ಪೊಂಡಾರ್ ಕಿತ್ಯಾಕ್ ವಾತಿ ಜಳ್ತಾತ್!

ಗರ್ಜ್ ಅಸ್‍ಲ್ಲಿ ತ್ಯಾ ವಾತ್ಯೆಚಿ
ತಿಚೆ ಹಾತ್ ಪಾಂಯ್ ಕಾಂಪುನ್
ಕಾಪೊಡ್ ನೆಸ್ತಾನಾಂ ಪಾಲೊವ್ ಪೆಂಕ್ಡಾಕ್ ಚೆಪುಂಕ್
ಪೂಣ್ ತವಳ್ ತೆ ಜಳ್ಳೆನಾಂತ್!

ಗರ್ಜ್ ಅಸ್‍ಲ್ಲಿ ತ್ಯಾ ವಾತ್ಯೆಚಿ
ತಿ ಪಿಡೆರ್ ಪಡೊನ್ ತಾಪಾನ್ ತಾಪ್ತಾನಾ
ಇಲ್ಲ್ಯಾ ಉದ್ಕಾ ಸವೆಂ ಗುಳಿ ದೀಂವ್ಕ್
ಪೂಣ್ ತವಳ್ ತೆ ಜಳ್ಳೆನಾಂತ್!

ಗರ್ಜ್ ಅಸ್‍ಲ್ಲಿ ತ್ಯಾ ವಾತ್ಯೆಚಿ
ಮಾಂವಾಡ್ಯಾ ಸುದಾರ್ಸುಂಕ್ ಜಾಯ್ನಾಸ್ತಾನಾ
ಆಪ್ಲ್ಯಾ ಥಾವ್ನ್ ಹಿನ್ಸೊಣೆಂ ಅಪ್ಣಾಯ್ತಾನಾ
ಪೂಣ್ ತವಳ್ ತೆ ಜಳ್ಳೆನಾಂತ್!

ಗರ್ಜ್ ಅಸ್‍ಲ್ಲಿ ತ್ಯಾ ವಾತ್ಯೆಚಿ
ಅಪ್ಲ್ಯಾ ಪತಿನ್ ಸರ್ಗಾಚಿ ವಾಟ್ ವಿಂಚ್ತಾನಾ
ಅಬ್ಬಾ! ಎಕ್ ಭೊರ್ ದೆವ್ಲೊ ಮ್ಹಣ್ ಗುಣ್ಗುಣ್ತಾನಾ
ಪೂಣ್ ತವಳ್ ತೆ ಜಳ್ಳೆನಾಂತ್!

ಗರ್ಜ್ ಅಸ್‍ಲ್ಲಿ ತ್ಯಾ ವಾತ್ಯೆಚಿ
ಸುನೆನ್ ಆನಿ ಪುತಾನ್ ಏಕ್ ಜಾವ್ನ್
ನಾತ್ರಾಂಕ್ ತಿಚೆ ಥಾವ್ನ್ ಪಯ್ಸ್ ದವರ್ತಾನಾ
ಪೂಣ್ ತವಳ್ ತೆ ಜಳ್ಳೆನಾಂತ್!

ತುಮ್ಕಾಂ ತೆ ಜಳ್ಚೆ ದಿಸ್ತಾತ್, ಪೂಣ್ ತೆ ರಡ್ತಾತ್
ಕೋಣ್ ತರೀ ಸಮ್ಜಯಾ ತಾಂಕಾ
ತೆ ಏಕ್ ದೀಸ್ ತಾಂಚೆ ವಾಯ್ರಿ ಸೊಬ್ತೆಲೆ
ಜರ್ ಜಿಣ್ಯೆಂತ್ ಜಳ್ಳೆನಾಂತ್ ತರ್, ಪರತ್ ರಡ್ತಲೆ.

