ಮೋಗ್ - ದೆವಾಚೆಂ ಅನ್ಯೇಕ್ ಪ್ರತಿರೂಪ್....

ಜುವಾಂವ್ಚ್ಯಾ ವಾಂಜೆಲಾಂತ್ ಹ್ಯಾ ಉತ್ರಾಂಕ್ ಸಾಕ್ಸ್ ಜಾವ್ನ್ ಆಶೆಂ ವಾಚುಂಕ್ ಮೆಳ್ತಾ 3:16 "ದೆವಾನ್ ಸಂಸಾರಾಚೊ ಅಸೊಯಿ ಮೋಗ್ ಕೆಲೊ ಕೀ, ತಾಣೆಂ ಅಪ್ಲ್ಯಾ ಎಕ್ಲ್ಯಾಚ್ ಪುತಾಕ್ ಹ್ಯಾ ಸಂಸಾರಾಕ್ ಒಪುನ್ ದಿಲೊ".  ಮೊಗಾಕ್ ಸಾಕ್ಸ್ ಜಾಂವ್ಚ್ಯಾ ಹ್ಯಾ ಉತ್ರಾಂಚಾಕೀ ದುಸ್ರಿಂ ಉತ್ರಾಂ ಮೆಳ್ಚಿನಾಂತ್.  ಮೋಗ್ ಮ್ಹಣ್ತಾನಾಂ ದೊಳ್ಯಾ ಮುಕಾರ್ ಯೆಂವ್ಚೆಂ ಪಯ್ಲೆಂ ಪಿಂತುರ್ ಜಾವ್ನಾಸ ದೆವಾಚೆಂ.  ದೇವ್ ಜಾವ್ನಾಸ ಮೋಗ್ ತಾರ್ ಮೊಗಾ ಥಾವ್ನ್ ದೆವಾಕ್ ವೆಗ್ಳೆಂ ಕರುಂಕ್ ಸಾಧ್ಯ್ ನಾಂ, ಮೋಗ್ ಅಸ್ಚ್ಯಾ ಕಾಳ್ಜಾಂತ್ ದೇವ್ ವಸ್ತಿ ಕರ್ತಾ ಹೆಂ ಉತಾರ್ ಸತ್ ಜಾವ್ನಾಸ. ಮೋಗ್ ನಾತ್ಲ್ಯಾರ್ ಹ್ಯಾ ಸಂಸಾರಿ ಜಿವಿತಾಕ್ ರೂಚ್ ನಾಂ ಮ್ಹಣ್ ಹರ್ಯೆಕ್ ಧರ್ಮ್ ಬೊಬಾಟ್ ಮಾರ್ನ್ ಗಾಜಾಯ್ತಾತ್ ತರೀ, ಮೊಗಾಕ್ ಮೆಳ್ಚೊ ಮಾನ್ ಅಮ್ಚಾ ಕ್ರಿಸ್ತಿ ಧರ್ಮಂತ್ ವಿಶೇಸ್ ಮ್ಹಳ್ಯಾರಿ ಚೂಕ್ ಜಾಂವ್ಚಿ ನಾಂ.  ಮೊಗಾಚೊ ಸಂಕೇತ್ ಜಾವ್ನ್ ದೇವ್ ಬಾಪ್ ಅಪ್ಲ್ಯಾ ಪರ್ಜೆಕ್ ವಿಂಚ್ತಾ, ತ್ಯಾಚ್ ಮೊಗಚೊ ಸಂಕೇತ್ ಜಾವ್ನ್ ಅಪ್ಲ್ಯಾ ಪುತಾಕ್ ಜೆಜು ಕ್ರಿಸ್ತಾಕ್ ಹ್ಯಾ ಸಂಸಾರಿ ಪಟಾಯ್ತಾ ಹರ್ಯೆಕ್ ಮನ್ಶಾಕುಳಾಕ್ ಸುಟ್ಕಾ ಲಾಬಂವ್ಚ್ಯಾಕ್.   ದೆವಾಚೊ ಮೋಗ್ ಕರ್ಚೆಂ ಉಪದೇಸಾಂತ್ ಕಶೆಂ ವರ್ತೆಂಗೀ, ಅಪ್ಲ್ಯಾ ಪೆಲ್ಯಾಚೊ ಮೋಗ್ ಕರ್ಚೆಂ ಸಂಸಾರಿ ಜಿವಿತಾಂತ್ ಅತೀ ಘರ್ಜೆಚೆಂ. ದೆವಾಚ ಮೊಗಾಚೊ ಸಂಕೇತ್ ಜಾವ್ನ್ ಮನಿಸ್ ಉಬ್ಜಲೊ ತಾರ್, ಮನ್ಶಾಚ ಮೊಗಾಚೊ ಸಂಕೇತ್ ಜಾವ್ನ್ ಮನ್ಶಾಕೂಳ್ ಹ್ಯಾ ಸಂಸಾರಿ ವಾಡೊನ್ ಅಯ್ಲೊ.

