ಏಕ್ ಕಾಳ್ ಅಸ್ಲ್ಲೊ ಘರ್ಭರ್ ಭುರ್ಗಿಂ, ಆವಯ್ ಬಾಪಯ್ನ್ ದಾಕ್ಟುಲ್ಯಾಂಕ್ ಪಳೆಂವ್ಚೆಂ ಆನಿ ಉರ್ಲೆಲ್ಯಾಂಚಿ ಜತನ್ ವ್ಹಡಾ ಭುರ್ಗ್ಯಾಂನಿ ಘೆಂವ್ಚಿ. ಹಾಚೊ ಅರ್ಥ್ ಕಿತೆಂಗೀ ಮ್ಹಳ್ಯಾರ್ ಏಕಾ ಘರಾಭಿತರ್ ಸರ್ವಾಂಕ್ ಜೊಕ್ತೆಂ ಶಿಕಪ್ ಮೆಳ್ತಲೆಂ. ಜಾಂವ್ ತೆಂ ಜತನ್ ಘೆಂವ್ಚೆಂ , ವಾ ಸೆವಾ ಕರ್ಚಿ, ಸೊಸ್ಣಿಕಾಯ್ ಆನಿ ಮೋಗ್ ವಾಂಟುನ್ ಘೆಂವ್ಚೊ. ಸವ್ಕಾಸ್ ಕಾಳ್ ಬದ್ಲಾಲೊ ಆರ್ಥಿಕ್ ಪರಿಸ್ಥಿತಿ ಸುಧಾರ್ಲಿ. ಪೂಣ್ ಮನ್ಶಾಚೆ ಶೆಗುಣ್ ಮಾತ್ ವಾರ್ಯಾರ್ ಗೆಲೆ. ಪಾಳ್ತೆಲ್ಯಾಂಕ್ ರೂಲಿ ನಾತ್ಲ್ಲೆ ಪೊಲಿ. ಕಿತ್ಯಾಕ್ ಆಶೆಂ ಮ್ಹಣ್ತಾಗೀಂ ಮ್ಹಳ್ಯಾರ್, ಆವಯ್ ಬಾಪಯ್ನ್ ಅತೀ ಲ್ಹಾನ್ ಭುರ್ಗ್ಯಾಂಚಿ ಜತನ್ ಘೆತಾನಾ, ತಾಂಚಿ ಜವಾಬ್ದಾರಿ ತಿಂ ಕರ್ತಾತ್, ಉಪ್ರಾಂತ್ಲಿ ಭುರ್ಗಿಂ ಇತರ್ ಭಾವ್ ಭಯ್ಣಿಂ ಸವೆಂ ಮೆಳ್ತಾನಾ - ಮೋಗ್, ಸೊಸ್ಣಿಕಾಯ್, ತ್ಯಾಗ್ ಅಪಾಪಿಂಚ್ ಶಿಕ್ತಾತ್. ಹೆಂ ಶಿಕೊಂಕ್ ಖಂಯ್ಚಾಯ್ ಸ್ಪೆಶಲ್ ಸ್ಕೂಲಾಕ್ ವೆಚಿ ಗರ್ಜ್ ನಾತ್ಲಿ, ವಾ ಕೊಣೀ ಜಾಣ್ತ್ಯಾಚಿ (Specialist) ಚಿ ಗರ್ಜ್ ನಾತ್ಲಿ. ಸಕಾಳಿಂ ಉಟೊನ್ ಮಿಸಾಕ್ ವೆಚೆಂ, ಇಸ್ಕೊಲಾಕ್ ವೆಚ್ಯಾ ಪಯ್ಲೆಂ ಘರ್ಚ್ಯಾ ಹಿತ್ಲಾಂತ್ ವಾ ಗಾದ್ಯಾಂತ್ ಕಾಮ್ ಕರ್ಚೆಂ, ದೂದ್ ವೊರ್ನ್ ಹೊಟೆಲಾಕ್ ದಿಂವ್ಚೆಂ ಆಶೆಂ ದೀಸ್ ಸುಲಭಾಯೆಚೆ ನಾತ್ಲ್ಲೆ ಜಾಲ್ಯಾರೀ ಏಕಾ ಥರಾಚಿ ಉಮೆದ್, ಉಪ್ರಾಂತ್ ಕಿತೆಂ ಕರುಂಕ್ ಅಸಾ ಮ್ಹಳ್ಳಿ ಅತುರಾಯ್. ಕುಡಿಂತ್ ತ್ರಾಣ್ ಭರೊನ್ ಅಸ್ಲೆಂ ಆನಿ ಮತ್ ಕಾಂಯ್ ತರೀ ಚಿಂತುನ್ಂಚ್ ಅಸ್ತಾಲಿ. ಆಜ್ ವಾಡೊನ್ ರಾವ್ಲ್ಲೊ ಏಕ್ ವ್ಯಕ್ತಿ ಅಪ್ಲ್ಯಾ ಜಿವಿತಾಂತ್ ಉಂಚಾಯೆಕ್ ಪಾವ್ಲಾ ವಾ ಸರ್ವಾಂ ಥಂಯ್ ದಯಾಳಿ ಆನಿ ಮೊಗಾಳಿ ಜಾಲಾ ತರ್ ಆಪ್ಲೆಂ ಅದ್ಲೆಂ ಜಿವಿತ್ಚ್ ತಾಕಾ ಅಧಾರ್ ಜಾಲಾಂ ಮ್ಹಣ್ಯೆತ್. ಭರೊನ್ ಅಸ್ಲ್ಲ್ಯಾ ಕುಟ್ಮಾಂತ್ ಜೊಕ್ತೆಂ ಶಿಕಪ್ ಮೆಳ್ತಾ ಮ್ಹಳ್ಳ್ಯಾಕ್ ಹಿಂ ಫಕತ್ ಥೊಡಿಂ ನಿದರ್ಶನಾಂ ಜಾವ್ನಾಸಾತ್.
ಅದ್ಲಿಂ ಅಮ್ಚಿ ಕುಟ್ಮಾಂ ಚಡಾವತ್ ಕಷ್ಟಾನಿಂಚ್ ವ್ಹಡ್ ಜಾಲ್ಲಿಂ ಮ್ಹಣ್ಯೆತ್. ಇಗರ್ಜೆಕ್ ಜಾಂವ್, ಇಸ್ಕೊಲಾಕ್ ಜಾಂವ್, ಪೆಂಟೆಕ್ ಜಾಂವ್, ಸಾಂತೆಕ್ ಜಾಂವ್, ಚಲೊನ್ ವೆಚೆ ಶಿವಾಯ್ ದುಸ್ರಿ ವಾಟ್ ನಾತ್ಲಿ, ತಶೆಂ ಚಲ್ಲ್ಲ್ಯಾನ್ ಜೀವ್ ಘಟ್ ಮೂಟ್ ಜಾಲೊ ಆನಿ ಕುಡಿಕ್ ಕಷ್ಟ್ ಕಿತೆಂ ಮ್ಹಣ್ ಕಳ್ಳೆಂ. ಮನ್ಶಾನ್ ಚಲ್ಲ್ಯಾರ್ ಖೆಲ್ಲೆಂ ಖಾಣ್ ಜಿರ್ತಾ ಕೈಂ. ತಶೆಂ ಜಿರೊಂವ್ಕ್ ನೈಂ ತರೀ ಜಿಯೆಂವ್ಕ್ ಆಮಿ ಚಲ್ಲ್ಯಾಂವ್, ಧಾಂವ್ಲ್ಯಾಂವ್ ಆನಿ ಕುಡಿಕ್ ಉರ್ಬೆವಂತ್ ಕರ್ಚ್ಯಾಂತ್ ಪಾಟಿಂ ಸರೊಂಕ್ ನಾಂವ್. ಪೂಣ್ ತ್ಯಾಚ್ ಪರ್ನ್ಯಾ ಕಾಳಾರ್ ಜಿಯೆಲ್ಲೆ ಆಮಿ ತಕ್ಶಣ್ ಪರ್ನೆ ವಿಸ್ರೊನ್ ನವೆಂಸಾಂವಾ ಪಾಟ್ಲ್ಯಾನ್ ಧಾಂವೊಂಕ್ ಶಿಕ್ಲ್ಯಾಂವ್. ಆಮ್ಚಿಂ ಭುರ್ಗಿಂ ಬಾಳಾಂ ಸೊಡಾ, ಅಮಿಂಯ್ ತಶೆಂಚ್ ಜಾಲ್ಯಾಂವ್, ಸಗ್ಳಿಂ ನೈಂ ತರೀ ಥೊಡಿಂ ತರೀ ಹ್ಯಾ ನವೆಸಾಂವಾಂಚಿಂ ಗುಲಾಮಾಂ ಜಾಲಿಂ.