ಆಧುನಿಕ್ ಮನ್ಶ್ಯಾಚಿಂ ರೂಪಾಂ

ತುಕಾ ಕೊಣೆ ಸಾಂಗ್ಲೆಂ ಅಮ್ಚ್ಯಾ ಬಾಂಯ್ತ್ ಉದಕ್ ನಾ ಮ್ಹಣೊನ್?
ಲಾಗಿಂ ವ್ಹಚ್ ಆನಿ ತೀಳ್ನ್ ಪಳೆ ಏಕ್ ರಕ್ಕೊಸ್ ತಿಳ್ತಾ
ವಿಚಾರ್ನಾಕಾ ’ಹೆಂ ಕಿತೆಂ!’
ಮನ್ಶ್ಯಾಪಣ್ ನಾತ್‍ಲ್ಲ್ಯಾ ಮನ್ಶ್ಯಾಚೆಂ ರೂಪ್ ತೆಂ!

ತುಕಾ ಕೊಣೆ ಸಾಂಗ್ಲೆಂ ಅಮ್ಚ್ಯಾ ನಳಾಂತ್ ಉದಾಕ್ ಯೆನಾ ಮ್ಹಣೊನ್?
ನಳ್ ಉಗ್ತೆಂ ಕರ್ ಆನಿ ಪಳೆ ರಗ್ತಾ ಥೆಂಭೊ ಗಾಳ್ತಾ
ವಿಸಾರ್ನಾಕಾ ’ಹೆಂ ಕಿತೆಂ!’
ಉದ್ಕಾ ಖಾತಿರ್ ಉಪಾಸ್ ದರ್ಲೆಲೆ ಆತ್ಮೆ ತೆ!

ತುಕಾ ಕೊಣೆ ಸಾಂಗ್ಲೆಂ ಅಮ್ಚ್ಯಾ ಗಾದ್ಯಾಂತ್ ಭಾತ್ ಪಿಕಾನಾ ಮ್ಹಣೊನ್?
ಮೆರೆರ್ ರಾವ್ ಆನಿ ಪಳೆ ಭಾತಾ ಕಣ್ಶಿ ಉಬಿ ರಾವೊನ್ ರಡ್ತಾ
ವಿಸಾರ್ನಾಕಾ ’ಹೆಂ ಕಿತೆಂ!’
ಪೊಟಾಕ್ ಮೆಳ್ಚ್ಯಾ ಶಿತಾಕ್ ಖೊಟಾಯಿಲ್ಲೆಂ ಮೋಲ್ ತೆ!

ತುಕಾ ಕೊಣೆ ಸಾಂಗ್ಲೆಂ ಆಮ್ಚೊ ಜಾಗೊ ಪಣ್ಗಿಲ್ ಪಡ್ಲಾ ಮ್ಹಣೊನ್?
ಪಾಂಯ್ ವಾಟೆನ್ ಚಲ್ ಆನಿ ಪಳೆ, ಸಮತಟ್ಟ್ ಜಾಗೊ ಪಯ್ಶೆ ರೆವ್ಡಾವ್ನ್ ಲೊಳ್ತಾ
ವಿಸಾರ್ನಾಕಾ ’ಹೆಂ ಕಿತೆಂ!’
ಘೊಳೊಂಕ್ ಜಾಯ್ನಾತ್ಲ್ಯಾ ಧನಿಯಾಚೆಂ ಆಳ್ಶಿಪಣ್ ತೆಂ!

ತುಕಾ ಕೊಣೆ ಸಾಂಗ್ಲೆಂ ಅಮ್ಚ್ಯೆ ರಾಂದ್ಣಿಂತ್ ಉಜೊ ಪೆಟನಾ ಮ್ಹಣೊನ್?
ಕುಜ್ನಾಕ್ ವಸ್ ಆನಿ ಪಳೆ, ದೋನ್ ದೊಳ್ಯಾಂನಿಂ ಉಜೊ ಜಳ್ತಾ
ವಿಸಾರ್ನಾಕಾ ’ಹೆಂ ಕಿತೆಂ!’
ನೀದ್ ಖಳೊನ್ ರಾಂದ್ಚ್ಯೆ ಚಾಕರ್ನಿಚೆಂ ರುದಾನ್ ತೆಂ!