ಲೂಕ್ 6:35 "ತುಜ್ಯಾ ದುಸ್ಮಾನಾಚೊ ಮೋಗ್ ಕರ್" ಹಿ ಏಕ್ ವಿಚಿತ್ರ್ ಶಿಕೊವ್ಣ್ ಜೆಜುನ್ ಸಂಸಾರಾಕ್ ಶಿಕಯ್ಲಿ ಮಾತ್ರ್ ನೈಂ, ಅಪ್ಲ್ಯಾ ಜಿವಿತಾಂತ್ ಕಾರ್ನ್ ದಾಕಯ್ಲಿ. "ತುಮ್ಚೊ ಮೋಗ್ ಕರ್ತೆಲ್ಯಾಂಚೊ ಮಾತ್ರ್ ತುಮಿಂ ಮೋಗ್ ಕೆಲ್ಯಾರ್ ಕಿತೆಂ ಪಾಯ್ದೊ" ಹ್ಯಾ ಉತ್ರಾಂ ಮುಖಾಂತ್ರ್ ಕಳೊನ್ ಯೆತಾಗೀ, ಜೆಜುಚೆ ಪಾಟ್ಲಾವ್ದಾರ್ ಮ್ಹಣ್ ದಾಕೊಂವ್ಕ್ ಜಾತ್-ಭೇದ್ ನಾಸ್ತಾಂ, ಇಷ್ಟ್-ದುಸ್ಮಾನ್ ಮ್ಹಣ್ ಚಿಂತಿನಾಸ್ತಾಂ ಅಮಿಂ ಸಮೇಸ್ತಾಂಚೊ ಮೋಗ್ ಕರುಂಕ್ ಅಸಾ. ಮನಿಸ್ ಜಿವಿತಾಂತ್ ಕಿತೆಂಯ್ ಕರುಂ ಪೂಣ್ ಮೋಗ್ ತಾಚೆಂ ನೈಂ ನಾಂ ಜಾಲ್ಯಾರ್ ತೆಂ ಕಿತ್ಯಾಕ್‍ಚ್ ಪಾಯ್ದ್ಯಾಚೆಂ ಜಾಯ್ನಾ ಮಣ್ ಪಾವ್ಲ್ ಅಪ್ಲ್ಯಾ ಹರ್ಯೆಕ್ ಪತ್ರನಿಂ ಉಕುಲ್ನ್ ದಾಕಯ್ತಾ. ಕೊರಿಂತ್ ಗಾರಾಂಕ್ ಬರಯಿಲ್ಲ್ಯಾ ಪತ್ರಾಂತ್ ಮೊಗಾಚೆ ಗೂಣ್ ಬೋವ್ ಅಪುರ್ಬಯೆಚ ಉತ್ರಾನಿಂ ವರ್ಣಿತಾ. 1 ಕೊರಿಂಥ್ 4:7 "ಮೋಗ್ ಸೊಸ್ಣಿಕ್, ಮೋಗ್ ದಯಾಳ್, ಮೋಗ್ ಮಸರ್ ಕರಿನಾ, ಅಪ್ಲಿಚ್ ಬಡಾಯ್ ಉಲಯ್ನಾ, ಹಂಕಾರಾನ್ ಭರನಾ, ಮೋಗ್ ಮರ್ಯಾದಿವಿಣೆ ಚಲನಾ, ಸ್ವಂತ್ ಅಧಾಯ್ ಸೊಧಿನಾ, ರಾಗರ್ ಜಾಯ್ನಾ, ಅಪ್ಕಾರ್ ಮನಾಂತ್ ದವರಿನಾ, ಅನ್ನ್ಯಾಯ್ ಪಳೆವ್ನ್ ಸಂತೊಸ್ ಪಾವನಾ, ಮೋಗ್ ಸಗ್ಳೆಂ ಸೊಸುನ್ ವ್ಹರ್ತಾ, ಸಗ್ಳೆಂ ಸತ್ಮಾನ್ತಾ, ಸಗ್ಳೆಂ ಭರ್ವಸ್ತಾ ಆನಿ ಸಗ್ಳೆಂ ಸಾಂಬಾಳ್ನ್ ವ್ಹರ್ತಾ"

