ಅಶೆಂಯ್ ಕಿತ್ಯಾಕ್ ಜಿಯೆಂವ್ಚೆಂ...

ಕಿತ್ಯಾಕ್ ಮನ್ಶಾ ತುಂ ಇತ್ಲೋಯ್ ಉಡ್ತಾಯ್
ಖೊಟ್ಯಾ ದ್ರಶ್ಟೆನ್ ತುಂ ಸಂಸಾರ್ ತುಕ್ತಾಯ್
ಕಾಡ್ನ್ ಉಡೊಂವ್ಕ್ ಶಿಕ್ ಕಾಳ್ಜಾಂತ್ಲಿ ಕುಸಡಾಯ್
ಉಲೊಂವ್ದಿ ದುಸ್ರೆ ತುಜ್ಯಾ ವಿಶಿಂ ಬಡಾಯ್

ಜಿವಿತಾಚೆ ಚಾರ್ ದೀಸ್ ಕಿತ್ಯಾಕ್ ಕೊಡು ಕರ್ತಾಯ್
ದುಸ್ರ್ಯಾಂಚೊ ಖುರಿಸ್ ವಾವೊಂವ್ಕ್ ಕಿತ್ಯಾಕ್ ದರ್ವಾಡ್ತಾಯ್
ತುಜ್ಯಾ ದೊಳ್ಯಾಂತ್ಲೆಂ ಕಿಸರ್ ಕಾಡುಂಕ್ ತುಂ ವಿಸ್ರತಾಯ್
ತುಜ್ಯಾ ಕಾಳ್ಜಾಕ್ ಶೆಳೊ ಮಾಂಡ್ಲಾ ತೆಂ ತುಂ ವಿಸ್ರಲಾಯ್

ಕಾಳ್ಜಾಂತ್ ಖೊಟೆಂ ದವಾರ್ನ್ ಉಗ್ತ್ಯಾನ್ ಹಸ್ತಾಯ್
ಸಮಾಜೆಂತ್ ನಾಂವ್ ಜೊಡುಂಕ್ ಕರ್ಬಾರಂ ಕರ್ತಾಯ್
ಸಂಸಾರ್ ಬದ್ಲಲಾ ಮ್ಹಣ್ ಖೊಟ್ಯಾಂ ಪಾಟ್ಲ್ಯಾನ್ ದಂವ್ತಾಯ್
ಸತಕ್ ಸಾಕ್ಸ್ ದಿಂವ್ಚಾ ಬದ್ಲಾಕ್ ಉಲ್ಟೆಂ ಉಲಯ್ತಾಯ್

ಉಲೊಂವ್ಚಾ ಉತ್ರಾನಿಂ ಸಾಂತಿಪಣ್ ದಾಕಯ್ತಾಯ್
ಕರ್ಣಿ ಕರುಂಕ್ ಪಡ್ತಾನಾಂ ತೊಂಡ್ ತುಜೆಂ ಲಿಪಯ್ತಾಯ್
ಸಮಾಜೆಚ್ಯೊ ರುಲಿ-ರೆಗ್ರ್ಯೊ ವ್ಹಡ್ಲ್ಯಾನ್ ಗಾಜಾಯ್ತಾಯ್
ಅಪ್ಣಾಚ ಅದಾಯಕ್ ಕಾಯ್ದೊ ದಂಟೊನ್ ಚಲ್ತಾಯ್

ಸತ್ ಉಸಾರ್ಚಾ ಜಿಬೇಕ್ ಕೊಡು ಉತ್ರಾಂಚಿ ರೂಚ್ ದಿಲ್ಯಾಯ್
ಭಿರ್ಮೊತ್ ಪಾಂವ್ಚಾ ಕಾಳ್ಜಾಕ್ ಪತ್ರಾ ಬರಿ ಘಟ್ ಕೆಲಾಂಯ್
ಬರೆಂ ದೆಕ್ಚಾ ದೊಳ್ಯಾಂಕ್ ಅಂದ್ಕಾರಚೊ ಪಾಟೊ ಬಂದ್ಲಾಯ್
ದೆವಾನ್ ದಿಲ್ಲ್ಯಾ ಕುಡಿಕ್ ಪಿಡೆ-ಶಿಡೆಚೆಂ ತಾಣ್ ಕೆಲಾಂಯ್