ತುಕಾ ಕೊಣೆ ಸಾಂಗ್ಲೆಂ ಆಮ್ಚಾ ನಾಡಾಂತ್ ದಿವೊ ಪೆಟಾನಾಂತ್ ಮ್ಹಣೊನ್?
ಪೆಂಟೆಚ್ಯಾ ಸಾಲಾಂತ್ ರೀಗ್ ಆನಿ ಪಳೆ, ಊಬ್ ಉತ್ರಾಂಚೊ ಉಜೊ ತಾಪ್ತಾ
ವಿಸಾರ್ನಾಕಾ ಹೆಂ ’ಕಿತೆಂ!’
ದ್ವೇಶ್, ಮೊಸೊರ್ ಪೆಟ್ಚ್ಯಾ ತೊಂಡಾಂತ್ಲೆಂ ಕಿಟಳ್ ತೆಂ!

ದೆವಾಚಿಂ ವರ್ತಿಂ ಕ್ರತ್ಯಾಂ....

ವರ್ತಿಂ ತುಜಿಂ ಕ್ರತ್ಯಾಂ, ವರ್ಣುಂ ಕಶೆಂ ದೆವಾ
ತುವೆಂ ರಚ್ಲೆಲ್ಯಾ  ಹ್ಯಾ ಸೊಭಿತ್ ಪ್ರಥ್ವೆರ್!
ಉನ್ನತ್ ತುಜಿಂ ಮ್ಹಹಿಮಾ, ದೆಕೊಂಕ್ ಅಶೆತಾಂ
ತುವೆಂ ರಾಜ್ ಕರ್ಚಾ ತ್ಯಾ ಸರ್ಗಾರ್!

ಭುಂಯ್ ತುವೆಂ ರಚ್ಲಿಯ್, ಜಿನ್ಸಾನಿಂ ಭರ್ಲೆಂಯ್
ಅಧಾರ್ ಜಾಂವ್ಕ್ ಪ್ರಥ್ವೆಚ ಜಿವಿಂಕ್
ಅಕಾಸ್ ತುವೆಂ ರಚ್ಲೊಯ್, ಸುರ್ಯಾಕ್ ಸೊಭಯ್ಲೊಯ್
ಉಜ್ವಾಡ್ ಫಾಂಕೊಂವ್ಕ್ ಮನ್ಶಾ ಕುಳಾಕ್

ಉದಾಕ್ ತುವೆಂ ರಚ್ಲೆಂಯ್, ಸಾರ್ ತಾಂತು ಭರ್ಲೊಯ್
ಜಿವಾಳ್ ಕರುಂಕ್ ಭುಂಯ್ಚಾ ಜಿನ್ಸಾಂಕ್
ವಾರ್ಯಾಕ್ ತುವೆಂ ದಾಡ್ಲೆಂಯ್, ಕುರ್ಪೆನ್ ತುಜ್ಯಾ ಭರ್ಲೆಂಯ್
ಜಿವಿತಾಚೊ ಘುಟ್ ಮನ್ಶಾಂಕ್ ಸಮ್ಜೊಂವ್ಕ್

ಮನ್ಶಾಕ್ ತುವೆಂ ರಚ್ಲೊಯ್, ಸ್ವಾಸ್ ತುಜೊ ಪುಂಕ್ಲೊಯ್
ರಾಜ್ವಾಟ್ ಕರುಂಕ್ ಹ್ಯಾ ಭುಂಯ್ ತಳಾರ್
ಪುತಾಕ್ ತುವೆಂ ದಾಡ್ಲೊಯ್, ಅಧಿಕಾರ್ ತಾಕ ದಿಲೊಯ್
ಸರ್ಗಿಂಚೊ ಘುಟ್ ಪರ್ಗಟ್ ಕರುಂಕ್

ಸ್ಪಿರಿತಾಕ್ ತುವೆಂ ದಾಡ್ಲಾಯ್, ಸಾಂಗಾತ್ ತುಜೊ ಬಸಯ್ಲಾಯ್
ಪಾತ್ಕಾ-ಕಾಷ್ಟಾಂತ್ ಸಂಪ್ಡೊನ್ ಚಿರ್ಡತನಾ
ಸರ್ಗಿಂಚಾ ರಾಜಾಂತ್ ಘರ್ ಅಮ್ಕಾಂ ತಯಾರ್ ಕೆಲಾಂಯ್
ಮರ್ಣಾ ದ್ವಾರಿಂ ತುಜೊ ಸಂಗಾತ್ ಆಶೆತಾನಾ

ನಾಮಾನ್ ಕೊಡಾಚ ಪಿಡ್ಲೆಂತ್ಲೆ ಬರೊ ಜಾತ.....