ಮೊಗಾಚೊ ಆರ್ಥ್ ಏಕ್‍ಚ್ ತರೀ, ಸಂಸಾರಿ ಮನ್ಶಾನಿಂ ತಾಕ ವಿವಿಧ್ ರೂಪಾನಿಂ ಪಳೆಂವ್ಕ್ ಸುರು ಕೆಲೆಂ. ಜಾಂವ್ ತೊ ಪೊಷಕ್-ಭುರ್ಗ್ಯಾಂಚೊ, ಘೊವ್-ಬಾಯ್ಲೆಚೊ, ದೊಗಾಂ ಪ್ರೆಮಿಂಚೊ ವಾ ಸೆವೆಚ ಮನೊಭಾವಚೊ.  ಹರ್ಯೆಕ್ ಮನ್ಶಾ ಥೈಂ ದೆವಾಚೊ ಮೋಗ್ ಸೊದ್ಚೆಂ ವಿಶೇಷ್ ಗೂಣ್ ಆನಿ ಮದರ್ ತೆರೆಜಾ ತಸಲ್ಯಾ ಸತೆವಂತ್ ಮನ್ಶಾಂನಿ ತೆಂ ಸಂಸಾರಾಕ್ ದಾಕಯ್ಲಾಂ.  ಮೊಗಾಚೊ ಅನುಭವ್ ಮೆಳ್ಳ್ಯಾ ಕಿತ್ಲೆಶ್ಯಾ ಜಣಾಂಕ್ ತಾಂಚಿ ಪಿಡ ಗೂಣ್ ಜಾಲ್ಯಾ, ತಾಂಚ ಏಕ್ಸುರ್ಪಣ ಥಾವ್ನ್ ಸುಟ್ಕಾ ಮೆಳ್ಳ್ಯಾ ಆನಿ ಜಿವಿತ್‍ಚ್ ಬದ್ಲವಾಣ್ ಜಾಲಾಂ. ಮೊಗಾಚೊ ಆರ್ಥ್ ಸಮ್ಜೊಂಕ್ ಸಕ್ಚೊ ಆನಿ ಮೊಗಾಚ ನದ್ರೆನ್ ದೆಕೊಂಕ್ ಸಕ್ಚೊ ಹ್ಯಾ ಸಂಸಾರಾಂತ್ ಏಕ್ ಜಾಯ್ತೆವಂತ್ ಮನಿಸ್ ಜಾವ್ನಾಸ. ಮೋಗ್ ಕರುಂಕ್ ಏಕ್ ಬರೆಂ ಕಾಳಿಜ್ ಜಾಯ್ಜೆ ಆನಿ ತ್ಯಾ ಕಾಳ್ಜಾಂತ್ ಬರಿಂ ಬೊಗ್ಣಾಂ ಬರೊನ್ ಅಸೊಂಕ್ ಜಾಯ್.  ಕಶೆಂ ಏಕ್ ಕೊಂಬಿ ಅಪ್ಲ್ಯಾ ಪಿಲಾಂಕ್ ಅಪ್ಲ್ಯಾ ಪಾಕಾಟ್ಯಾಂ ಪಂದಾ ಏಕ್ಟಾಂಯ್ ಕಾರ್ನ್ ತಾಂಚಿ ಜತಾನ್ ಘೆತಾ, ತಾಚ್ಯಾಕಿ ವರ್ತ್ಯಾ ಮಾಪನ್ ದೆವಾನ್ ಅಮ್ಚೊ ಪೋಸ್ ಕೆಲಾ ಅಸ್ತಾಂ, ತಾಚಿ ಖರಿಂ ಭುರ್ಗಿಂ ಜಾಂವ್ಕ್ ತಯಾರ್ ಜಾವ್ಯಾಂ.  ಮೊಗವರ್ವಿಂ ಸಂಸಾರ್ ಜಿಕ್ಯೆತ್ ಮ್ಹಳ್ಳೆಂ ಸತ್ ಸಮ್ಜೊಂವ್ನ್ ಘೆವ್ಯಾಂ.

