ಕಾಷ್ಟ್ ಕಿತ್ಯಾಕ್....................

ಸೊಬಿತ್ ಹೊ ಸಂಸಾರ್ ರಚ್ಲೊ ದೇವಾನ್
ಭರುನ್ ಭುಂಯ್ ಫುಲ್-ಜಡಂಚ ಸೊಭಯೆನ್
ತಾರಂಕ್ ನೆಸ್ಲೆಂ ಮೊಳ್ಭರ್ ದೀಂವ್ಕ್ ಉಜ್ವಾಡ್
ಸುರ್ಯಾಕ್ ದಾಡ್ಲೆಂ ದಿಸಾಕ್ ಭರುಂಕ್ ಉಲ್ಲಾಸ್

ಖಾಲಿ ದಿಸ್ಲೆಂ ಭುಂಯ್ ಮನಿಸ್ ನಸ್ತನಾ
ಪೊಳೆಂವ್ಕ್ ನಾಂತ್ ದೊಳೆ ಭುಂಯ್ ನೆಸ್ತನಾ
ಚಿಂತುಕ್ ಲಾಗ್ಲೊ ರಶ್ಚಕ್ ಮನ್ಶ-ಸಂಯ್ಬಾಕ್
ರಾಜ್ ಕರುಂಕ್ ನೆಮ್ಲೊ ಆದಾಂವ್-ಏವೆಕ್

ವಾಂಟುನ್ ದಿಲೊ ಧರಾಳನ್ ಮೋಗ್-ಮೈಪಾಸ್
ರಜ್ವಾಟ್ ಕರುಂಕ್ ಭೂಂಯ್ಚೇರ್ ವ್ಹಡ್ ಆವ್ಕಾಸ್
ಮೊನ್ಶಕೂಳ್ ವಾಡ್ಚಕ್ ಕಾಯ್ನ್-ಆಬೆಲ್
ಜತಾನ್ ಕರುಂಕ್ ರಕ್ವಲಿ ಭೊಡ್ವೊ ಆಂಜೆಲ್

ದೀಸ್ ಗೆಲೆ ಸ್ತುತಿ ಕರ್ಚಂತ್ ಸೊಮ್ಯಾ ದೇವಾಕ್
ಈಷ್ಟ್ ಜಾಲೊ ಸೈತಾನ್ ಮೊನ್ಶಾಕ್ ನಾಡ್ಚಾಕ್
ಮೊನಿಸ್ ಪಾತ್ಕಾಂ ಕರಿಲಾಗ್ಲೊ ದೇವಾ ವಿರೊದ್
ಆಬೆಲಾಕ್ ಮಾರ್ನ್ ಕಾಯ್ನಾನ್ ಕೆಲೊ ವ್ಹಡ್ ಆಪ್ರಾದ್

ಪಾತ್ಕಿ ಮೊನಿಸ್ ವಿರೊದ್ ರವ್ಲೊ ಆಪ್ಲ್ಯಾ ರಚ್ನಾರಾಕ್
ಪಾತಕ್ ಸೊಡ್ಲೆಂ ಸಂಸಾರಾಕ್ ನಾಸ್ ಕರ್ಚಾಕ್
ರಾಕೊನ್ ವೊರುಂಕ್ ಉಲೊ ದಿಲೊ ಪಾತ್ಕಿ ಮನ್ಶನ್
ಕಾಷ್ಟ್ ಕಾಡ್ನ್ ಜಿಯೆಂವ್ಕ್ ಸಾಂಗ್ಲೆಂ ಸೊಮ್ಯಾ-ದೆವಾನ್