ನಾಮಾನ್ ಅರಾಮಾಚ ರಾಯಾಚೊ ಸೆನಾಧಿಪತಿ ಜಾವ್ನಾಸ್ಲೊ
ಆರಾಮಾಚೊ ರಾಯ್ ತಾಕ ಘನಾನ್ ಆನಿ ಮಾನನ್ ಲೆಕ್ತಾಲೊ
ದೆವಾಚ ಭೆಸಾಂವಾನ್ ಅಪ್ಲ್ಯಾ ಝಗ್ಡ್ಯಾನಿಂ  ತೊ ಜಯ್ತೆವಂತ್ ಜಾತಲೊ
ನಾಮಾನ್ ವೀರ್ ಅಸ್ಲೊ ತರೀ  ಕೊಡಾಚ ಪಿಡೆವರ್ವಿಂ ಕಷ್ಟತಲೊ

ಏಕ್ ಪವ್ಟಿಂ ನಾಮಾನ್ ಇಸ್ರಾಯೆಲ್ ಶಹರಚೇರ್ ಧಾಡ್ ಗಾಲ್ತಾ
ಝಗ್ಡ್ಯಾಂತ್ ಏಕ ಸ್ತ್ರೀಯೆಕ್ ಬಂಧಿವಾನ್ ಕಾರ್ನ್ ಶಹರಾಕ್ ಹಾಡ್ತಾ
ಅಪುಣ್ ಹಾಡ್ಲೆಲ್ಯಾ ಸ್ತ್ರೀಯೆಕ್ ಅಪ್ಲ್ಯಾ ಬಾಯ್ಲೆಚಿ ಚಾಕರ್ನ್ ಜಾವ್ನ್ ನೆಮ್ತಾ
ಚಾಕರ್ನಿ ವರ್ವಿಂ ನಾಮಾನಕ್ ಎಲೀಶಾ ಪ್ರವಾದಿ ವಿಶಿಂ ಕಳೊನ್ ಯೆತಾ

ಅರಾಮಾಚೊ ರಾಯ್ ನಾಮಾನಕ್ ಇಸ್ರಾಯೆಲಾಚ ರಾಯಾಶಿಂ ಧಾಡ್ತಾ
ಏಕ್ ಪತ್ರ್ ಬರೊವ್ನ್ ನಾಮಾನಚೆಂ ಕೋಡ್ ನಿತಳ್ ಕರುಂಕ್ ವಿನಂತಿ ಕರ್ತಾ
ಅಪ್ಣಾಕ್ ಪತ್ರ್ ಬರೊವ್ನ್ ಅವ್ಮರ್ಯಾದ್ ಕೆಲಿ ಮ್ಹಣ್ ರಾಯ್ ರಾಗರ್ ಜಾತ
ಹೆಂ ಕಳೊನ್ ಎಲೀಶಾ ನಾಮಾನಕ್ ಅಪ್ಣಾ ಸರ್ಶಿಂ ಯೇಂವ್ಕ್ ಸಂಗೊನ್ ದಾಡ್ತಾ

ನಾಮಾನ್ ಅಪ್ಲ್ಯಾ ಘೊಡ್ಯಾಂ ಆನಿ ರಥಂ ಸವೆಂ ಎಲೀಶಾಕ್ ಯೆಂವ್ನ್ ಭೆಟ್ತಾ
ಎಲೀಶಾ ನಾಮಾನಕ್ ಜೊರ್ದಾನ್ ನ್ಹಂಯ್ತ್ ಸತ್ ಪವ್ಟಿಂ ನಾಂವ್ಕ್ ಫರ್ಮಾಯ್ತಾ
ನಾಮಾನ್ ಜೊರ್ದಾನ್ ನ್ಹಂಯ್ತ್ ನಾಲ್ಲೆಂಚ್ ಕೊಡಾಚ ಪಿಡೆ ಥಾಂವ್ನ್ ನಿತಳ್ತಾ
ಅಪ್ಣಾಕ್ ಬರೆಂ ಕೆಲ್ಲ್ಯಾ ಇಸ್ರಾಯೆಲಾಚ ದೆವಾಚಿ ಸ್ತುತಿ ಕರುಂಕ್ ನಿಚೆವ್ ಕರ್ತಾ