ನವೆಂ ವರಸ್ ಇತ್ಲ್ಯಾರ‍್ಚ್ ಸುರುಜಾಂವ್ಚೆಂ ಅಸಾ, ಏಕ್ ದ್ರಡ್ ನಿಚೆವ್ ಕರ್ಯಾಂ, ದೆವಾಚೊ ಮೋಗ್ ಕಾಳ್ಜಾಂತ್ ಜಾಗವ್ಯಾಂ, ತ್ಯಾಚ್ ಮೊಗಾನ್ ಸಂಸಾರ್ ಪಳೆಂವ್ಯಾಂ, ಹರ್ಯೆಕ್ ದೀಸ್ ಉಲ್ಲಾಸಚೆ ಜಾತೆಲೆ ಆನಿ ಪರತ್ ಜಿಯೆಂವ್ಕ್ ಉರ್ಬಾ ಮೆಳ್ತಾಲಿ.

ದಾವಿದ್ ಸಾಲ್ಮಾಂವ್ಕ್ ರಾಯ್ ಜಾಂವ್ಕ್ ವಿಂಚ್ತಾ.....

ಇಸ್ರಾಯೆಲಿತಾಂಕ್ ರಾಜ್ ಕೆಲ್ಲ್ಯಾ ಪಯ್ಕಿ ದಾವಿದ್ ಬಲಿಷ್ಟ್ ರಾಯ್ ಜಾವ್ನಾಸ್ತಾ
ಅಪ್ಲ್ಯಾ ಮತರ್ಯಾ ಪ್ರಾಯೆವರೆಗ್ ತೊ ಇಸ್ರಾಯೆಲಾ ವಾಯ್ರ್ ರಾಜ್ ಕರ್ತಾ
ದಾವಿದ್ ಪ್ರಾಯ್ ವಂತ್ ಜಾತನ ಅದೊನೀಯಾ ಸಿಂಹಾಸನಚೆರ್ ದೊಳೊ ದವರ್ತಾ
ಏಕ್ ದೀಸ್ ಉಗ್ತ್ಯಾನ್ ಅಪುಣ್ ರಾಯ್ ಮ್ಹಣ್ ಇಸ್ರಾಯೆಲಾಂತ್ ಪಾಚಾರ್ತಾ

ಅದೊನೀಯ ಏಕ್ ವ್ಹಡ್ ಔತಣ್ ಕಾರ್ನ್ ಸಾರ್ವ್ ಮುಖೆಲ್ಯಾಂಕ್ ಆಪಯ್ತಾ
ಅಪ್ಲೆಂ ವ್ಹಡ್ಪಣ್ ಉಲೊವ್ನ್ ಸಕ್ಡಾಂಕ್ ಅಪ್ಲ್ಯಾ ಹತಖಾಲ್ ದವರುಂಕ್ ಪ್ರಯತ್ನ್ ಕರ್ತಾ
ದಾವಿದ್ ರಾಯಾಚ ಖಾಶಾ ವ್ಯಕ್ತಿಂಕ್ ಔತಣ ಥಾವ್ನ್ ಬಾಯ್ರ್ ದವರ್ತಾ
ನಾತಾನ್ ಪ್ರವಾಧಿಕ್ ಅದೊನೀಯಾಚಿ ಹಿ ಗುಟ್ಮೊಳ್ ಕಳೊನ್ ಯೆತಾ

ನಾತಾನ್ ಪ್ರವಾಧಿ ಅದೊನೀಯ ಥೈಂ ಅಸ್ಲೆಲ್ಯಾ ಖೊಟ್ಯಾ ಸ್ಪಿರಿತಾಕ್ ಪರ್ಕಿತಾ
ಬತ್‍ಶೆಬಾ ಮುಖಾಂತ್ರ್ ನಾತಾನ್ ಹಿ ಖಬರ್ ದಾವಿದ್ ರಾಯಾಕ್ ಪಾವಯ್ತಾ
ಸಾಲ್ಮಾಂವ್ಕ್ ರಾಯ್ ಕರ್ತಲೊ ಮ್ಹಣ್ ದಾವಿದ್ ಬತ್‍ಶೆಬಾಕ್ ಉತಾರ್ ದೀವ್ನಾಸ್ತಾ
ಖಬರ್ ಕಳ್ಳೆಂಚ್ ದಾವಿದ್ ರಾಯ್ ಅಪ್ಲೆ ಅಧಿಕಾರ್ ಸಾಲ್ಮಾಂವ್ಚಾ ಅಧಿನ್ ಕರ್ತಾ

ಯಾಜಕ್ ಜಾದೊಕ್ ಸಲ್ಮಾಂವ್ಚಾ ಮಾತ್ಯಾರ್ ತೇಲ್ ವೊತುನ್ ಅಭಿಷೇಕ್ ಕರ್ತಾ
ಇಸ್ರಾಯೆಲ್ ಲೋಕ್ ಕೊಂಬ್ ಪುಂಕುಂನ್ ಸಾಲ್ಮಾಂವ್ಕ್ ಬೊರೆಂ ಮಾಗ್ತಾ
ಅಪ್ಲ್ಯಾ ಬಾಪಾಯ್ಚಾ ಅಶಿರ್ವಾದನ್ ಸಾಲ್ಮಾಂವ್ ಇಸ್ರಾಯೆಲಾಚೊ ರಾಯ್ ಜಾತ
ಸಲ್ಮಾಂವ್ಕ್ ರಾಯ್ ಜಾವ್ನ್ ನೆಮ್ಚೆಂ ಸರ್ವೆಸ್ಪರಚಿ ಖುಶಿ ಜಾವ್ನಾಸ್ತಾ

ಸಾಲ್ಮಾಂವ್ ರಾಯ್ ಜಾಲ್ಲಿ ಖಬರ್ ಅದೊನೀಯಾಕ್ ಕಳೊನ್ ಯೆತಾ
ತಾಚೆ ಸವೆಂ ಔತಣಾಂತ್ ಅಸ್ಲೊಲೊ ಲೋಕ್ ತಾಕ ಸಾಂಡುನ್ ಪೋಳ್ನ್ ವೆತಾ
ಅಪುಣ್ ನಿಸ್ಸಾಯಕ್ ಜಾಲ್ಲೆಂ ಕಳ್ಳೆಂಚ್ ಅದೊನೀಯಾ ರಾಯಾ ಸರ್ಶಿಂ ಯೆತಾ
ಅಪ್ಣಾಚೆ ಪಾತಕ್ ಒಳ್ಕೊನ್ ಸಾಲ್ಮಾಂವ್ ರಾಯಾ ಥಾವ್ನ್ ಬೊಗ್ಸಾಣೆ ಮಾಗ್ತಾ

ತೊಡ್ಯಾಚ್ ದಿಸಾನಿಂ ಅದೊನೀಯಾ ಪರತ್ ರಾಯ್ ವಿರೊಧ್ ರಾವ್ತಾ
ಅಪ್ಲೊ ಬಾಪಯ್ ದಾವಿದಾಚ ಸೆವಾಕಿ ಕಡೆ ಕಾಜಾರ್ ಜಾಂವ್ಕ್ ಅಶೆತಾ
ಸಾಲ್ಮಾಂವ್ ರಾಯಾಕ್ ಅಪ್ಲ್ಯಾ ಅವಯ್ ಥಾವ್ನ್ ಹಿ ಖಬರ್ ಕಳೊನ್ ಯೆತಾ
ಖೊಟ್ಯಾ ನಡ್ತೆಚ್ಯಾ ಅದೊನೀಯಾಕ್ ರಾಯ್ ಪಾವೊತಿ ಶಿಕ್ಶಾ ಲಾಬಯ್ತಾ

ಅಮ್ಮೋನ್ ಆನಿ ತಾಮಾರ್......

ದಾವಿದಾಚೊ ಪೂತ್ ಅಬ್ಸಲೋಮಾಕ್ ತಾಮಾರ್ ನಾಂವಾಚಿ ಭಯ್ಣ್ ಅಸ್ತಾ
ದಾವಿದಾಚೊ ಅನ್ಯೇಕ್ ಪೂತ್ ಅಮ್ಮೋನ್, ತಾಮಾರಚ ಮೊಗಾರ್ ಪಡ್ತಾ
ತಾಮಾರಕ್ ಏಕ್ವಟುಂಕ್ ಜಾಯ್ನಾತ್ಲೆಂ ಚಿಂತುನ್ ಅಮ್ಮೋನ್ ಪಿಡೆಸ್ತ್ ಜಾತ
ಅಮ್ಮೋನಾಚೊ ಇಷ್ಟ್ ಜೊನಾದಾಬ್ ಉಪಾಯ್ ಸಂಗೊಂಕ್ ಮುಕಾರ್ ಯೆತಾ

