ಛೆ...ಹಾಂವೆ ಪಯ್ಲೆಂಯ್ ಸಂಗ್ಯೆತೆ ಅಸ್ಲೆಂ...

ತೊ ಸನ್ವಾರಚೊ ದೀಸ್ ಅಫಿಸಾಂತ್ ಕಾಮ್ ಅಸ್ಚೆಂ ಅರ್ದೊ ದೀಸ್ ಮಾತ್ರ್, ಸಕಾಳಿಂ ಅಫಿಸಾಕ್ ವೆಚಾ ಪಯ್ಲೆಂ ಬಾರಾ ವೊರಾಂಚ ಪಯ್ಲೆಂಚ್ ಹಾಂವ್ ಅಫಿಸ್ ಮುಗ್ದುನ್ ಸಾಂತೆ ಥಾವ್ನ್ ಮ್ಹಜ್ಯಾ ಬಾಯ್ಲೆಕ್ ಪಿಕ್ ಕರ್ತಾಂ ಮ್ಹಣ್ ಉತಾರ್ ದಿಲ್ಲೆಂ ತಾಶೆಂ ಅಮಿಂ ದೊಗಾಂಯ್ ಸಾಂಗತ ಘರ ಪಾವ್ತೆಲ್ಯಾಂವ್ ಮ್ಹಣ್  ಘರ್ಚಿಂ ಚಿಂತುನ್ ಅಸ್ಲಿಂ. ಪೂಣ್ ಪ್ರಿಮಾಕ್ ತಾಚ ಘರ ಕಡೆ ಮ್ಹಣಸರ್ ಡ್ರಾಪ್ ಕರುಂಕ್ ಅಸ್‍ಲ್ಲ್ಯಾನ್ ಮ್ಹಾಕಾ ಏಕ್ ಘಂಟ್ಯಾಚೊ ವೇಳ್ ಜಾಲೊ. ತಾಶೆಂ ಏಕ್ ವರಕ್ ಘರ್ಚೆಂ ಡೋರ್ ಬೆಲ್ಲ್ ದಾಂಬ್ಲೆಂಚ್ ದೊಗೀ ಚೆರ್ಕ್ಯಾನಿಂ ಏಕಚ್ಚಣೆಂ ವಿಚಾರ್ಲೆಂ "ಕಿತೆಂ ಡಾಡ ಆಜ್ ಲೇಟ್",
ಕಿತೆಂ ಆಜ್ ಭುರ್ಗ್ಯಾಂಕ್ ಬಾಪಯ್ಚೊ ಇತ್ಲೊಯ್ ಹುಸ್ಕೊ ಮ್ಹಣ್ ಚಿಂತ್ಚಾ ಪಯ್ಲೆಂಚ್, ಘರ್ಚ ಕುಜ್ನಾಂ ಥಾವ್ನ್ ಮ್ಹಜ್ಯಾ ಬಾಯ್ಲೆಚೆಂ ಏಕ್ ಥರಾಚಿಂ ಅಮ್ಸಣೆಚಿಂ ಉತ್ರಾಂ ಬಾಯ್ರ್ ಪಡ್ಲಿಂ "ತುಮ್ಚಾ ಡಾಡಕ್ ವಾಟೆರ್ ಮೆಳ್‍ಲ್ಲ್ಯಾಂಕ್ ಡ್ರಾಪ್ ಕರ್ನ್ ಪುರ್ಸೊತ್ ಮೆಳ್ಳ್ಯಾರ್ ನೆಂ ವೆಗ್ಗಿಂ ಯೆಂವ್ಚೆಂ"
ಮ್ಹಕಾ ಸಮ್ಜಲೆಂಗೀ, ಆಜ್ ಆಳ್ಯಾನ್ ಗಂದ್ ಜಾವ್ನಾಂ ಮ್ಹಣೊನ್. ತಾಶೆಂ ದಾರರ್ ಅಯಿಲ್ಲ್ಯಾ ಮ್ಹಕಾ ಕಸೊ ಅಸಾಯ್ ಮ್ಹಣ್ ವಿಚರುಂಕ್ ಸಾಯ್ತ್ ತೆಂ ಯೇಂವ್ಕ್ ನಾತ್ಲೆಂ.
ತಿತ್ಲೆಂಚ್ ನೈಂ ಇತ್ಲೆ ದೀಸ್ ಹಾಂವೆ ವೇಳ್ ಕರ್ನ್ ಯೆಂವ್ಚೆಂ ಭುರ್ಗ್ಯಾಂಕ್ ಕಾಯಿಂಚ್ ಫರಕ್ ಪಡನಾತ್ಲೆಂ, ತರ್ ಆಜ್ ಹಾಂವ್ ಘರ್ ರಿಗ್ಚ ಪಯ್ಲೆಂ ಮ್ಹಜ್ಯಾ ಬಾಯ್ಲೆನ್ ರಾಗಾನ್ ದೋನ್ ಚಾರ್ ಉತ್ರಾಂ ಜೊರಾನ್ ಸಾಂಗೊಂನ್ ಸೊಡ್ಲ್ಯಾಂತ್ ಆನಿ ತಿಂ ಭುರ್ಗ್ಯಾಂಚ ಕಾನಾಂತ್ ಪಡ್ಲ್ಯಾಂತ್, ತಾಶೆಂ ಭುರ್ಗ್ಯಾನಿಂ ಮ್ಹಜಿ ಪಾಪ್ ಭಿರ್ಮೊತ್ ಚಿಂತುನ್ ನೈಂ, ಬಗಾರ್ ಅವಯ್ಚಾ ಉತ್ರಾಂ ಥಾವ್ನ್ ಪ್ರೇರಿತ್ ಜಾವ್ನ್ಂ ಆಶೆಂ ಇಸರ್ ಲ್ಲೆಂ ಮ್ಹಣೊನ್.
