ಕೆದೊ ವರ್ತೊ ಭವರ್ಥ್ ತುಜೊ...

ಬಾರಾ ವರ್ಸಾಂ ಪಿಡೆನಿಮ್ತಿಂ ಕಾಳ್ಜಾಭಿತರ್ ತುಂ ರಡ್ತಲೀಯ್
ತುಜ್ಯಾ ಪಿಡೆಕ್ ವಕತ್ ನಾಸ್ತಾಂ ದುಃಖಾನಿಂ ತುಂ ಕಡ್‍ಲ್ಲೀಯ್
ವಾಯ್ಜಾಚಿಂ ವಕ್ತಾಂ ಕಾರ್ನ್ ರಿಣಾಂತ್ ತುಂ ಬುಡ್‍ಲ್ಲೀಯ್
ಜಿವಿತಾಚ ಬರ್ಯಾ ದಿಸಾಂಕ್ ರಾಕೊನ್ ತುಂ ರಾವುಲ್ಲೀಯ್

ವೈಜಾಂಚೊ ವೈಜ್ ಸೊಮ್ಯಾ ವಿಶಿಂ ತುವೆಂ ಅಯ್ಕಾಲ್ಲೆಂಯ್
ಕಶೆಂ ತರೀ ತಾಕ ಪಳೆಂವ್ಕ್ ವೇಳ್ ಘಡಿ ತುಂ ಸೊದ್ತಾಲಿಯ್
ಪಾತ್ಕಾಂಕ್ ತುಜಾ ನಿತಳ್ ಕರ್ನ್ ತಯಾರ್ ತುಂ ರಾವುಲ್ಲಿಯ್
ಸಯ್ರ್ಯಾ ದಯ್ರ್ಯಾಂಕ್ ಬರಿ ಖಬರ್ ದೀಂವ್ಕ್ ತುಂ ರಾಕ್ತಲಿಯ್

ದೊಂಗ್ರಾರ್ ಚಲೊನ್ ವೆಚಾ ಸೊಮ್ಯಾಕ್ ತುವೆಂ ದೆಕ್ಲೆಂಯ್
ಹರಿಂ ಹರಿಂ ಲೊಕಾಂ ಮದೆಂ ಪಾಟ್ಲಾವ್ ತಾಚೊ ಕೆಲೊಯ್
ಪಾಟ್ಲಾವ್ದಾರ್ ದಾದ್ಲ್ಯಾಂ ಮದೆಂ ಭೆಂ-ಬಿರಂತಿವೀಣ್ ಚಲ್ಲೀಯ್
ಕಶೆಂಯ್ ತರೀ ಜೆಜುಕ್ ಅಪ್ಡುಂಕ್ ದೈರ್ಯ್ ತುವೆಂ ಘೆತ್ಲೆಂಯ್

ಅವ್ಕಾಸ್ ಮೆಳ್ತಾಚ್ ಜೆಜುಚೆಂ ಆಂಗ್ ವಸ್ತುರ್ ತುವೆಂ ಅಪುಡ್ಲೆಂಯ್
ತುಜ್ಯಾ ಭವರ್ಥಕ್ ಘುರ್ತ್ ಜಾವ್ನ್ ಬಲಾಯ್ಕಿ ತುವೆಂ ಅಪ್ಣಾಯ್ಲಿಯ್
ಬೊಲಾಯ್ಕೆಚ ದಾತರಕ್ ರೂಪ್ ರೂಪ್ ತುವೆಂ ದೆಕ್ಲೆಂಯ್
ತುಜ್ಯಾ ಭವರ್ಥಕ್ ಇನಾಮ್ ಜಾಂವ್ನ್ ಶಭಸ್ಕಿ ತುವೆಂ ಜೊಡ್ಲೆಂಯ್

ಬಾಯೆ... ಮಕಾಯ್ ಸಾಂಗ್ ತ್ಯಾ ಅಖಂಡ್ ಭವರ್ಥಚೊ ಘುಟ್
ಹಾಂವಿ ಚಮ್ಕೊಂಕ್ ಆಶೆತಾಂ ಸೊಮ್ಯಾನ್ ದಾಕಯಿಲ್ಲಿ ವಾಟ್
ದಾಂವ್ಚಾ ಹ್ಯಾ ಸಂಸಾರಾಂತ್ ಆಕಂತಾಚೆಂ ಜಾಲಾಂ ಹರ್ಯೆಕ್ ಮೇಟ್
ಭವರ್ಥ್ ತುಜೊ ಘಟ್ ಅಸ್ಲ್ಯಾರ್ ದೆಕ್ತಲೊಯ್ ಜಯ್ತಾಚೆಂ ಮುಕುಟ್