ದೆವಾಚಿ ಸಾವ್ಳಿ....

ಮನ್ಶಾಚೆಂ ಜಿವಿತ್ ಜಾಲ್ಮ್ ಘೆತ್ಲಾಂ ದೆವಾಚ ಹ್ಯಾ ಸಾವ್ಳೆಂತ್
ಪ್ರಥ್ವಿ ಅಜೂನ್ ದಿಸಾಂ ಮೆಜ್ತಾ ಹ್ಯಾಚ್ ದೆವಾಚ ಸಾವ್ಳೆಂತ್
ಜನಾಂಗಾನಿಂ ರಾಜ್ ಕೆಲಾಂ ದೆವಾಚ ಹ್ಯಾ ಸಾವ್ಳೆಂತ್
ಮನ್ಶಾಕೂಳ್ ವಾಡೊನ್ ಚಡ್ತಾ ಹ್ಯಾಚ್ ದೆವಾಚ ಸಾವ್ಳೆಂತ್

ಅದಾಂವ್ ಏವ್ ಶಭಿತ್ ಅಸ್ಲಿಂ ದೆವಾಚ ಹ್ಯಾ ಸಾವ್ಳೆಂತ್
ಇಸ್ರಾಯೆಲ್ ಪರ್ಜಾ ವಾಟ್ ಚಮ್ಕಾಲಿ ಹ್ಯಾಚ್ ದೆವಾಚ ಸಾವ್ಳೆಂತ್
ಮೊಯ್ಜೆಚೆಂ ಸೈನ್ ಜಯ್ತೆವಂತ್ ಜಾಲೆಂ ದೆವಾಚ ಹ್ಯಾ ಸಾವ್ಳೆಂತ್
ದಾವಿದ್ ರಾಯಾನ್ ರಾಜ್ಯ್ ವಿಸ್ತಾರ್ಲೆಂ ಹ್ಯಾಚ್ ದೆವಾಚ ಸಾವ್ಳೆಂತ್

ಜಣ್ತ್ಯಾಂಚಿ ಕರ್ಬಾರಾಂ ಚಲ್ತಾತ್ ದೆವಾಚ ಹ್ಯಾ ಸಾವ್ಳೆಂತ್
ಅಸ್ಕತ್ಯಾನಿಂ ಭರ್ವಸೊ ದೆಕ್ಲಾ ಹ್ಯಾಚ್ ದೆವಾಚ ಸಾವ್ಳೆಂತ್
ನಿರ್ಗತಿಕನಿಂ ಅಸ್ರೊ ಘೆತ್ಲಾ ದೆವಾಚ ಹ್ಯಾ ಸಾವ್ಳೆಂತ್
ಭವಿಷ್ಯಚೊ ಘುಟ್ ಲಿಪ್ಲಾ ಹ್ಯಾಚ್ ದೆವಾಚ ಸಾವ್ಳೆಂತ್

ದೀಸ್ ರಾತ್ ಚಲೊನ್ ಅಸಾತ್ ದೆವಾಚ ಹ್ಯಾ ಸಾವ್ಳೆಂತ್
ಸುರ್ಯೊ-ಚಂದ್ರ್ ಖೆಳ್ ಖೆಳ್ತಾತ್ ಹ್ಯಾಚ್ ದೆವಾಚ ಸಾವ್ಳೆಂತ್
ಪಾವ್ಸ್-ವೋತ್ ಅಧಾರ್ ಜಾತತ್ ದೆವಾಚ ಹ್ಯಾ ಸಾವ್ಳೆಂತ್
ಜಿವಿತ್-ಮರಣ್ ಅಟಪುನ್ ಅಸಾ ಹ್ಯಾಚ್ ದೆವಾಚ ಸಾವ್ಳೆಂತ್

ಹ್ಯಾ ಸಾವ್ಳೆಕ್ ಪಾಟ್ ಕರ್ಶಿ, ಭುಂಯ್ ಕಾಪ್ಣೆಂತ್ ಚಿರ್ಡತಲೊಯ್
ಹ್ಯಾ ಸಾವ್ಳಕ್ ಪಾಟ್ ಕರ್ಶಿ, ಉದ್ಕಾಚ ಅವ್ರಾಂತ್ ವಾಳ್ತಲೊಯ್
ಹ್ಯಾ ಸಾವ್ಳೆಕ್ ಪಾಟ್ ಕರ್ಶಿ, ಸಂಸಾರಿ ವೊಡ್ಣೆಕ್ ಸಂಪ್ಡತಲೊಯ್
ಹ್ಯಾ ಸಾವ್ಳೆಕ್ ಪಾಟ್ ಕರ್ಶಿ, ಮರ್ಣಚ ಮುಟ್ಯೆಂತ್ ಕರ್ಗತಲೊಯ್

ಕಿತ್ಲೆ ದೀಸ್ ರಾಕಯ್ತಾಯ್.....