"ತುವೆಂ ಸಾಂಗ್‍ಲ್ಲೆಂಯ್ ಮ್ಹಕ ಸಾಂತೆ ಥಾವ್ನ್ ಪಿಕ್ ಕರ್ತಾಂ ಮ್ಹಣೊನ್, ಹಾಂವ್ ತ್ಯಾ ವೊತಾಕ್ ರಾಕೊನ್ ರಾಕೊನ್ ಸಾಡೆ ಬಾರಾಂಕ್ ರಿಕ್ಶಾ ದರ್ನ್ ಅಯ್ಲಿಂ" ಬಾಯ್ಲ್ ಮ್ಹಣಾಲೆಂ.
"ಅಳೆ ಸ್ವೀಟ್ ಹಾರ್ಟ್, ಹಾಂವ್ ಆಜ್ ವೆಗ್ಗಿಂ ಯೆಂವ್ಚಾರ್ ಅಸ್‍ಲ್ಲೊಂ, ತಕ್ಶಣ್ ಬೊಸಾನ್ ಏಕ್ ಅರ್ಜೆಂಟ್ ಕಾಮ್ ಅಸಾ ಮ್ಹಣೊನ್ ಅರ್ದೊ ಘಂಟೊ ರಾವಾಯ್ಲೆಂ, ತೆಂ ಮುಗ್ದೊನ್ ಜಟ್ ಪಟ್ ಕಾರ ಕಡೆ ಪಾವ್ತಾನಾಂ, ಪ್ರಿಮಾ ಉಲೊಂವ್ಕ್ ಮೆಳ್ಳೆಂ. ತಾಶೆಂ ತಾಕಾಯ್ ಸಾಂಗತ ಹಾಡ್ಲೆಂ" ಹಾಂವೆ ಮ್ಹಳೆಂ.
"ಹೊ ಹೊ ತಾಶೆಂ ತುಕಾ ಮ್ಹಜೊ ವಿಸರ್ ಪಡ್ಲೊ ಅಸ್ತಲೊ, ಮ್ಹಳ್ಯಾರ್ ತರ್ನಿ ಚೆಡ್ವಾಂ ಕುಶಿನ್ ಬೊಸ್ಲ್ಯಾರ್ ದಾದ್ಲೆ ಸಂಸಾರ್ ವಿಸ್ರತಾತ್ ಕೈಂ, ತಾಶೆಂ ಜಾಲಿ ತುಜಿ ಕಥಾ" ರಗಾನ್ ಮ್ಹಣಾಲೆಂ.
"ಅತಾಂ ಪ್ರಿಮಾಕ್ ಹಾಡ್ನ್ ಡ್ರೊಪ್ ಕೆಲ್ಲ್ಯಾಕ್ ಇತ್ಲೆಂ ಪೂರ ಕಿತ್ಯಾಕ್ ಉಲಯ್ತಾಯ್, ಕಶೆಂಯ್ ತೆಂ ಅಮ್ಚಾಚ್ ವಾಡ್ಯಾಂತ್ ರಾವ್ತಾ, ತಾಶೆಂ ಮುಕಾರ್ ಮೆಳ್ತಾನಾಂ ಯೇನಕ ಮ್ಹಣೊಂಕ್ ಜಾತಾಯೆ" ಹಾಂವೆ ಮ್ಹಳೆಂ.
"ಪೂಣ್ ಹಾಚ ಪಯ್ಲೆಂಯ್ ತುವೆಂ ಡ್ರಾಪ್ ಕೆಲಾಂಯ್ ಮ್ಹಣ್ ಮ್ಹಕಾ ಕಿತ್ಯಾಕ್ ಸಾಂಗೊಂಕ್ ನಾಂಯ್" ಮ್ಹಣ್ ಉಡೊನ್ ಪಡ್ಲೆಂ.
ಅತಾಂ ಕಳ್ಳೆಂ ಹಾಂವೆ ಕೆಲ್ಲಿ ಚೂಕ್, ವ್ಹಯ್, ಹಾಂವೆ ಹಾಚ ಪಯ್ಲೆಂ ಸಾಂಗ್ಯೆತೆಂ ಅಸ್ಲೆಂ ಪೂಣ್ ಹಿ ಏಕ್ ಸಂಗ್ಚೆ ತಸಲಿ ವಿಶಯ್ ಮ್ಹಣ್ ಹಾಂವೆ ಚಿಂತುಂಕ್‍ಚ್ ನಾತ್‍ಲ್ಲೆಂ.