Wednesday, May 18, 2011

ಅಮ್ಚಿಂ ಕಾಜಾರಾಂ.......ತುಟ್ತಾತ್ ಕಿತ್ಯಾಕ್ ?



"ಕಾಜಾರಾಂ ಘಡ್ತಾತ್ ಸರ್ಗಾರ್" ಹೆಂ ಜಾಲಾಂ ತೊಂಡಾಚೆ ಉತಾರ್
ಘೊವ್-ಬಾಯ್ಲ್ ವಿಸ್ರೊನ್ ಗೆಲ್ಯಾಂತ್ ಜಿಯೆಂವ್ಚೆಂ ಕೊಣಾ ಖಾತಿರ್ ?
ದೆವಾ ಮುಕಾರ್ ಬಾಂದ್‍ಲ್ಲೊ ಭಾಂದ್ ತುಟ್ತಾ ಸುಲಭಾಯೆರ್
ಅಶೆಂಚ್ ಹೆಂ ಘಡ್ತಾ ತರ್ ಸಮಾಜೆಕ್ ಹೆಂ ಮಾರೆಕಾರ್

ಏಕಾ-ಮೆಕಾ ಮೊಗಾರ್ ಪಡೊನ್ ಥೊಡಿಂ ಜಾಲಿಂ ಕಾಜಾರ್
ಥೊಡ್ಯಾಂಕ್ ಸಯ್ರಿಕೊ ಯೆತಾತ್ ಅಪ್ಲ್ಯಾಚ್ ಕುಟ್ಮಾ ಭಿತರ್
ಥೊಡ್ಯಾನಿಂ ಸುಲಭಾಯೆನ್ ಸೊದ್ಲೆಂ ಅತಾಂಚಾ ಅಂತರ್ಜಾಳಾರ್
ಕಾಜಾರಿ ಮಾಲ್ಯಾನಿಂ ಮುಕಾರ್ ಪಡೊನ್ ತೊಡ್ಯಾಂಕ್ ಕೆಲೆಂ ಬೆಜಾರ್

ಚೆಡೊ-ಚೆಡುಂ ಏಕ್ ಜಾತಾತ್ ದೀವ್ನ್ ಎಕಾ-ಮೆಕಾ ಭಾಸ್
ದಿಲ್ಲಿ ಭಾಸ್ ಪರ್ನಿ ಜಾತ ಪಾಶಾರ್ ಜಾತೆಚ್ ದೀಸ್
"ಸುಖಾಂತ್ ಆನಿ ದುಃಖಾಂತ್" ಮ್ಹಳ್ಳೆಂ ವಿಸ್ರತಾ ಮನಿಸ್
ಹಂಕಾರ್, ಗರ್ವ್, ವ್ಹಡ್ಪಾಣ್ ರಾಜ್ ಕರ್ತಾ ಘರಾಂತ್

ಘೊವ್ ಆನಿ ಬಾಯ್ಲೆ ಮದೆಂ ಸೊಡ್-ದೊಡ್ ನಾಂ
ಶಿಕ್‍ಲ್ಲ್ಯಾ ಚೆಡ್ವಾಕ್ ಮುಟ್ಯೆಂತ್ ದವರುಂಕ್ ತಿತ್ಲೆಂ ಸುಲಬ್ ನಾಂ
ಪಯ್ಶೆ ಆಸ್‍ಲ್ಲ್ಯಾ ಚೆಡ್ಯಾಕ್ ಆಜ್-ಕಾಲ್ ಧರ್ನ್ ದಿಸಾನಾಂ
ಹಾಂಕ ಪಳೆವ್ನ್ ಘರ ಅಸ್‍ಲ್ಲ್ಯಾಂಕ್ ನೀದ್ ಪಡಾನಾಂ

ದಾಕ್ಟ್ಯಾ-ದಾಕ್ಟ್ಯಾ ಕಾರಣಾಂ ಖಾತಿರ್ ಜಗ್ಡೆಂ ಸುಕಾನಾಂ
ಜಗ್ಡೆಂ ಕರ್ನ್ ಕುಳಾರ ಗೆಲ್ಯಾರ್ ಮರ್ಯಾದ್ ಮೆಳನಾಂ
ಬಾಯ್ಲ್ ನಾತ್ಲ್ಯಾ ಘರಾಂತ್ ದಾದ್ಲ್ಯಾಕ್ ಸಮಾಧಾನ್ ಅಸನಾಂ
ಆಶೆಂ ಜಿಯೆವ್ನ್ ದೀಸ್ ಕಾಡುಂಕ್ ಸಮಾಜ್ ಸೊಡಿನಾಂ

ವಾಡಾ-ಚಡಾ ಸಂಸಾರ್ ಭರಾ ದೆವಾಚೆಂ ತೆಂ ಬೆಸಾಂವ್
ಇಗರ್ಜ್ ಮಾತಾ ಕಾಜಾರ ಪಯ್ಲೆಂ ದಿತಾ ಅಮ್ಕಾಂ ಲಿಸಾಂವ್
ಕುಟ್ಮಾ ಜಿವಿತಾಂತ್ ಜೆಜು ಅಸ್ಲ್ಯಾರ್ ದೆಕ್ತೆಲ್ಯಾಂವ್ ನೊವೆಸಾಂವ್
"ದೆವಾನ್ ಏಕ್ ಕೆಲ್ಲೆಂ ಮನಿಸ್ ಮೊಡಿನಾಯೆ" ಜಾಂವ್ದಿ ಅಮ್ಚೆಂ ಶ್ಲೊಗಾನ್

No comments:

Post a Comment