೆಂ ಘಲ್ ತುಂ ಮೊಜೆರ್
ಸರ್ಗಾ ರಾಜ್ ಆಪ್ಣಾವ್ಚಾಕ್
ಖರಿ ದೀಶ್ಟ್ ದೀ ತುಂ ಮಾಕಾ
ಪಾತ್ಕಾ ಕಾಳ್ಕಾಕ್ ಪಾಟ್ ಕರ್ಚಾಕ್

ಉದಾರ್ ಹಾತ್ ದೀ ತುಂ ಮಾಕಾ
ದುಬ್ಳ್ಯಾ ದಾಕ್ಟ್ಯಾಂಕ್ ಪಾಂವ್ಚಾಕ್
ಗೊಪಾಂತ್ ತುಜಾ ಲಿಪಯ್ ಮಾಕಾ
ವೆಗ್ಳೊ ಹಾಂವ್ ಜಾಯ್ನಾ ಜಾಂವ್ಕ್

ಜುಜೆ ಬಂದಿವಾನ್ ಜಾತಾ...

ಪೊತಿಫಾರಚ ಘರ ಜುಜೆ ಖಾಲ್ತೊ ಸೆವಾಕ್ ಜಾವ್ನಾಸ್ಲೊ
ಧನಿಯಾಚ ಹರ್ಯೆಕ್ ಕಾಮಾಂತ್ ವರ್ತಿ ಉರ್ಬಾ ದಾಕಯ್ತಾಲೊ
ಜುಜೆಕ್ ಲಾಗುನ್ ದೆವಾನ್ ಏಜಿಪ್ತ್ ಗಾರಂಚೆರ್ ಆಶಿರ್ವಾದ್ ಗಾಲೊ
ಪೊತಿಫಾರನ್ ಜುಜೆಕ್ ಅಪ್ಲೊ ಸ್ವಂತ್ ಕಾರ್ಬಾರಿ ಜಾವ್ನ್ ನೆಮ್ಲೊ

ಜುಜೆ ಕುಡಿನ್ ಘಟ್ ಮುಟ್ ಅಸೊನ್ ಸೊಭಿತ್ ದಿಸ್ತಾಲೊ
ಆಕರ್ಷಕ್ ಜುಜೆಚೇರ್ ಧನಿಯಾಚ ಬಾಯ್ಲೆಚೊ ದೊಳೊ ಅಸ್ಲೊ
ಅಪ್ಲೊ ಪತಿ ನಾತ್‍ಲ್ಲ್ಯಾ ತವಳ್ ತಿಣೆ ಜುಜೆಕ್ ನಾಡಯ್ಲೊ
ಅಪ್ಣಾ ಸಂಗಿ ನಿದೊನ್ ಸುಖ್ ಬೊಗುಂಕ್ ಜುಜೆಕ್ ಸಾಳಾಯ್ಲೊ

ಏಕ್ ದೀಸ್ ಜುಜೆ ಅಪ್ಲ್ಯಾ ಕಾಮಾಂತ್ ಮಾಗ್ನ್ ಅಸ್ಲೊ
ಪೊತಿಫಾರಚ ಬಾಯ್ಲೆನ್ ತಾಕ ಅಪ್ಣಾಂವ್ಕ್ ಬಲತ್ಕಾರ್ ಕೆಲೊ
ಜುಜೆನ್ ನಾಕರ್ತಾಚ್ ತಿಣೆ ತಾಚೊ ದಗ್ಲೊ ವೊಡ್ನ್ ದರ್ಲೊ
ಅಪ್ಲೊ ದಗ್ಲೊ ತಿಚ ಹಾಂತಿ ಸೊಡ್ನ್ ಜುಜೆ ಬಾಯ್ರ್ ದಾಂವ್ಲೊ