ಮೋಗ್ ತುಜೊ ಅಶೆತಾಂ ಮೊರ ಪರ್ಯಾಂತ್ ಚೆಡ್ವಾ

ದೆವಾನ್ ತುಕಾ ನಿರ್ಮಿಲಾಂ ಮ್ಹಜೆ ಪಾಸುನ್ ಭಡ್ವ್ಯಾ

ತುಜೆ ವೀಣ್ ಸಕ್ಚೊ ನಾಂ ಜಿಯೆಂವ್ಕ್ ಏಕ್ಸುರೆಂ ಜಿವಿತ್

ಆಶೆತಾಂ ಅಪ್ಣಾಂವ್ಕ್ ತುಕಾ ಜಿವಿತಾಚ ಹ್ಯಾ ಪಯ್ಣಾಂತ್

ಪಾವ್ಸಾಕ್ ರಾಕ್ಚಾ ಭುಂಯ್ ಬರಿ ರಾಕೊನ್ ಹಾಂವ್ ತಕ್ಲಾಂ

ಸುಕೊನ್ ಪಡ್ಚಾ ಕೊಲಿಯೆ ಬರಿ ನಿರ್ಜೀವ್ ಜಾಲಾಂ

ಕರ್ಗೊನ್ ವೆಚ ವಾತಿ ಬರಿ ಘಡಿಯೊ ಮೇಜುನ್ ರಾವ್ಲಾಂ

ಜಾಳಾಂತ್ ಪಡ್‍ಲ್ಲ್ಯಾ ಸುಕ್ಣ್ಯಾ ಬರಿ ದಡ್ಬಡೊಂಕ್ ಲಾಗ್ಲಾಂ

ದಿಸಾನ್ ದೀಸ್ ನಿಬಾಂ ದೀಂವ್ನ್ ಮ್ಹಕಾ ತುಂ ರಾಕಯ್ತಾಯ್

ಪ್ರಾಯ್ ತುಜಿ ದಕ್ಟಿ ಮ್ಹಣೊನ್ ಗರ್ವಾನ್ ತುಂ ಚಲ್ತಾಯ್

ಮೊಡಭಿತರ್ಲೆಂ ಕೂಪ್ ಜಾವ್ನ್ ದಿಸ್ಟಿಕ್ ತುಂ ಪಡ್ತಾಯ್

ಫಾಂತ್ಯಾ ಫರಚ ಚಂದ್ರ ಬರಿ ಘಡ್ಯೆನ್ ತುಂ ಲಿಪ್ತಾಯ್

ಕಾಳ್ಜಾಚ ಕೊನ್ಶಾಂತ್ ಬಸೊನ್ ಕಿಟಳ್ ತುಂ ಪೆಟಯ್ತಾಯ್

ಬೊಗ್ಣಾಂಚೊ ವ್ಹಾಳೊ ಜೀವ್ ಕರ್ನ್ ಕುಡಿಕ್ ಸತಾಯ್ತಾಯ್

ಸೊಪ್ಣಾಂತ್ ತುಜಿ ಮರ್ಜಿ ದಾಕೊವ್ನ್ ನಿದೆಂತ್ ಜಾಗಯ್ತಾಯ್

ದೀಸ್ ರಾತ್ ಚಿಂತುಂಕ್ ಕರ್ನ್ ಮೊಗಾಂತ್ ಲೊಳೆಯ್ತಾಯ್

ಸಾಂಗು ಕಶೆಂ ತುಕಾ ಅಪ್ಣಾಂವ್ಕ್ ಕಾಳಿಜ್ ಮ್ಹಜೆಂ ದರ್ವಾಡ್ತಾ

ತುಜೆ ಬಗಾರ್ ಹರ್ಯೆಕ್ ದೀಸ್, ವರ್ಸಾ ಬರಿ ಸತಾಯ್ತಾ

ಸಾಂಗ್ ಮ್ಹಕಾ ಕೆದ್ನಾಂ ತುಜೆಂ ಕಾಳಿಜ್ ಮೊಗಾಕ್ ಅಶೆತಾ

ತುಜೊ ಸಂಗಾತ್ ಮ್ಹಜ್ಯಾ ಜಿವಿತಾಕ್ ನವಿ ದಿಶಾ ದಾಕಯ್ತಾ