ದೆವಾಚೊ ವಾಂಟೊ ದೆವಾಕ್...

ದೆವಾನ್ ಮ್ಹಕಾ ಆಜ್ ರಚ್ಲಾ ತರ್ ಏಕ್ ಉದ್ದೇಶ್ ಅಸಾ
ಉದ್ದೇಶ್ ವಿಸ್ರೊನ್ ಜಿಯೆಲ್ಯಾರ್ ಜಿವಿತ್ ಪಿಡ್ಡ್ಯಾರ್ ಜಾತಾ
ಘೆಂವ್ಚಾಕಿ, ದಿಂವ್ಚಾಂತ್ ವರ್ತಿ ದಾದೊಸ್ಕಾಯ್ ಅಸಾ
ದೆವಾಚ ನಾಂವಾನ್ ದಿಲ್ಲ್ಯಾಕ್ ದೇವ್ ದೊಡ್ತ್ಯಾನ್ ದಿತಾ

ತೊಟಾಂ-ಭಟಾಂನಿ ತುಂ ಘೊಳ್ತಾಯ್, ಘಾಮ್ ವಾರೊವ್ನ್ ಕಾಮ್ ಕರ್ತಾಯ್
ವೊಂಪುಲ್ಲೆಂ ಭಿಂ ವಾಡೊನ್ ಯೇಂವ್ಕ್ ದೆವಾಕಡೆ ಮಾಗ್ತಾಯ್
ದೆವಾನ್ ಪಾವೊ ಕೆಲ್ಲೆಂಚ್ ತಾಕ ವಿಸ್ರೊನ್ ಸೊಡ್ತಾಯ್
ತಾಚ್ಯಾ ವಾಂಟ್ಯಾಚೆಂ ಕಾಣಿಕ್ ಬೆಟೊಂವ್ಕ್ ತುಂ ಪಾಟಿಂ ಸರ್ತಾಯ್

ಇಸ್ಕೊಲಾನಿಂ-ಅಫಿಸಾನಿಂ ತುಂ ಕುಟ್ಮಾ ಖಾತಿರ್ ಕಾಮ್ ಕರ್ತಾಯ್
ಬೊರೆಂ ಕಾಮ್ ಮೆಳ್ಚಾ ಖಾತಿರ್ ತುಂ ನೊವೆನಾಂ ದರ್ತಾಯ್
ದೆವಾಚ ಬೆಸಾಂವಾನ್ ಬೊರ್ಯಾ ಏಕ್ ಕಾಮಾಕ್ ಲಾಗ್ತಾಯ್
ನೊವೆನ ತವಳ್ ಉಚರ‍್ಲ್ಲಿ ಆಂಗೊಣ್ ಫಾರಿಕ್ ಕರುಂಕ್ ವಿಸ್ರಾತಾಯ್

ಲಾಕ್ ಲಾಕ್ ಖರ್ಚುನ್ ತುಂ ಅಪ್ಣಾಕ್ ರಾವೊಂಕ್ ಘರ್ ಬಾಂದ್ತಾಯ್
ಘರಕ್ ಜಾಯ್ ಜಾಲ್ಲೆಂ ಪಾವೊ ಕರ್ ಮ್ಹಣ್ ದೆವಾಕ್ ದೊಸ್ತಾಯ್
ಘರಾಚೆಂ ವ್ಹಡ್ಪಾಣ್ ಸಂಸ್ರಾಕ್ ದಾಕೊಂವ್ಕ್ ಜೆವ್ಣಾಂ ವಾಂಟ್ತಾಯ್
ತಾಚ ನಾಂವಾಕ್ ಏಕ್ ಮೀಸ್ ದೀಂವ್ಕ್ ತುಂ ವಿಸ್ರೊನ್ ಸೊಡ್ತಾಯ್

ಕ್ರಿಸ್ತಾಂವ್ ಮ್ಹಣ್ ದಾಕೊಂವ್ಕ್ ತುಂ ಆಯ್ತಾರಾಚೆಂ ಮಿಸಾಕ್ ವೆತಾಯ್
ವೊಲ್, ಕುಮ್ಗಾರ್, ಕಾಜಾರಾಕ್ ಪಾದ್ರ್ಯಾಬಾಚೊ ಸಹಾಯ್ ಆಶೆತಾಯ್
ಅಪ್ಣಾ ವಿಶಿಂ, ಕುಟ್ಮಾ ವಿಶಿಂ ವ್ಹಡ್ ವ್ಹಡ್ ಗಜಾಲಿ ಕಾಡ್ತಾಯ್
ಇಗರ್ಜೆಚೆಂ ವರ್ಸಾಚೆಂ ಲೇಕ್ ದೀಂವ್ಕ್ ತುಂ ಪಾಟಿಂ ಸರ್ತಾಯ್