ಏಕ್ ದೀಸ್ ಅಮ್ಮೋನ್ ಕಠೀಣ್ ಪಿಡೆಸ್ತ್ ಜಾವ್ನ್ ಖಾಟ್ಯೆರ್ ನಿದೊನ್ ಅಸ್ತಾ
ದಾವಿದ್ ರಾಯಾಕ್ ಹಿ ಖಬರ್ ಕಳೊನ್ ಅಮ್ಮೋನಾಕ್ ಪಳೆಂವ್ಕ್ ಯೆತಾ
ತಾಮಾರ ಥಾವ್ನ್ ಅಪ್ಣಾಚಿ ಸುಶ್ರುಶಾ ಕರೊಂವ್ಕ್ ಅಮ್ಮೋನ್ ವಿನಂತಿ ಕರ್ತಾ
ಅಮ್ಮೋನಚ ಇಚ್ಛೆ ಪ್ರಕಾರ್ ರಾಯ್ ತಾಮಾರಕ್, ಅಮ್ಮೋನಚ ಘರ ದಾಡ್ತಾ

ತಾಮಾರಚ ಮೊಗಾರ್ ಅಸ್ಲೊ ಅಮ್ಮೋನ್ ಏಕ್ ದೀಸ್ ತಾಕ ಬಲತ್ಕಾರ್ ಕರ್ತಾ
ಹ್ಯಾ ಘಡಿತಾ ಉಪ್ರಾಂತ್ ಲಜೆಕ್ ಲಾಗೊನ್ ತಾಮಾರಕ್ ಘರಥಾವ್ನ್ ಬಾಯ್ರ್ ಗಾಲ್ತಾ
ಅಪ್ಣಾಚೊ ಮಾನ್ ಹೊಗ್ಡಾಯಿಲ್ಲೆಂ ತಾಮಾರ್, ಅಬ್ಸಲೋಮಾಚ ಘರ ಪಾಟಿಂ ಯೆತಾ
ಅಪ್ಲ್ಯಾ ಭಯ್ಣಿಚ ಅಪಮಾನಕ್ ಲಾಗೊನ್ ಅಬ್ಸಲೋಮ್ ಪರಿಕ್ಪಣ್ ಗೆಂವ್ಕ್ ಸೊದ್ತಾ

ಏಕ ಪರ್ಬೆಕ್ ಅಬ್ಸಲೋಮ್ ಜೆವಾಣ್ ತಯಾರ್ ಕರ್ನ್ ಭವಾಂಕ್ ಜೆವ್ಣಾಕ್ ಅಪಯ್ತಾ
ಸಂದರ್ಬ್ ಪಳೆವ್ನ್ ಘರ ಅಯಿಲ್ಲ್ಯಾ ಅಮ್ಮೋನಕ್ ಜಿವೆಶಿಂ ಮರಯ್ತಾ
ಅಪ್ಲೆಂ ಭಯ್ಣ್ ತಾಮಾರಕ್ ಅವಮಾನ್ ಕೆಲ್ಲ್ಯಾಕ್ ಅಮ್ಮೋನಕ್ ಹಿ ಶಿಕ್ಶಾ ದಿತಾ
ದಾವಿದ್ ರಾಯ್ ರಾಗರ್ ಜತಾ ಆನಿ ಅಮ್ಮೋನ ಖಾತಿರ್ ವಿಳಾಪ್ ಕರ್ತಾ

ದಾವಿದ್ ರಾಯಾಚೊ ರಾಗ್ ನಿವುಲ್ಲೆಂಚ್ ತೊ ಅಬ್ಸಲೋಮನ್ ಬೊಗ್ಸಾಣೆ ದಿತಾ
ಖೊಟ್ಯಾ ಸ್ಪಿರಿತಾನ್ ಭರ್ಲೊಲೊ ಅಬ್ಸಲೋಮ್ ರಾಯಾಕ್ ಮಾರುಂಕ್ ಸೊದ್ತಾ
ಇಸ್ರಾಯೆಲಾಚ ಲೊಕಾಂಕ್ ಅಪ್ಲ್ಯಾ ಮುಟಿಂತ್ ಘೆವ್ನ್ ರಾಯಾಕ್ ಬಾಯ್ರ್ ಗಾಲ್ತಾ
ದಾವಿದ್ ರಾಯ್ ರಾನಾಂತ್ ಚುಕೊನ್ ಅಬ್ಸಲೋಮ ಥಾವ್ನ್ ಪಳ್ನ್ ದಾಂವ್ತಾ

