ಸಾವ್ಲ್ ದಾವಿದಾಕ್ ಮಾರುಂಕ್ ಸೊದ್ತಾ.....

ಪಿಲಿಸ್ತಿಯಾಚ ಝಗ್ಡ್ಯಾಂತ್ ದಾವಿದ್ ಗೊಲಿಯಾತಾಕ್ ಮಾರ್ನ್ ನಾಂವ್ ಜೊಡ್ತಾ
ಹೆಂ ಅಯ್ಕೊನ್ ಇಸ್ರಾಯೆಲಚೊ ರಾಯ್ ಸಾವ್ಲ್ ಅಪ್ಣಾ ಭಿತರ‍್ಚ್ ಮೊಸ್ರಾನ್ ಝಳ್ತಾ
ಕಶೆಂ ತರಿ ಕಾರ್ನ್ ದಾವಿದಾಕ್ ಮಾರುಂಕ್ ವಾಟ್ ಸೊದುನ್ ತೊ ಅಸ್ತಾ
ಅಪ್ಲ್ಯಾ ರಾವ್ಳೆರ ಥಾವ್ನ್ ತಾಕ ಪಾಯ್ಸ್ ದವರುಂಕ್ ಹರ್ ಪ್ರಯತ್ನ್ ತೊ ಕರ್ತಾ

ರಾವ್ಳೆರಾಂತ್ ದಾವಿದ್ ಸಾವ್ಲಾಚಿ ಧುವ್ ಮಿಕಲ ಕಡೆ ಮೊಗಾರ್ ಪಡ್ತಾ
ಹೊ ಅವ್ಕಾಸ್ ಮುಕಾರ್ ದವರ್ನ್ ದಾವಿದಾಕ್ ಕಷ್ಟಾಂತ್ ಸಂಪ್ಡಾಂವ್ಕ್ ಸಾವ್ಲ್ ಚಿಂತಾ
ಅಪ್ಲ್ಯಾ ಧುವೆ ಕಡೆ ಲಾಗ್ನ್ ಜಾಯ್ಜೆ ತಾರ್ ಪಿಲಿಸ್ತಿಯಾಂ ಕಡೆ ಝುಜೊಂಕ್ ಅಹ್ವಾನ್ ದಿತಾ
ದಾವಿದಾಕ್ ಝುಜಾಕ್ ದಾಡ್ನ್ ತಾಕ ನಾಸ್ ಕರುಂಕ್ ತೊ ವೇಳ್ ಘಡಿ ಸೊದ್ತಾ

ದಾವಿದ್ ಅಪ್ಲ್ಯಾ ಪರಾಕ್ರಮ ವರ್ವಿಂ ಸಾವ್ಲಾಚೊ ಪೂತ್ ಜೊನಾತಾನಾಕ್ ಮೊಗಾಚೊ ಜಾತ
ಜಾಯ್ತ್ಯಾ ಘಡಿತಾನಿಂ ಜೊನಾತಾನ್ ದಾವಿದಾಕ್ ಪೋಳ್ನ್ ವಸೊಂಕ್ ಕುಮೊಕ್ ಕರ್ತಾ
ಸಾವ್ಲಾ ಥಾವ್ನ್ ಲಿಪೊನ್ ದಾವಿದ್ ವಿವಿದ್ ಫಾಲ್ಕ್ಯಾನಿಂ ಅಸ್ರೊ ಘೆತಾ
ದೆವಾಚೊ ಅತ್ಮೊ ತಾಚೆ ಸವೆಂ ಅಸ್‍ಲ್ಲ್ಯಾನ್ ದೇವ್ ತಾಕ ಅಧಾರ್ ಜಾತಾ

ಏಕ್ ಪವ್ಟಿಂ ದಾವಿದ್ ಏನ್ ಗೆದಿಚಾ ಅರಣ್ಯಾಂತ್ ತಂಬು ಮಾರ್ನ್ ಅಸ್ತಾ
ಖಬರ್ ಕಳ್ತಾಚ್ ಸಾವ್ಲ್ ಸೈನ್ ಘೆವ್ನ್ ದಾವಿದಾಕ್ ಸೊದುನ್ ಅರಣ್ಯಾಕ್ ಯೇವ್ನ್ ಪಾವ್ತಾ
ಅರಣ್ಯಾಂತ್ ಅಸ್ಲೆಲ್ಯಾ ಧೊಲಿಂತ್ ವಿಶೆವ್ ಘೆಂವ್ಕ್ ಸಾವ್ಲ್ ಭಿತರ್ ಸರ್ತಾ
ದಾವಿದ್ ಭಿತರ್ ದೊಲಿಂತ್ ಅಸ್ಲೊ ತರೀ, ಸಾವ್ಲಾಕ್ ಕಿತೆಂಚ್ ಕರಿನಾಸ್ತಾ ಮಾನ್ ಕರ್ತಾ

ದುಸ್ರೆ ಪವ್ಟಿಂ ದಾವಿದ್ ಹಕಿಲಾ ದೊಂಗ್ರಾರ್ ಅಸ್ಚೆಂ ಸಾವ್ಲ್ ರಾಯಾಕ್ ಕಳುನ್ ಯೆತಾ
ಸಾವ್ಲ್ ತೀನ್ ಹಜಾರ್ ಸೈನಿಕಾಂಕ್ ಘೆವ್ನ್ ದಾವಿದಚ ಜಾಗ್ಯಾಕ್ ವೆಡೊ ಗಾಲ್ತಾ
ಪರತ್ ದೇವ್ ದಾವಿದಾಕ್ ರಾಕುನ್ ವರ್ತಾ ಆನಿ ಸಾವ್ಲ್ ಸಂಪ್ಡಾಶೆಂ ಕರ್ತಾ
ಪರತ್ ದಾವಿದ್ ಸಾವ್ಲಾಚಿ ದಯಾ ಕರ್ತಾ ಆನಿ ತಾಕ ನಾಸಾ ಥಾವ್ನ್ ರಾಕುನ್ ವರ್ತಾ

ಸಾವ್ಲ್ ದೆವಾನ್ ಮಾಕ್ಲೊಲೊ ರಾಯ್ ಮ್ಹಳ್ಳೆಂ ದಾವಿದ್ ಸಮ್ಜೊಂವ್ನ್ ಅಸ್ತಾ
ದೆವಾನ್ ಮಾಕ್ಲೆಲ್ಯಾಕ್ ಅಪುಣ್ ಕಿತೆಂಚ್ ಕರ್ಚೊ ನಾಂ ಮ್ಹಣ್ ಸಪುತ್ ಘೆವ್ನಾಸ್ತಾ
ದಾವಿದಾಚ ಬರ್ಯಾ ಮಾನಾಕ್ ಲಾಗುನ್ ದೇವ್ ತಾಕ ಅಶಿರ್ವಾದಿತ್ ಕರ್ತಾ
ಸಾವ್ಲಾಚ್ಯಾ ಮರಣ ಉಪ್ರಾಂತ್ ದಾವಿದಾಕ್ ಇಸ್ರಾಯೆಲಾಚೊ ರಾಯ್ ಜಾವ್ನ್ ನೆಮ್ತಾ