ಮೊಗಾನ್ ಜಿಯೆಂವ್ಯಾಂ....

ರಾಗ್ ಕಿತ್ಯಾಕ್ ಭಾವಾ ಅಮಿಂ ಮೊಗಾನ್ ಜಿಯೆಂವ್ಯಾಂ
ದೆವಾನ್ ದಿಲ್ಲ್ಯಾ ಚಾರ್ ದಿಸಾನಿಂ ಹಾಸೊನ್ ಕೆಳುಂಯಾಂ
ಸಂಸಾರಾಕ್ ದಾಡ್ಲೆಲ್ಯಾಕ್ ಮಾನ್ ಕರುಂಯಾಂ
ಅಪ್ಲ್ಯಾ ಪೆಲ್ಯಾ ಥೈಂ ತಾಚೊ ಮೋಗ್ ಸೊದ್ಯಾಂ

ಮೋಗಾ ಜಿವಿತ್ ಜಿಯೆಲ್ಯಾರ್ ತುಂ ಕಾಳ್ಜಾಂ ಜಿಕ್ತಾಲೊಯ್
ಮೋಗಾ ವಿಣೆ ಜಿಯೆಲ್ಯಾರ್ ದುಸ್ರ್ಯಾಂಚಿಂ ಚುಕಿ ಸೊದ್ತಾಲೊಯ್
ಬೊಗ್ಸುನ್ ತುಂ ಜಿಯೆಲ್ಯಾರ್ ದಾದೊಸ್ಕಾಯ್ ಪಾಯ್ತಾಲೊಯ್
ಬೊಗ್ಸಾಣೆಂ ವೀಣ್ ಜಿಯೆಲ್ಯಾರ್ ತುಂ ಪಿಡೆಸ್ತ್ ಜಾತಲೊಯ್

ವಾಂಟುನ್ ಘೆಂವ್ನ್ ಜಿಯೆಲ್ಯಾರ್ ತುಂ ದೊಡ್ತೆಂ ಘೆತಾಲೊಯ್
ಪುಂಜಾವ್ನ್ ದವರ್ನ್ ಸ್ವಾರ್ಥಿ ಜಾಲ್ಯಾರ್ ನಾಸ್ ಜಾತಲೋಯ್
ಅಪ್ಲ್ಯಾ ಪೆಲ್ಯಾಂಕ್ ಗೌರವ್ ದಿಲ್ಯಾರ್ ಮಾನ್ ಜೊಡ್ತಾಲೊಯ್
ದುಬ್ಳ್ಯಾ-ದಾಕ್ಟ್ಯಾಂಕ್ ದಿಕ್ಕಾರ್ ಕೆಲ್ಯಾರ್ ಕಾಷ್ಟ್ ಸೊಸ್ತಾಲೊಯ್

ಆವೈ-ಬಾಪಯ್ಕ್ ಮಾನ್ ದಿಲ್ಯಾರ್ ಆವ್ಕ್ ಪಾಯ್ತಾಲೊಯ್
ತಾಂಚೆ ಮೋನ್ ದುಕೈಲ್ಯಾರ್ ತುಂ ಶಿರಾಪಿತ್ ಜಾತಲೊಯ್
ಭುರ್ಗ್ಯಾಂಕ್ ತುಜ್ಯಾ ದೆಕಿನ್ ವಾಡಯ್ಲ್ಯಾರ್ ನಾಂವ್ ಜೊಡ್ತಾಲೊಯ್
ನಿರ್ಲಕ್ಶ ಕಾರ್ನ್ ಸಾಂಡುನ್ ಗಾಲ್ಯಾರ್ ಅನಾಥ್ ಜಾತಲೊಯ್

ಮಾಗ್ಣ್ಯಾ ಜಿವಿತ್ ಜಿಯೆಲ್ಯಾರ್ ತುಂ ಬೆಸಾಂವ್ ಜೊಡ್ತಾಲೊಯ್
ಮೀಸ್-ಮಾಗ್ಣೆಂ ದಿಕ್ಕಾರ್ ಕೆಲ್ಯಾರ್ ಯೆಂಮ್ಕೊಂಡ್ ಪಾಯ್ತಾಲೊಯ್
ನಿಜಾ ದೆವಾಕ್ ಮಾನ್ ಕೆಲ್ಯಾರ್ ಸರ್ಗ್ ಅಪ್ಣಾಯ್ತಾಲೊಯ್
ತಾಚೆ ಥಾವ್ನ್ ಪಾಯ್ಸ್ ಸರ್ಲ್ಯಾರ್ ಪಾತ್ಕಿ ಜಾತಲೊಯ್