ಆಜ್ ಕಾಲ್ ಭುರ್ಗ್ಯಾಂಕ್ ಕಿತೆಂ ಮೆಳ್ತಾ ?
ಪೋಟ್ ಭರ್ನ್ ಖಾಂವ್ಕ್ ಖಾಣಾಂ, ಪಳೆಂವ್ಕ್ ಟಿವಿ ಆನಿ ಟೈಂ ಪಾಸ್ ಕರುಂಕ್ ಅಂತರ್ಜಾಳ್ ಆನಿ ಗೇಮ್ಸ್. ಇತ್ಲೆಂ ಮೆಳ್ಳ್ಯಾರ್ ಏಕ್ ಭುರ್ಗೆಂ ಪರಿಪೂರ್ಣ್ ಜಾತಾಗೀ? ಖಾಂವ್ಕ್ ಅಮಿಂಯ್ ಖೆಲಾಂ ಪೂಣ್ ಸಕಾಳಿಂಚಿ ಪೇಜ್ ಆನಿ ಚೆಟ್ಣಿ. ಪೂಣ್ ಅಜ್ ಸುಕ್ಲ್ಲ್ಯಾ ದೋನ್ ಕುಡ್ಕೆ ಬ್ರೆಡ್ಡಾಕ್ ಇಲ್ಲೆಂ ಜಾಮ್ ಆನಿ ಪ್ರಿಜ್ಜಾಂತ್ ಪುಂಜಾಂವ್ನ್ ದವರ್ಲ್ಲೆಂ ಲೊಣಿ ಸಾರೊವ್ನ್ ತ್ಯಾ ಭುರ್ಗ್ಯಾಂಕ್ ಖಾವೊಂವ್ಚೆಂ. ತೆಂ ಖಾವ್ನ್ ಥೊಡಿಂ ಭುರ್ಗಿಂ ಗೋಣಿ ಪಾಂಗ್ರುನ್ ನಿದ್ಲ್ಲಿಂಯ್ ಅಸಾತ್, ಕಿತ್ಯಾಕ್ ಹೆಂ ಖಾಣ್ ತಾಂಚ್ಯಾ ಕುಡಿಕ್ ತೃಪ್ತಿ ದೀನಾ, ಬಗಾರ್ ಸಕಾಳಿಂಚೆ ತಾಂಚೊ ಉಪಾಸ್ ಮೊಡಯ್ತಾ, ಭುರ್ಗ್ಯಾಕ್ ಖಾಂವ್ಕ್ ನಾಕಾ ಜಾಲ್ಯಾರೀ ತಾಣೆ ಖಾಯ್ಜೆ ಕಿತ್ಯಾಕ್ ತೆಂ ಪ್ರೆಸ್ಟೀಜ್. ಹ್ಯಾ ವಾತಾವರಣಾಂತ್ ವಾಡ್ಚಿ ಭುರ್ಗಿಂ ಆಪ್ಲಿ ಸಂಸ್ಕ್ರತಿ, ರಿತಿ ರಿವಾಜ್ಯೊ ವಿಸ್ರೊನ್ ಸೊಡ್ತಾತ್ ಆನಿ ನವ್ಯಾಚ್ ಸಂಸಾರಾಂತ್ ಜಿಯೆತಾತ್. ಆಜ್ ಕಾಲ್ ಭುರ್ಗ್ಯಾಂಕ್ ಜಾಯ್ ಜಾಲ್ಲೆಪರಿಂ ಖರ್ಚುಂಕ್ ಪಯ್ಶೆ, ಖೆಳೊಂಕ್ ಗೇಮ್ಸ್, ಉಲೊಂವ್ಕ್ ಮೊಬೈಲ್ ಆನಿ ಟೈಂಪಾಸಕ್ ಲ್ಯಾಪ್ ಟೋಪ್ ಸುಲಭಾಯೆನ್ ಮೆಳ್ತಾತ್. ಹ್ಯಾ ಸಂಸಾರಿ ವಸ್ತುಂನಿ ತಾಂಕಾ ಬಾಂದುನ್ ಘಾಲಾಂ ಆನಿ ಅಮ್ಚಿಂ ವ್ಹಡಿಲಾಂ ತಾಂಚ್ಯಾಚ್ ಸಂಸಾರಾಂತ್ ಯಾ ಪಯ್ಶೆ ಕರ್ಚಾಂತ್ ವಾ 24 ವರಾಂ ಘೊಳ್ಚ್ಯಾಂತ್ ಬ್ಯುಸಿ ಜಾಲ್ಯಾಂತ್. ತರ್ ಹ್ಯಾ ಭುರ್ಗ್ಯಾಂನಿ ಕೊಣಾ ಥಾವ್ನ್ ಶಿಕಜೆ ? ಬೇಬಿ ಸಿಟ್ಟಿಂಗಾಂತ್ ದವರ್ಲಲೆಂ ಭುರ್ಗೆಂ ಸಾಂಜ್ ಪರ್ಯಾಂತ್ ಅನ್ಯೇಕ್ಲ್ಯಾಚ್ಯಾ ಘರಾ ಲೊಳೊನ್ ಅಸ್ತಾ, ಸಾಂಜೆರ್ ತಾಕಾ ಉಸ್ಕ್ಯಾರ್ ಬಸವ್ನ್ ಚಾರ್ ಬರಿಂ ಉತ್ರಾಂ ಉಲೊಂವ್ಕ್ ಆವಯ್ ಬಾಪಯ್ಕ್ ಪುರ್ಸೊತ್ ಆಸನಾ. ಕಿತ್ಯಾಕ್ ಪರ್ತುನ್ ಪಾಲ್ಯಾಂಚಿ ತಯಾರಾಯ್ ಜಾಂವ್ಕ್ ಆಸಾ ಆನಿ ಉಲೊಂವ್ಕ್ ವೇಳ್ ಕೊಣಾಕ್ ಅಸಾ ? ಅಸಲ್ಯಾ ಸಂದಿಗ್ದ್ ಪರಿಸ್ಥಿತೆಂತ್ ಶಿರ್ಕಲ್ಲೆಂ ಭುರ್ಗೆಂ ಎಕ್ಸುರೆಂ ಜಾತಾ ಮಾಗಿರ್ ಮಾದ್ಯಮಾಂಕ್ ತೋಂಡ್ ಕರ್ತಾ. ತ್ಯಾ ಭುರ್ಗ್ಯಾಚೆಂ ಏಕ್ಸುರ್ಪಣ್ ಸಗ್ಳ್ಯಾ ತಾಚ್ಯಾ ಜಿವಿತಾ ವಯ್ರ್ ದುಸ್ರ್ಯಾ ದುಸ್ರ್ಯಾ ರಿತಿನ್ ಪರಿಣಾಮ್ ಕರ್ತಾ ಮ್ಹಳ್ಳೆಂ ಅಮಿ ಸಮ್ಜೊನ್ ಘೆಜೆ.
ಖಂಯ್ ಚುಕ್ಲ್ಯಾಂವ್ ಆಮಿ ?