ಎಲೀಶಾಕ್ ಅಪುಣ್ ಹಾಡ್ಲೆಲೆಂ ಬಂಗಾರ್-ರೂಪೆಂ ಕಾಣಿಕ್ ಜಾವ್ನ್ ಅರ್ಪಿತಾ
ಪೂಣ್ ಎಲೀಶಾ ಹೆಂ ಕಿತೆಂಚ್ ಘೆನಾಸ್ತಾನಾಂ ನಾಮಾನಕ್ ಪಾಟಿಂ ದಿತಾ
ಅಪ್ಣಾಕ್ ಬರೆಂ ಕೆಲ್ಲ್ಯಾ ಗಾಂವ್ಚಿ ಮಾತಿ ಅರಾಮಾಕ್ ವರುಂಕ್ ಪರ್ವಣ್ಗಿ ಮಾಗ್ತಾ
ಅಪ್ಣಾಚ ಮರ್ಣಾಂ ಪರ್ಯಾಂತ್ ಇಸ್ರಾಯೆಲಾಚ ದೆವಾಕ್ ಖಾಲ್ ಜಾವ್ನ್ ಜಿಯೆತಾ

ಪದ್ ಏಕ್ ಲಿಕ್ಲಾಂ....

ಮೊಗಾ ತುಕಾ ಚಿಂತುಂನ್ ಹಾಂವೆ ಪದ್ ಏಕ್ ಲಿಕ್ಲಾಂ
ಯಾದ್ ತುಜೊ ಆಟಾಂವ್ನ್ ಕಾಳಿಜ್ ಮ್ಹಜೆಂ ಪಿಕ್ಲಾಂ
ರಾಗ್ ತುಜೊ ಸಾಂಡುನ್ ರಾವಯ್ ತುಜಿ ನಾಕ್ಲಾಂ
ವೆಂಗೆಂತ್ ಮ್ಹಜ್ಯಾ ಯೇಂವ್ನ್ ಜಿವಾಳ್ ಕರ್-ಗೊ ಸೊಪ್ಣಾಂ

ತುಕಾಚ್ ಚಿಂತುನ್ ಆಜ್ ಫಾಂತೆ ಫಾಲೆಂ ಜಾಲಾಂ
ಮೊಗಾಚಿಂ ಉತ್ರಾಂ ಗುಂತುನ್ ಕಾಳ್ಜಾಕ್ ತಯಾರ್ ಕೆಲಾಂ
ಕಾಳ್ಜಾ ಉಡಿ ಉಚಾರುಂಕ್ ತುಕಾಚ್ ರಾಕೊನ್ ರಾವ್ಲಾಂ
ವಾಟೆನ್ ಮ್ಹಜ್ಯಾ ಚಮ್ಕೊನ್ ನೀಜ್ ಕರ್ ಮ್ಹಜಿಂ ಬೊಗ್ಣಾಂ

ಸುರ್ಯಾಚ ಕಿರ್ಣಾನಿಂ ತುಜ್ಯಾ ವಾಟೆಕ್ ಬೆಸಾಂವ್ ಗಾಲಾಂ
ರಾತಿಕ್ ಪಡ್‍ಲ್ಲೊ ಧೋವ್ ಜಿರನಾಸ್ತಾಂ ರಾಕೊನ್ ರಾವ್ಲಾ
ಫಾಂತ್ಯಾ ಫಾರಾರ್ ಸುಕ್ಣ್ಯಾನಿಂ ಸಂಗೀತ್ ಆರಂಭ್ ಕೆಲಾಂ
ವೊಡ್ತಾಚ್ಯಾ ಪುಲಾನಿಂ ತುಜ್ಯಾ ನಾಂವಾನ್ ಪುಲೊಂವ್ಕ್ ಚಿಂತ್ಲಾಂ

