ಸರ್ಗಚೆಂ ದರ್ಶನ್.....

ಏಕ್ ದೀಸ್ ಹಾಂವ್ ಮರಣ್ ಪಾವುನ್ ಸರ್ಗಾಕ್ ಪಾವ್ಲೊಂ
ವಾಟೆರ್ ಮಾಕಾ ಸ್ವಾಗತ್ ಕರುಂಕ್ ಪೆದ್ರು ರಾವುಲ್ಲೊ
ಆಂಜ್ ಭಡ್ವಾನಿಂ ತುತ್ತೂರಿ ಪುಂಕುನ್ ಎವ್ಕಾರ್ ಕೆಲೊ
ದೆಕ್ಲೆಂ ಹಾಂವೆಂ ಸಿಂಹಾಸಣಾರ್ ದೇವ್ ಬಸುಲ್ಲೊ

ಬೂಕ್ ಥಂಯ್ಸರ್ ಉಗ್ತೊ ಕೆಲೊ, ಬೊರೆಂ ವಾಯ್ಟ್ ವಾಚುಂಕ್ ಲಾಯ್ಲೊ
ಬೊರಿಂ ಕರ್ನಿ ಕೆಲ್ಲ್ಯಾ ಖಾತಿರ್ ಸಾಂತ್-ಭಕ್ತಾನಿಂ ಶಭಾಸ್ಕಿ ದಿಲೊ
ಖೊಟ್ಯಾ ಘಡಿತಾಂಕ್ ಶಿಕ್ಶಾ ಜಾವ್ನ್ ದೆವಾ ಥಾವ್ನ್ ಪ್ರಾಚಿತ್ ಮೆಳ್ಳೊ
ಪಾತ್ಕಾಂ ಮಜಿಂ ನಿತಾಳ್ ಜಾತಾಚ್ ಆಂಜಾ ಸವೆಂ ಜಿಯೆಂವ್ಕ್ ದಿಲೊ

ಸೈತಾನಾಕ್ ಥೈಂ ಇಡೆಂ ನಾಂ, ಭಡ್ವೆ ಗಾಯ್ತಾತ್ ಗಾಯಾನಾಂ
ಮಾಗ್ಣೆ ರಜಾರಕ್ ಬಸ್ಲ್ಯಾರ್ ಪುರೊ ಜಾತ ಮ್ಹಳ್ಳೆಂ ಸವಾಲ್ ನಾಂ
ಬಂಗಾರ್ ಸಿಂಗಾರಚಿ ಗಾರ್ಜ್ ನಾಂ, ಕುಡಿಚ ಸೊಭಾಯೆಕ್ ಥೈಂ ಅವ್ಕಾಸ್ ನಾಂ
ದೆವಾಚ ಘರ ಜಿಯೆತಾನಾಂ ಪಾತ್ಕಾಂತ್ ಪಡ್ತಾಂ ಮ್ಹಳ್ಳೆಂ ಭೆಂ ನಾಂ

ಭುರ್ಗಿಂ ಥೈಂ ರಾಡಾನಾಂತ್, ವ್ಹಡಾಂಕ್ ಥೈಂ ಕಾಷ್ಟ್ ನಾಂತ್
ಪೊಣ್ಕುಲ್ಯಾಚೆ ಮಾರೊಗ್ ನಾಂತ್, ಬಸ್ಸಾಂ-ಕಾರಾಂ ದವಾನಾಂತ್
ಚೋರ್ ಲುಟ್ಕಾರ್ ದಿಸನಾಂತ್, ವಸುಲೇಕ್ ಪೊಲಿಸ್ ರವಾನಾಂತ್
ಬಾಯ್ಲ್-ಭುರ್ಗಿಂ ದೊಸಿನಾಂತ್, ರಿಣ್ಕಾರಾಚೆ ಉಪಾದ್ರ್ ನಾಂತ್

ಭುಂಯ್ ಖಾತಿರ್ ಝಗ್ಡೆಂ ನಾಂ, ಕೋರ್ಟ್-ಕಛೆರಿಕ್ ದಾವೊಂಕ್ ನಾಂ
ಕಾಜಾರ್ ಜಾಂವ್ಚಿಂ ವೊಡ್ಣಿಂ ನಾಂ, ದುಬ್ಳೊ-ದಕ್ಟೊ ಮ್ಹಳ್ಳೊ ಭೇದ್ ನಾಂ
ಕಾಮ್ ನಾಂ ಮ್ಹಳ್ಳಿ ಖಂತ್ ನಾಂ, ಪೊಯ್ಶೆ ಪುಂಜಾಂವ್ಕ್ ಅವ್ಕಾಸ್ ನಾಂ
ಲೈಪ್ ಇನ್ಸುರೆನ್ಸಾಕ್ ಮೋಲ್ ನಾಂ, ಮರ್ತಾಂ ಮ್ಹಳ್ಳೆಂ ಭೆಂ ನಾಂ.

ಚಿಂತ್ಲೆಂ !....ದೆವಾನ್ ಕಿತ್ಯಾಕ್ ದಾಡ್‍ಲ್ಲೆಂ ತ್ಯಾ ಸಂಸಾರಾಕ್
ಬೊರೆಂ-ವಾಯ್ಟ್ ವಾಚ್ತಾನಾಂ ಕಳ್ಳೆಂ !....ಮ್ಹಜಾ ಪರಿಕ್ಶೆಕ್
ವಿಸ್ರನಾಕ ಹರ್ಯೆಕ್ಲ್ಯಾಕ್ ಮೆಳ್ತಾಲೆಂ ಹೆಂ ಭಾಗ್ ಏಕ್ ದೀಸ್
ತೂಂಯಿ ಪಳೆಂವ್ಕ್ ಅಶೆತಾಯ್ ತಾರ್ ಖಾಲ್ ಜಾ ತುಜ್ಯಾ ದೆವಾಕ್.