ಖೊಟ್ಯಾ ಚಾಲಿಚ ಸ್ರೀಯೆನ್ ಜುಜೆಕ್ ಪಾಸೊಂವ್ಕ್ ಚಿಂತ್ಲೆಂ
ಅಪ್ಲೆಂ ಪಾತಕ್ ದಾಂಪುಂಕ್ ಜುಜೆಕ್ ಅತ್ಯಾಚಾರಿಚೆಂ ನಾಂವ್ ದಿಲೆಂ
ಅಪ್ಲೊ ಪತಿ ಘರ ಯೆತಾಚ್ ಪೊಟ್ ಸಾಂಗೊನ್ ತಾಕ ಫಟಯ್ಲೆಂ
ಪೊತಿಫಾರನ್ ಅಪ್ಲ್ಯಾ ಭಾಯ್ಲೆ ಖಾತಿರ್ ಜುಜೆಕ್ ಬಂದೆಂತ್ ಘಾಲೆಂ

ಜುಜೆ ಬಂದೆಂತ್ ಅಸ್ತಾಂ ಸಕ್ಡಾಂಕ್ ಮೊಗಾಚೊ ಜಾಲೊ
ಬಂದಿಪಾಲಕಾನ್ ತಾಕ ಸಕ್ಡಾಂಚೊ ಮುಖೆಲಿ ಕೆಲೊ
ತೇಚ್ ಬಂದೆಂತ್ ಅಸ್ಚಾ ಫಾರೊಹಚ ಸೆವಕಾಂಚೊ ಇಷ್ಟ್ ತೊ ಜಾಲೊ
ಪಿವನ್ ಪರಿಚಾರಕ್ ಅನಿ ಉಂಡ್ಯಾಗಾರಚ ಸೊಪ್ಣಾಚೊ ಅರ್ಥ್ ತಿಳ್ಸಿಲೊ

ಜುಜೆನ್ ತಿಳ್ಸಿಲ್ಲ್ಯಾ ಬರಿ ಪೀವನ್ ಪರಿಚಾರಕಾಕ್ ಸುಟ್ಕಾ ಮೆಳ್ಳಿ
ಪಾರೊಹಚ ಉಂಡ್ಯಾಗಾರಕ್ ತೀನ್ ದಿಸಾ ಉಪ್ರಾಂತ್ ಪಾಶಿ ಜಾಲಿ
ಸಂಗಾತಿ ಬಂದಿವಾನನಿಂ ಜುಜೆಚ ಜಾಣ್ವಾಯೆಕ್ ದಾಗ್ ದಿಲಿ
ಬಂದೆಂತ್ ಅಸೊನ್ ಜುಜೆನ್ ದೆವಾಚಿ ಖುಶಿ ಕೆಲಿ.

ವಿಲ್ಪಿಯಾಬ್....ಶತಮಾನಚೊ ವ್ಯಕ್ತಿ.

ಹ್ಯಾ ಶೆಕ್ಡಾಚೊ ಕೊಂಕ್ಣಿ ಭಾಷೆಚೊ ಕಲಾಕಾರ್ ತುಂ
ಕೊಂಕಣ್ ಮಾಯೆಚಿ ಕೀರ್ತ್ ಗಾಜಯಿಲ್ಲೊ ವೀರ್ ತುಂ
ಕ್ರೀಸ್ತಾವಾಂಚ ಹಕ್ಕಾಂಕ್ ಝುಜೊನ್ ದಾಕಯಿಲ್ಲೊ ತುಂ
ಕೊಂಕಣ್ ಸಂಗೀತಾಕ್ ನವೊ ರೂಪ್ ದಿಲ್ಲೊ ತುಂ