ತುಜ್ಯಾ ಹಸ್ಕುರ್ಯಾ ತೊಂಡಾಂತ್ ಜಿವಿತ್ ಮ್ಹಜೆಂ ಲಿಪ್ಲಾಂ
ತುಜ್ಯಾ ಸುಂದರ್ ದೊಳ್ಯಾನಿಂ ಮೋಗ್ ಹಾಂವೆ ಚಕ್ಲಾ
ತುಜ್ಯಾ ಕಾಳ್ಜಾಚ ಗುಂಡಾಯೆಂತ್ ಮೊಗಾ ಅಂಕ್ರಿ ದೆಕ್ಲ್ಯಾ
ತುಜ್ಯಾ ಕುಡಿಚ ಉಸ್ವಾಸಾಂತ್ ಜಿಯೆಂವ್ಕ್ ಹಾಂವೆಂ ಚಿಂತ್ಲಾಂ

ಸಂಗಾತ್ ದೀ ಕಾಜಾರಿ ಬಾಂದಾತ್ ಅಮಿಂ ಏಕ್ ಜಾಂವ್ಚಾಕ್
ಸುಂದರ್ ಹ್ಯಾ ಸಂಸಾರಾಂತ್ ಕುಟಮ್ ಬಾಂದುನ್ ಹಡ್ಚಾಕ್
ವಾಡ, ಚಡಾ, ಸಂಸಾರ್ ಭರಾ ಬೆಸಾಂವ್ ನೀಜ್ ಕರ್ಚಾಕ್
ಸಂಸಾರಿ ಜಿವಿತಾಚೆ ಪಯ್ಣ್ ದೊಗಾನಿಂ ಸಂಗಾತ ಸರ್ಚಾಕ್

ಸೊಬಾಯ್ - ಮೋಗ್

ಚೆಡೊ
ಸೊಭಿತ್ ಸೊಭಿತ್ ತ್ಯಾ ಪುಗ್ರ್ಯಾ ಪೊಲ್ಯಾನಿಂ
ನಿಳ್ಶಾ ನಿಳ್ಶಾ ತ್ಯಾ ಕಾಜುಳ್ಯಾ ದೊಳ್ಯಾನಿಂ
ಸೊಭಯ್ ತುಜಿ ಲಿಪ್ಲ್ಯಾ ಚೆಡ್ವಾ, ಸೊಭಯ್ ತುಜಿ ಲಿಪ್ಲ್ಯಾ

ಚೆಡುಂ
ಧಡಕ್ ಧಡಕ್ ತ್ಯಾ ಕಾಳ್ಜಾ ಉಡ್ಯೆನಿಂ
ಪುಗಾರ್ನ್ ಉಲೊಂವ್ಚಾ ಲಜೆ ಉತ್ರಾನಿಂ
ಮೋಗ್ ತುಜೊ ಲಿಪ್ಲಾ ಚೆಡ್ಯಾ, ಮೋಗ್ ತುಜೊ ಲಿಪ್ಲಾ

ಚೆಡೊ
ತುವೆಂ ಟಿಕ್ ಟಿಕ್ ಮೆಟಾಂ ಕಾಡುನ್ ಚಲ್ತಾನಾಂ
ತುಜ್ಯಾ ಪಯ್ಜಾಣಾಂಚ ನಾದಕ್ ಜೀವ್ ಮ್ಹಜೊ ಭರುನ್ ಯೆತಾ
ತುವೆಂ ಮಿಣಿ ಮಿಣಿ ದೊಳ್ಯಾಂನಿ ದೆಕ್ತಾನಾಂ
ತುಜ್ಯಾ ನಯನಚ ಉಬೆಕ್ ಕೂಡ್ ಮ್ಹಜಿ ಪುಲೊನ್ ಸೊಬ್ತಾ