ಅಪ್ಲೆಂ ಸೈನ್ ಘೆವ್ನ್ ಅಬ್ಸಲೋಮ್ ರಾಯಾಕ್ ಮಾರುಂಕ್ ಸೊದ್ನಾಂ ಕರ್ತಾ
ಜೊರ್ದಾನ್ ದೊಂಗ್ರಾರ್ ಝಗ್ಡೆಂ ಚಲ್ತನಾಂ ಅಬ್ಸಲೋಮ್ ಮರಣ್ ಪಾವ್ತಾ
ದೆವಾನ್ ವಿಂಚ್ಲೆಲ್ಯಾಕ್ ನಾಸ್ ಕರುಂಕ್ ಚಿಂತ್ಲ್ಯಾ ಅಬ್ಸಲೋಮಾಕ್ ಶಿಕ್ಶಾ ಮೆಳ್ತಾ
ದೆವಾಚೊ ವಿಶ್ವಾಸಿ ಸೆವಾಕ್ ದಾವಿದ್ ಪರತ್ ಝಗ್ಡ್ಯಾಂತ್ ಜಾಯ್ತೆವಂತ್ ಜಾತ

ದಾವಿದ್ ರಾಯಾಚೆಂ ಪಾತಕ್....

ವರ್ಸಾಚ್ಯಾ ವಸಂತ್ ಕಾಳಾರ್ ರಾಯಾನಿ ಝುಜಾಕ್ ವೆಚೊ ವೇಳ್ ಜಾವ್ನಾಸ್ಲೊ
ದಾವಿದ್ ರಾಯಾನ್ ಜೊವಾಬಾಕ್ ಮುಖೆಲ್‍ಪಣ್ ದೀಂವ್ನ್ ಝುಜಾಕ್ ದಾಡ್‍ಲ್ಲೊ
ದೆವಾಚ ಸಸಾಯೆನ್ ದಾವಿದನ್ ಜಾಯ್ತ್ಯಾ ಗಾಂವಾಂಚೆರ್ ಆಕ್ರಮಣ್ ಕೆಲ್ಲೊ
ತಾಚ ಪರಾಕ್ರಮ ನಿಮ್ತಿಂ ದಾವಿದ್ ರಾಯ್ ಅಖ್ಯಾ ಇಸ್ರಾಯೆಲಾಂತ್ ನಾವಾಡ್ಲೊ

ಏಕ್ ದೀಸ್ ದಾವಿದ್ ರಾಯ್ ಅಪ್ಲ್ಯಾ ರಾವ್ಳೆರಾಚ ಮಾಳಿಯೆರ್ ಬೊಂವೊನ್ ಅಸ್ತಾ
ನಾಂವ್ಕ್ ದೆವುಲ್ಲಿ ಏಕ್ ಇಸ್ರಾಯೆಲ್ ಸ್ತ್ರೀ ರಾಯಾಚ ದೊಳ್ಯಾಂಕ್ ದಿಷ್ಟಿಕ್ ಪಡ್ತಾ
ರಾಯ್ ತಿಕ ಮೆಚ್ವತಾ ಆನಿ ತ್ಯಾ ಸ್ತ್ರೀಯೆ ವಿಶಿಂ ಖಬರ್ ಕಾಡುಂಕ್ ಫರ್ಮಾಯ್ತಾ
ತೀ ಏಲಿಯಾಮಾಚಿ ಧೂ ಆನಿ ಸೈನಿಕ್ ಹಿತ್ತಿತ್ ಉರೀಯಾಚಿ ಬಾಯ್ಲ್ ಜಾವ್ನಾಸ್ತಾ