ಸೊಭಿತ್ ಮಂಗ್ಳುರಾಂತ್ ಜಲ್ಮೊನ್ ಕೊಂಕ್ಣೆಚೊ ಮೋಗ್ ಕೆಲೊಯ್
ಮಿಲಾಗ್ರಿಸಾಂತ್ ಶಿಕ್ಶಣ್ ಸಂಪವ್ನ್ ಸಂಗಿತಾಚೊ ಸಂಗಾತ್ ಕೆಲೊಯ್
ಚೊವ್ದಾ ವರ್ಸಾಂ ಪ್ರಾಯೆರ್ ಥಾಂವ್ನ್ ಗಾವ್ನ್ ಸಂಸ್ರಾಕ್ ದಾಕಯ್ಲೆಂಯ್
ಪಂದ್ರಾ ವರ್ಸಾಂ ಪ್ರಾಯೆರ್ ನಾಟಕ್ ಬರೊವ್ನ್ ನಾಂವ್ ಕೆಲೆಂಯ್

ಆಡೆಜ್ ಹಜಾರಾಂಚಾಕಿ ಚಡ್ ಕೊಂಕ್ಣಿ ಪೊದಂ ತುವೆಂ ಘಡ್ಲಿಂಯ್
ಬರಯಿಲ್ಲ್ಯಾ ಹರ್ಯೆಕ್ ಪದಾನಿಂ ವರ್ತೊ ಸಾರ್ ತುವೆಂ ಭರ್ಲೊಯ್
ಸಮಾಜೆಂತ್ ಚಲ್ಚಾ ಅನ್ಯಾಯಾಂಕ್ ಪದಾನಿಂ ಉಕಲ್ನ್ ದಾಕಯ್ಲೆಂಯ್
ಅಮ್ಚಾ ಹಕ್ಕಾಂಕ್ ಝುಜೊಂವ್ಕ್ ಪ್ರೊತ್ಸಾಹ್ ತುವೆಂ ದಿಲೊಯ್

"ಕೊಂಕಣ್ ಮೈನಾ" ಮೀನ ಬಾಯೆಚೊ ಪತಿ ತುಂ ಜಾಲೊಯ್
ಜಿವಿತಾಂತ್ ತಿಕ ಸಾಂಗತಿನ್ ಕರ್ನ್ ಕಾಳ್ಜಾಂ ಮನಾಂ ಜಿಕ್ಲೊಯ್
"ವೀಣಾ-ವಿಶ್ವಾಸ್" ಭುರ್ಗ್ಯಾಂಕ್ ಘೆವ್ನ್ ಸಂಗೀತ್ ಕುಟಾಂಬ್ ಬಾಂದ್ಲೆಂಯ್
ಕೊವ್ಳೆ ವಯ್ರ್ ಕೊವ್ಳಿ ಕರ್ನ್ ಸಂಗೀತಾಚೊ ಸ್ವಾದ್ ವಾಂಟ್ಲೊಯ್

ಕೊಂಕಣ್ ಮಾಯೆಚಿ ಪೊದಾಂ ಗಾವ್ನ್ "ಕೊಂಕಣ್ ಕೊಗುಳ್" ಜಾಲೊಯ್
ಪದಾಂ ಬರೊವ್ನ್ ಸಂಗೀತ್ ಗುಂತುನ್ "ಕೊಂಕಣ್ ಪೊದಂಚೊ ರಾಯ್" ಜಾಲೊಯ್
ಕೊಂಕ್ಣೆಚೊ ಮಾನ್ ವಾಡೊವ್ನ್ ತುಂ "ಕೊಂಕಣ್ ಕಲಾರತ್ನ" ಜಾಲೊಯ್
ನಿಸ್ವಾರ್ಥ್ ಸೆವಾ ಕೊಂಕ್ಣೆಕ್ ದೀವ್ನ್ "ಶತಮಾನಚೊ ವ್ಯಕ್ತಿ" ಜಾಲೊಯ್

