ಮೊಯ್ಜೆಚೆಂ ಜನಾನ್....

ಜುಜೆಚ ಮರ್ಣಾ ಉಪ್ರಾಂತ್ ತಾಕ ಒಳ್ಕನಾತ್‍ಲ್ಲೊ ಏಕ್ಲೊ ರಾಯ್ ಜಾಲೊ
ಬಲಿಷ್ಟ್ ಜಾವ್ನ್ ವಾಡೊನ್ ಯೆಂವ್ಚಾ ಇಸ್ರಾಯೆಲಿತಾಂ ವಿಶಿಂ ಚಿಂತುಕ್ ಲಾಗ್ಲೊ
ವಾಡೊನ್ ಯೆಂವ್ಚಾ ಸಂತತೆಕ್ ನಾಸ್ ಕರುಂಕ್ ತಾಣೆ ಉಪಾಯ್ ಕೆಲೊ
ಅತೀ ಕಷ್ಟಾಚಿಂ ಕಾಮಾಂ ತಾಂಕ ದೀವ್ನ್ ತಾಣೆಂ ತಾಂಕ ಗುಲಾಮ್ ಕೆಲೊ

ಏಜಿಪ್ತಾಂತ್ ಇಸ್ರಾಯೆಲಿತಾಂಚೊ ಸಂಖೊ ವಾಡೊನ್‍ಂಚ್ ಅಸ್‍ಲ್ಲೊ
ರಾಯಾನ್ ದೋಗ್ ಹೆಬ್ರೆವ್ ವಯ್ಜಿಣಿಂಕ್ ಅಪ್ಲ್ಯಾ ಕಾಮಾಕ್ ನೆಮ್ಲೊ
ಹೆಬ್ರೆವಾಂಕ್ ಜಲ್ಮೊಂಚ ಚೆರ್ಕ್ಯಾ ಭುರ್ಗ್ಯಾಂಕ್ ಜಿವೆಶಿಂ ಮಾರುಂಕ್ ಸಂಗ್ಲೊ
ದೇವಾಚ ಭಿಯಾನ್ ವಯ್ಜಿಣಿಂನಿ ಚೆರ್ಕ್ಯಾ ಭುರ್ಗ್ಯಾಂಕ್ ವಾಂಸುಂಕ್ ಚಡ್ಲೊ

ರಾಯ್ ಖಂತಿಷ್ಟ್ ಜಾಲೊ ದುಸ್ರೊ ಉಪಾಯ್ ಸೊದುಂಕ್ ಲಾಗ್ಲೊ
ಹೆಬ್ರೆವಾಂಚ ಚೆರ್ಕ್ಯಾ ಭುರ್ಗ್ಯಾಂಕ್ ನ್ಹಂಯ್ತ್ ಉಡೊಂವ್ಕ್ ಪರ್ಮಾಣ್ ಕೆಲೊ
ಇಸ್ರಾಯೆಲಿತಾಂಚ ಕಷ್ಟಾಂಚ ವೆಳಾರ್ ದೇವ್ ತಾಂಚೆ ಸವೆಂ ಆಸ್ಲೊ
ಹ್ಯಾಚ್ ಕಾಳಾರ್ ದೇವಾನ್ ವಿಂಚ್ಲೆಲ್ಯಾ ಮೊಯ್ಜೆನ್ ಜಾಲ್ಮ್ ಘೆತ್ಲೊ

ಲೆವಿಚ ಕುಳಿಯೆಚ ಆವಯ್-ಬಾಪಯ್ಕ್ ಮೊಯ್ಜೆ ಪೂತ್ ಜಾವ್ನ್ ಜಲ್ಮಾಲೊ
ಅಪ್ಲ್ಯಾ ಸುಂದರ್ ಬಾಳಾಕ್ ತೀನ್ ಮಹಿನೆ ಅವಯ್ನ್ ರಾಯಾ ಥಾವ್ನ್ ಲಿಪಯ್ಲೊ
ಉಪ್ರಾಂತ್ ಬೆತಾಂಚೊ ಪೆಟಾರೊ ಕಾರ್ನ್ ನೀಲ್ ನ್ಹಂಯ್ತ್ ವಾಳೊನ್ ಸೊಡ್ಲೊ
ಮೊಯ್ಜೆಚಿ ಜತಾನ್ ಘೆಂವ್ಕ್ ತಾಚಾಚ್ ಭಯ್ಣಿಕ್ ತಿಣೆಂ ನೆಮ್ಲೊ

ನ್ಹಂಯ್ತ್ ನಾಂವ್ಕ್ ಅಯಿಲ್ಲ್ಯಾ ಪಾರಾವ್ಯಾಚ ಧುವೆನ್ ಪೆಟಾರೊ ಪಳೆಲೊ
ಪೆಟಾರಾಂತ್ಲ್ಯಾ ಚೆರ್ಕ್ಯಾ ಭುರ್ಗ್ಯಾಂಕ್ ಪಳೆವ್ನ್ ತಿಚೊ ಸಂತೊಸ್ ದೊಡ್ತೊ ಜಾಲೊ
ಭುರ್ಗ್ಯಾಚಿ ಜತಾನ್ ಘೆಂವ್ಕ್ ಏಕ್ ಹೆಬ್ರೆವ್ ಸ್ತ್ರೀಯೆಕ್ ಸೊದುಂಕ್ ಸಾಂಗ್ಲೊ
ದೇವಾಚ ನಿರ್ಮೊಣ್ಯಾ ಪರ್ಮಾಣೆ ಮೊಯ್ಜೆ ಅಪ್ಲ್ಯಾ ಅವಯ್ ಸಂಗಿ ವಾಡ್ಲೊ

ಮೊಯ್ಜೆ ವ್ಹಡ್ ಜಾತಚ್ ತಾಚ ಅವಯ್ನ್ ತಾಕ ಫಾರಾವ್ಯಾಚ ಧುವೆಕ್ ಒಪ್ಸಿಲೊ
ಫಾರಾವ್ಯಾಚ ಧುವೆನ್ ಮೊಯ್ಜೆಕ್ ಅಪ್ಲ್ಯಾಚ್ ಸ್ವಂತ್ ಪುತ ಬರಿ ಪೊಸ್ಲೊ
ಏಜಿಪ್ತಾಚ ರಾವ್ಳೆರಾಂತ್ ಮೊಯ್ಜೆ ಏಕ್ ಬಲಿಷ್ಟ್ ಸಾಂದೊ ಜಾವ್ನ್ ವಾಡ್ಲೊ
ಉದ್ಕಾ ಥಾವ್ನ್ ವಾಯ್ರ್ ಕಾಡ್ಲ್ಯಾ ವರ್ವಿಂ ತಾಕ "ಮೊಯ್ಜೆ" ಮ್ಹಣ್ ಅಪಯ್ಲೊ