ವಾಡೊನ್ ರಾವ್ಲ್ಲ್ಯಾ ಚೆಡ್ಯಾನ್ ವಾ ಚೆಡ್ವಾನ್ ಆಪ್ಲೆಂ ಶಿಕಪ್ ಮುಗ್ದಾಲೆಂಚ್ ವಾ ಕಾಜಾರಾಚ್ಯಾ ಬಾಂದಾಂತ್ ರಿಗ್ಲ್ಲೆಂಚ್ ಆಪ್ಣಾಕ್ ಕಿತೆಂ ಘರ್ಜೆಚೆಂ ಮ್ಹಳ್ಳೆ ಸಮಾಧಾನೆನ್ ಚಿಂತುನ್ ಪಳಯ್ಜೆ. ಸಪ್ಣಾಂ ಎಕ್ದಮ್ ವ್ಹಡ್ ಜಾಲ್ಯಾರ್ ನಿಬಾಂವ್ಕ್ ಕಷ್ಟ್ ಮಾರ್ತಾತ್, ಎಕ್ದಮ್ ಧಾಕ್ಟಿಂ ಜಾಲ್ಯಾರ್ ಪುಡಾರ್ ಬಾಂದುನ್ ಹಾಡುಂಕ್ ಕಷ್ಟ್ ಮಾರ್ತಾತ್. ತಶೆಂ ಆಸ್ತಾಂ ಆಪ್ಲೆಂ ಆದ್ಲೆಂ ಜಿವಿತ್ ಮತಿಂತ್ ದವರ್ನ್, ಮುಕ್ಲ್ಯಾ ಜಿವಿತಾಕ್ ಘರ್ಜೆಚೆಂ ಮಾತ್ರ್ ಚಿಂತ್ಲ್ಯಾರ್ ಆಮ್ಚೆಂ ಜಿವಿತ್ ಸುಫಳ್ ಜಾತಾ ಮಾತ್ರ್ ನೈಂ, ದುಸ್ರ್ಯಾಂಕ್ ಆದರ್ಶ್ ಜಾತಾ. ಪೂಣ್ ಆಮಿ ಕಿತೆಂ ಕೆಲೆಂ ? ಘರಾ ಖರ್ಚ್ ಉರಜೆ ತರ್ ಆಮ್ಚ್ಯಾ ಕುಟ್ಮಾಕ್ ಜಾತಾ ತಿತ್ಲೆಂ ಧಾಕ್ಟೆಂ ಕರುಂಕ್ ಪ್ರಯತ್ನ್ ಕೆಲೆಂ ಆನಿ ತೆಂ ಯಶಸ್ವೀಯ್ ಜಾಲೆಂ. ಆದಿಂ ಸಾತ್-ಆಟ್ ಭುರ್ಗ್ಯಾಂಕ್ ಗಾಂವಾಂತ್ಚ್ ಕಾಮ್ ಕರ್ನ್ ಪೊಸ್ಲ್ಲ್ಯಾ ಪೋಶಕಾಂಕ್, ದೊಗಾಂ ಭುರ್ಗ್ಯಾಂಕ್ ಅಟಾಪುಂಕ್ ಸಂಸಾರ್ ಭೊಂವಾಜೆ ಪಡ್ಲೆಂ. ಥೊಡ್ಯಾಂಕ್ ಸಂಸಾರಾಚೊ ಅಸೋಯ್ ಮೋಗ್ ಉಬ್ಜಾಲೊಗೀ, ಅಪ್ಲೊ ಗಾಂವ್, ಅಪ್ಲೊ ದೇಶ್, ಅಪ್ಣಾಕ್ ಜಲ್ಮ್ ದಿಲ್ಲ್ಯಾಂಕ್ ಸಯ್ತ್ ವಿಸ್ರೊನ್ ಗೆಲಿಂ. ಆಸ್ಚಾ ಏಕ್ ವಾ ದೊಗಾಂ ಭುರ್ಗ್ಯಾಂ ಖಾತಿರ್ ಪುಂಜಾಂವ್ಕ್ ಸುರು ಕೆಲೆಂ. ಹ್ಯಾ ಭುರ್ಗ್ಯಾಂಕ್ ಸಮ್ಜಣಿ ಯೆಂವ್ಚ್ಯಾ ಪಯ್ಲೆಂಚ್ ತಾಂಕಾ ಜಾಯ್ ಜಾಲ್ಲಿಂ ಪ್ಲ್ಯಾಟಾಂ, ಕಾರಾಂ, ಆನಿ ಮೋಜ್ ಮಸ್ತೆಚ್ಯೊ ವಸ್ತು ತಯಾರ್ ಜಾಲ್ಯೊ. ಆನಿ ಆತಾಂ ಭುರ್ಗ್ಯಾಂಕ್ ಕಾಂಯ್ ತರೀ ಖಂತ್ ಕರ್ಚಿ ಗರ್ಜ್ ಆಸಾಗೀ ? ಬಿಲ್ಕುಲ್ ನಾ, ಜಿವಿತ್ ಆಳ್ಶಿ ಜಾಲೆಂ, ವಿಚಾರ್ಚಿಂ ಕೋಣ್ ನಾ ಜಾಲಿಂ. ಹ್ಯಾ ಹಂತಾರ್ ಬೂದ್ ಬಾಳಿಚಿಂ ಉತ್ರಾಂ ಕೊಡು ಜಾಲಿಂ, ತರ್ನಾಟೆ ಸುಲಭಾಯೆನ್ ಹಾತಾ ಥಾವ್ನ್ ನಿಸ್ರೊನ್ ಗೆಲೆ, ಪಾಟಿಂ ಘುಂವ್ಚ್ಯಾ ಪಯ್ಲೆಂ ವೆಚಿಕ್ ಪುತಾಪರಿ ವಾಟ್ ಚುಕೊನ್ ಗೆಲೆ. ಆಮಿ ಇಲ್ಲೆಂ ಗುಮಾನ್ ದಿಲ್ಲೆಂ ತರ್ ಅಶೆಂ ಜಾಂವ್ಚೆಂ ಆಡಾವ್ಯೆತೆಂ ಆಸ್ಲೆಂ ನೆಂ? ಆತಾಂ ವಾಡೊನ್ ರಾವ್ಲ್ಲ್ಯಾ ಭುರ್ಗ್ಯಾಂಚಿ ಮರ್ಜಿ, ಆವಯ್-ಬಾಪಯ್ನ್ ಆಯ್ಕೊಂವ್ಚೆಂ ಶಿವಾಯ್ ದುಸ್ರಿ ವಾಟ್ ನಾ ಜಾಲ್ಯಾ.
ಭುರ್ಗ್ಯಾಂಕ್ ಶಿಕ್ಪಾಂತ್ ವಾ ಖೆಳಾಂತ್ ಅಸಕ್ತ್ ಉಣಿ ಕಿತ್ಯಾಕ್ ?
ಆಜ್ ಕಾಲ್ಚೆಂ ಫಾಸ್ಟ್ ಪುಡ್ ಭುರ್ಗ್ಯಾಂಚ್ಯಾ ಕುಡಿಚೆರ್ ಮಾತ್ರ್ ನೈಂ ತಾಂಚ್ಯಾ ಮತಿಚೆರೀ ಪರಿಣಾಮ್ ಕರ್ತಾ ಮ್ಹಣ್ ಸಗ್ಳೊ ಸಂಸಾರ್ ಬೊಬಾಟ್ತಾ ತರೀ, ಭುರ್ಗ್ಯಾಂಕ್ ತೆಂಚ್ ಜಾಯ್ ಆನಿ ವ್ಹಡಾಂಕ್ ತಾಂಚಿ ವ್ಹಡ್ವಿಕಾಯ್ ದಾಕೊಂವ್ಕ್ ಹೆಂ ಫಾಸ್ಟ್ ಪುಡ್ ಏಕ್ ಹಾತೆರ್ ಜಾಲಾಂ. ಭುರ್ಗ್ಯಾನ್ ಭಾಯ್ರ್ ಭಂವ್ಡೆಕ್ ವಚೊನ್ ಸೆವುಲ್ಲ್ಯಾ ಕಿರ್ಕೊಳ್ ಖಾಣಾಂಚ್ಯೊ ವರ್ದಿ ದಿತಾನಾ, ಪಾಟ್ಲ್ಯಾನ್ ಆವಯ್-ಬಾಪಯ್ ಫುಗೊನ್ ರಾವ್ತಾತ್. ಆಜ್ ಕಾಲ್ ಭುರ್ಗಿಂ ವಾಚ್ಚ್ಯಾಂತ್ ಹುಶಾರ್ ಆಸಾತ್, ಪೂಣ್ ಬುಕಾಂತ್ ಬರಯಿಲ್ಲೆಂ ಸೊಡ್ನ್, ಜಿವಿತಾಕ್ ಲಾಗು ಜಾಂವ್ಚಾ ಬರ್ಯಾ ಗುಣಾಂ ವಿಶಿಂ ಉಲಯ್ಲ್ಯಾರ್ ವಯ್ರ್ -ಸಕಯ್ಲ್ ಪಳಯ್ತಾತ್ ಮಾತ್ರ್ ನೈಂ, ಹಾಂವ್ ಆನಿಕೀ ಪರ್ನ್ಯಾ ತಕ್ಲೆಚೊ ಮ್ಹಣ್ ಮಸ್ಕಿರ್ಯೊ ಕರ್ತಾತ್. ಮನ್ಶಾಚೆ ಜಿವಿತ್ ಖಂಯ್ಚ್ಯಾ ಗುಣಾಂಚೆರ್ ರೂಪಿತ್ ಜಾಯ್ಜೆಗೀ, ತೆ ಶೆಗುಣ್ ಸವ್ಕಾಸ್ ಮಾಯಾಕ್ ಜಾವ್ನ್ ಆಸಾತ್ ಆನಿ ನವ್ಯಾ ರಿತಿಂಚೆ ಮ್ಹಣ್ಜೆ ತಾಣಿಂಚ್ ರುಪಿತ್ ಕೆಲ್ಲ್ಯೊ ರುಲಿ-ರೆಗ್ರೊ ತಾಂಕಾ ಚಡ್ ಆಕರ್ಶಿತ್ ದಿಸ್ತಾತ್.
ಹ್ಯಾ ವಿಶ್ಯಾಂತ್ ಸಗ್ಳೆಂ ಭುರ್ಗ್ಯಾಂಕ್ ಮಾತ್ ಬೋಟ್ ಕೆಲ್ಯಾರ್ ಆಮಿ ಚುಕಿದಾರ್ ಜಾತೆಲ್ಯಾಂವ್, ತಾಣಿ ಕರ್ಚಿಂ ಕರ್ತುವಾಂ ಖೊಟಿಂ ಮ್ಹಣ್ ಕಳಿತ್ ಆಸೊನೀ, ಗಾಂಧಿಜಿಚ್ಯಾ ಮಾಂಕ್ಡಾಪರಿಂ ದೊಳೆ ಧಾಂಪುನ್ ಬಸ್ಲ್ಲ್ಯಾ ಆಮ್ಚೊಯ್ ಪಾತ್ರ್ ಭುರ್ಗ್ಯಾಂಕ್ ಬಿಗಡ್ಚ್ಯಾಂತ್ ಕಾಂಯ್ ಉಣೊ ನಾ. ಆಯ್ಚೊ ಹೊ ಸಂಸಾರ್ ಪಯ್ಶ್ಯಾಂಚೆರ್ ಇತ್ಲೊ ವೊಂದೊನ್ ಆಸಾಗೀ, ಪಯ್ಶಾಂವೀಣ್ ಜಿವಿತಾಕ್ ರಂಗ್ಚ್ ನಾ ಮ್ಹಳ್ಳೊ ಪ್ರಭಾವ್ ಹ್ಯಾ ದಾಕ್ಟುಲ್ಯಾ ಭುರ್ಗ್ಯಾಂಚೆರ್ ಭಾರಿ ಪ್ರಮಾಣಾರ್ ಜಾಲಾ ಮ್ಹಳ್ಯಾರ್ ಖಂಡಿತ್ ಚೂಕ್ ಜಾಂವ್ಚಿ ನಾ. ಆಪ್ಣಾಚ್ಯಾ ಕುಡಿಚೊ ಕಿತೆಂಚ್ ಪರ್ವಾ ನಾಸ್ತಾನಾಂ ಫಾಸ್ಟ್ ಫುಡ್ಡ್ ಗುಲಾಮ್ ಜಾಲ್ಲಿಂ ಭುರ್ಗಿಂ ಸವ್ಕಾಸ್ ಆಳ್ಶಿ ಜಾತಾತ್ ಆನಿ ಕುಡಿಚೆಂ ವಜನ್ ಚಡಂವ್ಚ್ಯಾಂತ್ ಹಾಂವ್ ಮುಕಾರ್, ಹಾಂವ್ ಮುಕಾರ್ ಮ್ಹಳ್ಳೆಬರಿ ದಿಸ್ತಾತ್. ಆದಿಂ ಚಾರ್ ಭುರ್ಗ್ಯಾಂಚೆ ಜೆವಾಣ್ ಸ ಭುರ್ಗ್ಯಾಂಕ್ ವಾಂಟುನ್ ವೆತಾನಾಂ ಭುಕ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳೊ ಅನ್ಬೊಗ್ ತಾಂಕಾ ಅಸ್ಲ್ಲೊ. ಆಜ್ ಚಾರ್ ಭುಗ್ಯಾಂಚೆ ಜೆವಣ್ ದೊಗಾಂಕ್ ಮೆಳ್ತಾನಾ ತಾಂಕಾ ಭುಕೆಚೊ ಮಹತ್ವ್ ಕಳ್ಚೊ ತರೀ ಕಸೊ?
ಪರ್ಗಾಂವಾಚಿ ಪರಿಸ್ಥಿತಿ ಹದ್ದ್ ಮಿರ್ವೊನ್ ಗೆಲ್ಯಾ ಮ್ಹಳ್ಯಾರ್ ಚೂಕ್ ಜಾಂವ್ಚಿ ನಾ. ಆಪ್ಣಾನ್ ಜಲ್ಮ್ ದಿಲ್ಲ್ಯಾ ಭುರ್ಗ್ಯಾಕ್ ಶಿಕಪ್ ದಿಂವ್ಚ್ಯಾ ಟೀಚೆರಿನ್ ಸೊಡಾ, ಆಪ್ಲ್ಯಾಚ್ ಅವಯ್-ಬಾಪಯ್ನ್ ಬೂದಿಕ್ ಮಾರ್ಲ್ಯಾರೀ ತಾಂಕಾ ಜೈಲಾಚಿ ಶಿಕ್ಶಾ ಜಾಂವ್ಚಿ ಸಾಧ್ಯತಾ ಆಸಾ. ಆಮಿಂಯ್ ತಿ ಸಂಸ್ಕ್ರತಿ ಅಪ್ಣಾಂವ್ಚಾಂತ್ ಪಾಟಿಂ ನಾಂವ್, ಎದೊಳ್ಚ್ ಇಸ್ಕೊಲಾಂತ್ ಭುರ್ಗ್ಯಾಂಕ್ ಜೋರ್ ಕರ್ಚೆಂ ವಾ ಚೂಕ್ ಕೆಲ್ಲ್ಯಾಕ್ ಶಿಕ್ಶಾ ದಿಂವ್ಚೆಂ ಆಮ್ಚಾ ಸಮಾಜೆಕ್ ಕೊಡು ದಿಸ್ತಾ. ತರ್ ಸಮಾಜೆಂತ್ ಮಾನ್ ಗೌರವಾನ್ ಜಿಯೆಂವ್ಚೆಂ ಕಶೆಂ ಮ್ಹಣ್ ಆಮ್ಚಾ ಭುರ್ಗ್ಯಾಂಕ್ ಶಿಕೊಂವ್ಚೆಂ ಕಶೆಂ ?