ಸ್ತ್ರೀಯಾಂಚೊ ಮಹತ್ವ್....ತಾಂಚೊ ದೀಸ್

ಮನ್ಶಾ ಜಿವಿತಾಂತ್ ಸ್ತ್ರೀಯಾಂಚೊ ಪಾತ್ರ್ ವರ್ತೊ
ಸ್ತ್ರೀ ಅಸ್ಲೆಲ್ಯಾ ಘರಾಂತ್ ಸಂತೊಸ್ ತೊ ದೊಡ್ತೊ
ನಾರಾಚ ಬೊರಿ ಥಾವ್ನ್ ಸ್ತ್ರೀಯೆಕ್ ದೇವಾನ್ ರಚ್ಲೊ
ಸ್ತ್ರೀಯೆಚ ಗಾರ್ಭಾಥಾವ್ನ್ ನಾರಾನ್ ಜಾಲ್ಮ್ ಘೆತ್ಲೊ

ಧು ಜಾವ್ನ್ ದೇವಾಥಾವ್ನ್ ಸಂತೊಸ್ ತೆಂ ಹಾಡ್ತಾ
ಭಯ್ಣ್ ಜಾವ್ನ್-ಬಾಯ್ ಜಾವ್ನ್ ಘರ್ ತೆಂ ಸಂಬಾಳ್ತಾ
ಬಾಯ್ಲ್ ಜಾವ್ನ್ ಪತಿಚೆ ಘರ್ ತೆಂ ಭರ್ತಾ
ಆವಯ್ ಜಾವ್ನ್ ಅಮರ್ ಜಾವ್ನ್ ಕಾಳ್ಜಾಂತ್ ತೆಂ ಉರ್ತಾ

ಇಸ್ಕಾಲಾನಿಂ-ಅಫಿಸಾನಿಂ ಕುಟ್ಮಾ ಖಾತಿರ್ ಘೊಳ್ತಾ
ಭುರ್ಗ್ಯಾಂ-ಬಾಳಾಂಕ್ ಮೋಗ್ ದೀವ್ನ್ ಉರ್ಬೆವಂತ್ ಕರ್ತಾ
ಗ್ರೆಸ್ತಾಂಕಾರ್ ಗಷ್ಟೊ ಕಾಡ್ನ್ ಕಾಷ್ಟ್ ತೆಂ ಸೊಸ್ತಾ
ಅಪ್ಲೆ ಕಾಷ್ಟ್ ಗೀಳ್ನ್ ತೆಂ ಭುರ್ಗ್ಯಾಂಚೆ ದೊಳೆ ಪುಸ್ತಾ

ಗಗನಯಾತ್ರಿ ಜಾವ್ನ್ ತೆಂ ಅಕಾಸಾರ್ ಉಬ್ಲಾಂ
ಸುಂದರತ ದಾಕೊವ್ನ್ ತೆಂ ಪ್ಯಾಶಾನ್ ಶೊಂತ್ ಸೊಬ್ಲಾಂ
ಅಂತರಾಷ್ಟ್ರಿಯ ಖೆಳಾನಿಂ ನಾಂವ್ ತಾಣೆಂ ಜೊಡ್ಲಾಂ
ಮುಖೆಲ್ ಪಣ್ ದಾಕೊಂವ್ಕ್ ತೆಂ ರಾಜಕೀಯಾಂತ್ ರಿಗ್ಲಾಂ

ಮಾನ್ ತುಮ್ಕಾಂ ಸ್ತ್ರೀಯಾನೊಂ ಜಿವೆತಾಕ್ ಸಾರ್ ತುಮಿಂ ಭರ್ಲಾ
"ಮೋಗ್" ಮ್ಹಳ್ಳೊ ಸಬ್ದ್ ತುಮ್ಕಾಂ ಪಳೆವ್ನ್ ಘಡ್ಲಾ
ತುಮ್ಚಾ ಸಂಗಾತ್ ಪಣಾಂತ್ ಕುಟ್ಮಾ ಜಿವಿತ್ ಸೊಬ್ಲಾಂ
ಆಧುನಿಕ್ ಸಂಸಾರಾಂತ್ ಮಾನ್ ತುಂಮ್ಚೊ ವಾಡ್ಲಾ

ಕೊಂಕ್ಣಿ ಮೋಗ್....ಪಾಂಚ್ ಹಜಾರ್ ಮೆಂಬರ್ಸ್.

