ಪಾವ್ಸ್...ಶಿರಂಧರಿಚೊ ಪಾವ್ಸ್

ಅಕಾಸ ತಾವ್ನ್ ಭುಂಯ್ಕ್ ತೆಂಬ್ಯಾನಿಂ ತುಂ ಪಡ್ತಾಯ್
ದೆವಾಚೆಂ ಬೆಸಾಂವ್ ಮನ್ಶಾಂಕ್ ಪಾವಯ್ತಾಯ್
ಮೊಡಾನಿಂ ತುಂ ಲಿಪೊನ್ ವಾರ್ಯಾರ್ ಉಬ್ತಾಯ್
ಆಕಾಸ್ ಅನಿ ಭುಂಯ್ಚೊ ಏಕ್ವಾಟ್ ಕರ್ತಾಯ್

ಭುಂಯ್ಚಾ ಜಿನ್ಸಾಂಕ್ ಜೀವ್ ತುಂ ದಿತಾಯ್
ಗಾಂವ್ಚಾ ರೈತಾಂಕ್ ಆಧಾರ್ ತುಂ ಜಾತಾಯ್
ಸುಕಲ್ಲ್ಯಾ ಭುಂಯ್ಕ್ ತಂಡ್ ತುಂ ಕರ್ತಾಯ್
ನಂಯೊ-ವಾಳಾನಿಂ ಭರುನ್ ತುಂ ವಾಳ್ತಾಯ್

ಗುಡೆ ದೊಂಗೊರ್ ಸೊಭಾಯೆನ್ ಭರ್ತಾಯ್
ರೂಕ್ ಜಡಾಂಕ್ ಪಾಚ್ವೊ ರಂಗ್ ಹಾಡ್ತಾಯ್
ಫಳಾಂಚ ರುಕಾಂಕ್ ಪಿಂಪ್ರ್ಯಾನಿಂ ಸೊಭಯ್ತಾಯ್
ಪುಲಾಂಚ ಜಡಾಂಕ್ ಸೊಭಾಯೆನ್ ನೆಟೆಯ್ತಾಯ್

ಚಿಂತುಕ್ ಸಕ್ಚೊ ನಾಂ ತುಜೆವೀಣ್ ಜೀವಿತ್
ವರ್ಣುಂಕ್ ಅಸಾಧ್ಯ್ ತುವೆಂ ದೆವೊನ್ ಯೆಂವ್ಚಿ ರೀತ್
ಶಿರಂಧಾರಿನ್ ವೊತ್ಲ್ಯಾರ್ ಮನಿಸ್ ದುರ್ಸಾತ್
ರಾಗರ್ ತುಂ ರಾವ್ಲ್ಯಾರ್ ಪಾಡ್ ಮ್ಹಜಿ ಗಾತ್

ಬೊರ್ಯಾಂಕ್ ಅನಿ ಖೊಟ್ಯಾಂಕ್ ಭೇದ್ ನಾಸ್ತಾಂ ಪಾವ್ತಾಯ್
ಪ್ರತಿಫಳಾಚಿ ಅಪೇಕ್ಶ ಕರಿನಾಸ್ತಾಂ ಚಲ್ತಾಯ್
ಲ್ಹಾನಾಂ-ವೊಡಾಂಚಿ ಮೊನಾ ದಾದೊಸ್ ತುಂ ಕರ್ತಾಯ್
ಪರ್ತುನ್ ಯೆಂವ್ಚಿ ಭಾಸ್ ತುಂ ದಿತಾಯ್