ರಾಯ್ ತಿಕ ಮೆಚ್ವೊನ್ ತಿಚೆ ಸಂಗಿ ಏಕ್ವಾಟ್ತಾ ಆಶೆಂ ಬತ್ ಶೆಬಾ ಗರ್ಬೆಸ್ತ್ ಜಾತ
ಬತ್ ಶೆಬಾ ಗರ್ಬೆಸ್ತ್ ಜಾಲ್ಲಿ ಖಬರ್ ದಾವಿದ್ ರಾಯಾಕ್ ಚಿಂತ್ನಾರ್ ಗಾಲ್ತಾ
ಅಪ್ಣಾಚೆ ಪಾತಕ್ ಲಿಪೊಂವ್ಕ್ ದಾವಿದ್ ರಾಯ್ ವಿವಿಧ್ ವಾಟೊ ಸೊದುನ್ ಅಸ್ತಾ
ಝುಜಾಕ್ ಗೆಲ್ಲ್ಯಾ ಉರೀಯಾಕ್ ಪಾಟಿಂ ಅಪೊವ್ನ್ ಚುಕೊನ್ ಕಾಣ್ಗೆಂವ್ಕ್ ಪಳೆಯ್ತಾ

ಉರೀಯಾಕ್ ಕಶೆಂ ತರಿ ಕಾರ್ನ್ ಬಾತ್ ಶೆಬಾ ಸವೆಂ ಏಕ್ವಾಟಾಂವ್ಕ್ ಸದನ್ ಕರ್ತಾ
ರಾಯಾಚೆಂ ಪ್ರಯತ್ನ್ ವ್ಯರ್ತ್ ಜಾತ ಉರೀಯಾ ಘರಥಾವ್ನ್ ಪಾಯ್ಸ್ ಉರ್ತಾ
ರಾಯಾಕ್ ಹಿ ಖಬರ್ ಕೊಡು ಜಾತ ಉರೀಯಾಕ್ ನಾಸ್ ಕರುಂಕ್ ಗುಟ್ಮೊಳ್ ಕರ್ತಾ
ಜೊವಾವಾಕ್ ಪತ್ರ್ ದೀವ್ನ್ ಝುಜಾ ಮುಖಾಂತ್ರ್ ಜಿವೆಶಿ ಮಾರುಂಕ್ ಫರ್ಮಾಯ್ತಾ

ರಾಯಾಚ ಖುಶೆ ಪರ್ಮಾಣೆ ಜೊವಾಬ್ ಉರೀಯಾಕ್ ಝಗ್ಡ್ಯಾಂತ್ ಮುಕಾರ್ ಗಾಲ್ತಾ
ಅಮೋನಿತಾಂ ಸವೆಂ ಝಗ್ಡೆಂ ಕರ್ತನಾಂ ಉರೀಯಾ ಹೆರಂ ಸವೆಂ ಮರಣ್ ಪಾವ್ತಾ
ಬತ್ ಶೆಬಾ ಅಂತರ್ಲೆಲ್ಯಾ ಅಪ್ಲ್ಯಾ ಪತಿ ಉರೀಯಾ ಖಾತಿರ್ ವ್ಹಡ್ ವಿಳಾಪ್ ಕರ್ತಾ
ಅತಾಂ ವಿಧವ್ ಸ್ತ್ರೀ ಬತ್ ಶೆಬಾಕ್ ಅಪ್ಣಾಂವ್ಕ್ ದಾವಿದ್ ರಾಯ್ ತಯಾರ್ ಜಾತ

ಅಪ್ಲ್ಯಾ ಲೊಕಾಂಕ್ ಮೆಚ್ವೊಂವ್ಕ್ ರಾಯ್ ಬತ್ ಶೆಬಾ ಕಡೆ ಕಾಜಾರ್ ಜಾತ
ವಿಧವ್ ಸ್ತ್ರೀಯೆಕ್ ಅಪ್ಣಾಯಿಲ್ಲೆ ವರ್ವಿಂ ರಾಯಾಚೊ ಮಾನ್ ಲೊಕಾಂ ಮುಕಾರ್ ವಾಡ್ತಾ
ಅಪ್ಣಾಚೊ ಮಾನ್ ಉರೊಂವ್ಕ್ ದಾವಿದ್ ರಾಯ್ ದೆವಾ ಮುಕಾರ್ ಪಾತ್ಕಿ ಜಾತ
ನಾತಾನ್ ಪ್ರವಾದಿ ಒಪಾರಿ ಮುಖಾಂತ್ರ್ ರಾಯಾಕ್ ಅಪ್ಲೆಂ ಪಾತಕ್ ದಾಕೊವ್ನ್ ದಿತಾ