ಜಲ್ಮೊನ್ ಯೆತನಾ ತುಂ ಕೊಂಕಣಿ ಸಂಸಾರ್
ವೊಲಾಯ್ಲೆಂ ತುಕಾ ದೀವ್ನ್ ನಾಂವ್ "ಕೊಂಕಣಿ ಮೋಗ್"
ಜಿಕ್ಲಿಂ ತುವೆಂ ಮನಾಂ ಪಾಂಚ್ ಹಜಾರ್
ಕೆಳೊಂಕ್ ಸೊಡ್ಲೆಂಯ್ ಸಮೇಸ್ತಾಂಕ್ ತುಜಾ ಉಸ್ಕ್ಯಾರ್

ತುಜಾ ಮೊಗಾಕ್ ಅಪ್ಣಾಂವ್ನ್ ಕಾಳ್ಜಾಂ ಅಮ್ಚಿಂ ಮೊವಾಳ್ಳಿಂ
ತುಜ್ಯಾ ಸಂಗಾತ್ ಪಣಾನ್ ಬೊಗ್ಣಾಂ ಅಮ್ಚಿಂ ಜಾಗಯ್ಲಿಂ
ತುಜಿ ಜಾಣ್ವಾಯ್ ಮತಿಭಿತರ್ ಅಂಕ್ರ್ಯೊ ಜಾವ್ನ್ ಪಾನೆಲಿಂ
ತುಜ್ಯಾ ನಾಂವಾನ್ ಸಂದ್ಯಾಂಚಿಂ ಕಾಳ್ಜಾ ಮನಾಂ ಏಕ್ ಜಾಲಿಂ

ಭವಡ್ತಾಚ ಕವನಾಂನಿ ಭವಡ್ತಾಂತ್ ಘಟ್ ಕೆಲಿಂ
ಸಿಂತಿಮೆಂತಾಳ್ ಲಿಖ್ಣ್ಯಾನಿಂ ಮೋಗಾ ಸಂದೇಶ್ ಪಾಟಯ್ಲಿಂ
ಲಾಂಬ್ ಕಾಣಿ, ಕವಿತಾನಿಂ ಜಾಣ್ವಯ್ ಅಮ್ಚಿಂ ವಾಡಯ್ಲಿ
ಜಲ್ಮಾದಿಸಾಚ ಸಂದೇಶಾನ್ ಏಕ್ಸುರ್ ಪಾಣ್ ದಂವ್ಡಾಯ್ಲಿ

ಏಕ ದೇವಾಚೊ ಮಾನ್ ಕರುಂಕ್ ಸಂದೇಶ್ ಹಾಂಗ ಮೆಳ್ಳೊ
ಕೊಂಕಣ್ ಮಾಯೆಚೊ ಪೋಸ್ ಕರುಂಕ್ ಸಂಗಾತ್ ವಾಳೊನ್ ಅಯ್ಲೊ
ವಿವೆಕ್-ಜೊವಿನ್-ಐವನಾನಿಂ ಮೊಗಾನ್ ಹಾಕ ವಾಗಯ್ಲೊ
ಸಂಗಾತ್ ಅಸೊಚ್ ಮೆಳಾತ್ ತಾರ್ "ಮೋಗ್" ಜಾತಲೊ ಪಯ್ಲೊ.

(ಫೇಸ್ ಬುಕ್ಕರ್ "ಕೊಂಕ್ಣಿ ಮೋಗ್" ಹ್ಯಾ ಗ್ರೂಪಾಂತ್ 5000 ಸಾಂದೆ
ಭರ್ತಿ ಜಾಲ್ಲ್ಯಾ ವಾಗ್ತಾ ಹೆಂ ಕವನ್ ಪಾಯ್ಸ್ ಕೆಲ್ಲೆಂ. ಜೈ ಕೊಂಕಣಿ)

ಪದಾಂ ಭಿತರ್ಲೆಂ ಪೊದ್....ತುಜೊ ಯಾದ್.