ಚೆಡುಂ
ತುವೆಂ ಚೊರ್ಯಾಂ ನದರ್ ಲಾವ್ನ್ ತಿಳ್ತಾನಾಂ
ತುಜ್ಯಾ ದೊಳ್ಯಾಚ ಸಾಗೊರಾಂತ್ ಉಪ್ಯೆಂವ್ಕ್ ರಾಕೊನ್ ರಾವ್ತಾಂ
ತುವೆಂ ಅಮ್ರುಕೊ ಹಾಸೊ ದೀವ್ನ್ ಲಿಪ್ತಾನಾಂ
ತುಜ್ಯಾ  ವದನಾಕ್ ಕಿಸಾನಿಂ ಸಜೊಂವ್ಕ್ ವೇಳ್‍ಘಡಿ ಮೆಜ್ತಾಂ

ಚೆಡೊ
ತುವೆಂ ಮ್ಹಜೆ ಕಾತಿರ್ ಸಜೊವ್ನ್ ರಾವ್ತಾನಾಂ
ತುಜ್ಯಾ ಸೊಭಾಯೆಚ ಕಾಲೆತಿಕ್ ಮ್ಹಕಾಚ್ ಹಾಂವ್ ವಿಸ್ರತಾಂ
ಸಕ್ಕಡ್ ಸಾಂಡುನ್ ಮ್ಹಜೊ ಪಾಟ್ಲಾವ್ ಕರ್ತಾನಾಂ
ಮಕಾಚ್ ಹಾಂವ್ ವಿಸ್ರೊನ್ ತುಜೊ ಜಾಂವ್ಕ್ ತಯಾರ್ ಜಾತಾಂ

ಚೆಡುಂ
ತುವೆಂ ಬಾವ್ಳೆ ಪುಲೊವ್ನ್ ಮುಕಾರ್ ರಾವ್ತಾನಾಂ
ತುಜ್ಯಾ ಪಾಸ್ಳೆಂತ್ ಮಿಲನ್ ಜಾಂವ್ಕ್ ಮನ್ ಮಜೆಂ ಆಶೆತಾ
ಸಕ್ಕಡ್ ಸಾಂಡುನ್ ಮ್ಹಜೊ ಪಾಟ್ಲಾವ್ ಕರ್ತಾನಾಂ
ಮಕಾಚ್ ಹಾಂವ್ ವಿಸ್ರೊನ್ ತುಜಿಂ ಜಾಂವ್ಕ್ ತಯಾರ್ ಜಾತಾಂ

ಚೀಪ್ ಲಿಕ್ಕರು...

ಬೇಳೆ ಕಾಳು ಬೆಯ್ಸಾಕ್ಕೆ
ಕೊಡಿಸ್ರಿ ನಮ್ಗೆ ಕುಕ್ಕಾರು
ಬ್ಯಾಡ್ರಿ ನಮ್ಗೆ ಚೀಪು ಲಿಕ್ಕಾರು

ಮಾನ ಮರ್ವಾದೆ ಮುಚ್ಚಾಕೆ
ಕೊಡಿಸ್ರಿ ನಮ್ಗೆ ನಿಕ್ಕಾರು
ಬ್ಯಾಡ್ರಿ ನಮ್ಗೆ ಚೀಪು ಲಿಕ್ಕಾರು

ಅಕ್ಕಿ-ರಾಗಿ ಬೆಳೊಸ್ಕೊಂಡು
ಅಗ್ಬೇಕು ನಾವು ಪಾರ್ಮಾರು
ಬ್ಯಾಡ್ರಿ ನಮ್ಗೆ ಚೀಪು ಲಿಕ್ಕಾರು

ಶಾಲೆ-ಕಾಲೇಜು ಓದ್ಕೊಂಡು
ಅಗ್ಬೇಕು ನಾವು ಡಾಕ್ಟಾರು
ಬ್ಯಾಡ್ರಿ ನಮ್ಗೆ ಚೀಪು ಲಿಕ್ಕಾರು

ದೇಶ ಕಾಯೊ ಮಕ್ಳಾಗೀ
ಅಗ್ಬೇಕು ನಾವು ಸೊಲ್ಜಾರು
ಬ್ಯಾಡ್ರಿ ನಮ್ಗೆ ಚೀಪು ಲಿಕ್ಕಾರು