ಆಡ್ಲಿನಾಂ...ಕಿತ್ಯಾಕ್ ಆಶೆಂ ಬದಲ್ಲೆಂಯ್.

ಆಡ್ಲಿನಾಂ..ಆಡ್ಲಿನಾಂ... ಕಿತ್ಯಾಕ್ ತುಕಾ ಉಲೊಂವ್ಕ್ ಪುಟ್ವಾನಾಂ
ದಾಕ್ಟೆಂ ತುಂ ಅಸ್ತಾನಾಂ ಗಾಲ್ತಾಲೆಂಯ್ ಗೊ ಉಡ್ಕಾಣಾಂ
ಅದಿಂ ಅಸ್‍ಲ್ಲಿ ಚಾಲ್-ಚಮ್ಕಾಣ್ ಕಿತ್ಯಾಕ್ ಆಜ್ ದಿಸಾನಾಂ
ವೆಳಾ ಕಾಳಾ ಸವೆಂ ತುಂ ಇತ್ಲೆಂ ಬದಲ್ತಾಲೆಂಯ್ ಹಾಂವೆ ಚಿಂತ್ಲೆನಾಂ !

ಸೊಬ್ತಾಲೆಂಯ್ ತುಂ ಅಂಜಾಪರಿ ಅವಯ್ಚಾ ಉಸ್ಕ್ಯಾರ್ ಖೆಳ್ತಾನಾಂ
ಕಾಳ್ಜಾಕ್ ಅಮ್ಚಾಂ ಸಂತೊಸ್ ದಿಲೊಯ್ ಪಯ್ಲಿಂ ಮೆಟಾಂ ಗಾಲ್ತಾನಾಂ
ತುಕಾ ಪಳೆಂವ್ಕ್ ಸೆಜಾರಿಂ ಜಮ್ತಾಲಿಂ ಅಂಗ್ಣಾಂತ್ ತುಂ ದಂವ್ತಾನಾಂ
ಘರ್ಚಾಂಕ್ ತುಜಾ ದುಕ್ತಾಲೆಂ ತುಂ ಪಡೊನ್-ಉಟೊನ್ ರಡ್ತಾನಾಂ

ದೆವಾಸ್ಪೊಣ್ ಉಟೊನ್ ದಿಸ್ತಾಲೆಂ ಇಗರ್ಜೆಕ್ ಮೆಟಾಂ ಗಾಲ್ತಾನಾಂ
ಭಕ್ತಿಪಣಾಂತ್ ತುಂ ಸೊಭ್ತಾಲೆಂಯ್ ಮಾತ್ಯಾರ್ ವೇಲ್ ಗಾಲ್ನ್ ಚಲ್ತಾನಾಂ
ವಿಧೆಯ್ ಪಣ್ ತುವೆಂ ದಾಕಯ್ಲೆಂಯ್ ವ್ಹಡಿಲಾಂಕ್ ಮಾನ್ ದಿತಾನಾಂ
ಖಾಲ್ತೆಪಣಾಂತ್ ತುಂ ಜಿಕ್ಲೆಂಯ್ ಅಸ್ಕತ್ಯಾಂಕ್ ತುಂ ಪಾವ್ತಾನಾಂ

ಬದಲ್ಲೆಂಯ್ ತುಂ ತುಜೆ ಭಿತರ್ ವಾಡೊನ್ ತುಂ ಯೆತಾನಾಂ
ಸೈರಿಂ-ದೈರಿಂ ತುಕಾ ನಾಕ ಜಾಲಿಂ ಇಷ್ಟ್ ತುಕಾ ಬೆಟ್ತಾನಾಂ
ಸೆಜಾರ್ಯಾಂಚೊ  ತುಕಾ ವಿಸರ್ ಪಡ್ಲೊ ಕಾಲೆಜಿಕ್ ತುಂ ಪಾವ್ತಾನಾಂ
ಗಾಂವ್ಚಾಂ ಲೊಕಾಂಕ್ ವಿಸ್ರೊನ್ ಸೊಡ್ಲೆಂಯ್ ಡಿಗ್ರಿ ಹಾತಾಕ್ ಮೆಳ್ತಾನಾಂ

ಆವೈ-ಬಾಪಾಯ್ಕ್ ಪೊಯ್ಸ್ ಕೆಲೆಂಯ್ ಕಾಜಾರಿ ಜಿವಿತಾಕ್ ರಿಗ್ತಾನಾಂ
ಮಾಂಯ್ ಭಾಸ್ ತುಕಾ ನಾಕಜಾಲಿ ಪರ್ಗವಾಂತ್ ತುಂ ಘೊಳ್ತಾನಾಂ
ಭಾವ್-ಭಯ್ಣಿಂಚೊ ವಿಸರ್ ಪಡ್ಲೊ ಮೊಟೆ ಪೊಯ್ಶೆ ಮೆಳ್ತಾನಾಂ
ಮೀಸ್ ನೊವೆನಾಂ ಪಯ್ಸ್ ಕೆಲೆಂಯ್ ಸುಖಾಚೆಂ ಜಿವಿತ್ ಚಲ್ತಾನಾಂ

ವಿಸ್ರನಾಕ ಕುಡಿಚಿ ಸೊಭಾಯ್ ಶಾಶ್ವಾತ್ ತಿ ಉರ್ಚಿನಾಂ
ಪುಂಜಾಯಿಲ್ಲೊ ದುಡು-ಬಂಗಾರ್ ಮೊರ್ತಾನಾಂ ವೊರುಂಕ್ ಜಾಂವ್ಚೆ ನಾಂ
ಹೊಗ್ಡಾಯಿಲ್ಲೊ ಮಾನ್ ಅಪ್ಣಾಂವ್ಕ್ ಗ್ರೆಸ್ತ್ ಕಾಯೆಕ್ ಜಾಂವ್ಚೆಂ ನಾಂ
ವ್ಹಡ್ಪಾಣ್ ಅಪ್ಣಾವ್ನ್ ಎಕ್ಸುರೆಂ ಜಾಲ್ಯಾರ್ ಉಲೊಂವ್ಕ್ ಕೊಣ್ಣಿ ಮೆಳ್ಚೆನಾಂ