ತುಕಾ ಚಿಂತುನ್ ಚಿಂತುನ್ ತೊಡ್ಯಾಂಕ್ ಫಾಂತೆ ಜಾತಾ
ತುಜಿಂ ಪದಾಂ ಅಯ್ಕಾಲ್ಯಾರ್ ಕಾಳಿಜ್ ಸಂತೊಸಾನ್ ಉಡ್ತಾ
ತುಜಿ ಯಾದ್ ಕೊಂಕಣ್ ಮಾಯೆಚೊ ಉಗ್ಡಾಸ್ ಹಾಡ್ತಾ
ತುಜ್ಯಾ ಮೊಗಾಕ್ ಅಜೂನ್ ವಾತಿ ಜಾಳ್ತಾತ್.

ಅವಯ್ ಪಣಾಕ್ ಮಾನ್ ಕರುಂಕ್ ಗಾಜೊವ್ನ್ ಸಾಂಗ್ಲೆಂಯ್
ಮೋಗ್ ಕರ್ಣಾರಾಂಚ ಜಿವಿತಾಂತ್ ಮೊಗಾಚೊ ದಿವೊ ಪೆಟಯ್ಲೊಯ್
ವ್ಹಡ್ಲಿ ಮಾಂಯ್ಚಾ  ವ್ಹಡ್ವಿಕಾಯೆಕ್ ಧಾಗ್ ತುವೆಂ ದಿಲೊಯ್
ದೋತ್ ಘೆವ್ನ್ ಕಾಜಾರ್ ಜಾಲ್ಯಾರ್ ಗಾತ್ ಪಾಡ್ ಮ್ಹಳೆಂಯ್

ಪೆಟ್ರಿಶಿಯಾಕ್ ಸೌದಿಕ್ ದಾಡ್ನ್ ಕೊಡ್ಯಾಳ್ಚಿ ರಾಣಿ ಕೆಲಿಯ್
ಫಿಲೊಮೆನಾಕ್ ಜಿಯೆಂವ್ಕ್ ದೀವ್ನ್ ಸಾಂಡುನ್ ತಾಕ ಗೆಲೊಯ್
ಕುಪಾಂತ್ ಲಿಪ್‍ಲ್ಲ್ಯಾ ರೂಪಾಕ್ ಗೊಪಾಂತ್ ಯೆವ್ಕಾರ್ ದಿಲೊಯ್
ಕಾಳ್ಜಾಂತ್ ಫುಲ್‍ಲ್ಲೆಂ ಫುಲ್ ಸುಜಾನ್ನಾಚ ಕೆಸಾಂಕ್ ಮಾಳ್ಳೆಂಯ್

ಸಂಗೀತಾಚ ಸಾತ್ ಸ್ವರಾಂಚೊ ಮೋಗ್ ತುವೆಂ ವರ್ಣಿಲೊಯ್
ಬೊಂಬಾಯ್ಚಾ ಸರ್ಗಾರ್ ಘುಂವ್ಡಾಂವ್ನ್ ಕಾಳ್ಜಾಚಿ ಅಶಾ ಥಾಂಬಯ್ಲಿಯ್
ಕಾಜಾರ್ ಜಾತಾನ ದರ್ವಡ್ಚೊ ಫೊಂಡಾಂತ್ ಪಡ್ಚೆಂ ಖಂಡಿತ್ ಮ್ಹಳೆಂಯ್
ಫಟ್ಕಿರ್ಯಾ ಹ್ಯಾ ಸಂಸಾರಾಂತ್ ಸತಾಕ್ ಸಂಗಾತ್ ದೀಂವ್ಕ್ ಉಲೊ ದಿಲೊಯ್

ಅವೈಚೆ ಪಾಯ್ ದುದಾಂತ್ ಧುವ್ನ್ ಮಾನ್ ತಿಚೊ ವಾಡಯ್ಲೊಯ್
ಕೊನ್ಶಾಂತ್ ಅಸ್‍ಲ್ಲ್ಯಾ ಮಾಂಯ್ ಭಾಷೆಕ್ ಕಾಳ್ಜಾನಿಂ ಜಾಗಯ್ಲೆಂಯ್
ಸೊಭಿತ್ ಶೆರ್ ಮಂಗ್ಳುರಾಕ್ ಕಾಳ್ಜಂತ್ ತುಜಾ ಜಾಗೊ ದಿಲೊಯ್
ಭೊಪಾಲಚ ಘಡಿತಾಕ್ ಕಾಳ್ಜಾಕ್ ನಾಟ್ವಾಸರ್ಕೆಂ ವರ್ಣಿಲೆಂಯ್

ದಳ್ಡಿರ್ ಸೊರ್ಯಾಚಿಂ ಕಾರ್ಬಾರಾಂ ದೊಳ್ಯಾಂ ಮುಕಾರ್ ದವರ್ಲೆಂಯ್
ಚಲಿಯೆಕ್ ಸ್ವತಂತ್ರಾಯ್ ದೀನಾತ್ಲ್ಯಾ ಸಮಾಜೆಕ್ ದಿಕ್ಕಾರ್ ಮ್ಹಳೆಂಯ್
ಮಾಂಯ್ಚಾ ಉಸ್ಕ್ಯಾರ್ ಶಿಕ್‍ಲ್ಲ್ಯಾ ಕೊಂಕ್ಣೆಕ್ ತುಂ ರುಣಿ ಜಾಲೊಯ್
ಪಂಜಾಬಚಿ ರಕ್ತಾಚಿ ವಾಳ್ ಪಳೆವ್ನ್ ಫುಡಾರ್ಯಾಂಕ್ ಜಾಗಯ್ಲೆಂಯ್

ಬೊರ್ಯಾ ಮನಾಂತ್ ಮಾಗ್ಲ್ಯಾರ್ ದೇವ್ ಪಾವೊ ಕರ್ತಾ ಮ್ಹಳೆಂಯ್
ದೇವಾಕಡೆ ಮಾಗೊನ್ ಮಾಂಯ್ಕ್ ಪಾಟಿಂ ಹಾಡುಂಕ್ ಸೊಪ್ಣೆಲೊಯ್
ಮೊರ್ಜಿ ಸೊಡ್ನ್ ಉಗ್ತ್ಯಾನ್ ಕೊಂಕ್ಣಿ ಉಚಾರುಂಕ್ ಉಲೊ ದಿಲೊಯ್
ಜಿವಿತಾಂತ್ ಹಾಸೊನ್ ಜಿಯೆಂವ್ಕ್ ಕಷ್ಟ್-ಸುಖ್ ಖಿರೊವ್ನ್ ಪಿಯೆಜೆ ಮ್ಹಳೆಂಯ್

ತುಜ್ಯಾಕಿ ವ್ಹಡ್ ಕೊಂಕಣ್ ಶಿಲ್ಪಿ ಅನ್ಯೆಕ್ಲೊ ಮೆಳ್ಚೊ ನಾಂ
ತುಜ್ಯಾಕಿ ವ್ಹಡ್ ಕೊಂಕಣ್ ಗಾವ್ಪಿಕ್ ಹಾಂವ್ ಚಿಂತುಂಕ್ ಸಕ್ಚೊ ನಾಂ
ಕೊಂಕ್ಣೆ ಖಾತಿರ್ ತುಜೊ ವಾವ್ರ್ ಕೆದಿಂಚ್ ವಿಸ್ರೊಂಕ್ ಜಾಂವ್ಚೆಂ ನಾಂ
ಕೊಂಕಣ್ ಚರಿತ್ರೆಂತ್ ತುಜೆಂ ನಾಂವ್ ಕೆದಿಂಕ್‍ಚ್ ಮಜ್ವೊನ್ ವೆಚೆಂ ನಾಂ