ಮೋಗ್ ಕರ್ಣಾರಾಂಚೊ ದೀಸ್....

ಘೆ ಹೊ ಗುಲೊಬ್ ಜಾವ್ನ್ ಮೊಗಾಚೊ ಸಂಕೇತ್
ಕಾಳಿಜ್ ಮ್ಹಜೆಂ ಲಿಪ್ಲಾಂ ಹರ್ಯೆಕ್ ಪಾಕ್ಳೆಂತ್
ಸಂಗೊಂಕ್ ಅಶೆತಾಂ ಜಾಯ್ ತುಜೊ ಸಂಗಾತ್
ಜಿಯೆಂವ್ಕ್ ಏಕ್ ಜಾವ್ನ್ ಮೊರಾ ಪರ್ಯಾಂತ್

ದೊಳ್ಯಾಕ್ ದೊಳೆ ಮೆಳ್ಳೆ ತ್ಯಾ ಪಯ್ಲೆ ನದ್ರೆಂತ್
ಉತ್ರಾಂಕ್ ಲಿಪಯಿಲ್ಲೆಂ ಕಾಳ್ಜಾಂತ್ ಆಜ್ ಪರ್ಯಾಂತ್
ರಾಕ್ತಾಲೊ ದೀಸ್ ರಾತ್ ಮೋಗ್ ಕರ್ಣರಾಂಚ ದಿಸಾಕ್
ಹ್ಯಾ ಗುಲೊಬಾಂತ್ ಲಿಪ್ಲಾಂ ಗೊ ಮ್ಹಜೆಂ ಜಿವಿತ್

ತುಜ್ಯಾ ದೊಳ್ಯಾನಿಂ ಮೊಗಾಚೆಂ ಕೀರ್ಣ್ ದೆಕ್‍ಲ್ಲೆಂ
ತುಜ್ಯಾ ವೊಂಟಾನಿಂ ಮೊಗಾಚಿ ವೊಡ್ಣಿ ಚಾಕ್‍ಲ್ಲಿ
ತುಜ್ಯಾ ಉತ್ರಾನಿಂ ಮೊಗಾಚೊ ಸ್ವಾಧ್ ಭರ್.ಲ್ಲೊ
ತುಜ್ಯಾ ತೊಂಡಾರ್ ಮೊಗಾಚೊ ಸಂಸಾರ್ ಲಿಪ್‍ಲ್ಲೊ

ತುಜ್ಯಾ ಎಕ್ವಾಟಾಂತ್ ಜಿವಿತ್ ನಂದನ್ ಜಾತೆಲೆಂ
ತುವೆಂ ಕಾಡ್ಚಿಂ ಮೆಟಾಂ ಮ್ಹಕಾ ಅಧಾರ್ ದಿತೆಲಿಂ
ತುಜ್ಯಾ ಸ್ಪರ್ಶಾಂತ್ ಹಾಂವ್ ಮ್ಹಕಾಚ್ ವಿಸ್ರತಲೊಂ
ತುಜ್ಯಾ ಸಂಗಾತ್ ಪಣಾಂತ್ ಹಾಂವ್ ಸಂಸಾರ್ ಜಿಕ್ತಲೊಂ

ಶೆಬಾಚೆ ರಾಣಿಯೆಚಿ ಭೆಟ್...

ಸಾಲ್ಮಾಂವ್ ರಾಯಚಿ ಜಾಣ್ವಾಯ್ ಅಖ್ಯಾ ಸಂಸಾರಾಕ್ ಕಳೊನ್ ಯೆತಾ
ರಾಯಚ ಅಪರಿಮಿತ್ ಜಾಣ್ವಾಯೆ ನಿಮ್ತಿ ಸಗ್ಳೊ ಲೋಕ್ ತಾಕ ಮಾನ್ತಾ
ಅಪ್ಲ್ಯಾ ಜಾಣ್ವಾಯೆ ಸವೆಂ ಸಾಲ್ಮಾಂವ್ ಏಕ್ ಗ್ರೆಸ್ತ್ ರಾಯ್ ಜಾವ್ನಾಸ್ತಾ
ತಾಚ ರಾಜ್ವಾಟ್ಕೆಚ ಕಾಳಾರ್ ಇಸ್ರಾಯೆಲ್ ಸಂಸಾರಾಂತ್ ನಾಂವ್ ಜೊಡ್ತಾ

ಸಾಲ್ಮಾಂವ್ಚಾ ಕಾಳಾರ್ ಶೆಬಾಚಿ ರಾಣಿ ರಾಯಾಕ್ ಮೆಳೊಂಕ್ ಯೆತಾ
ರಾಯಾಚ ಜಾಣ್ವಾಯೆ  ವಿಶಿಂ ತಿ ದುಸ್ರ್ಯಾಂ ಥಾಂವ್ನ್ ಅಯ್ಕೊನ್ ಅಸ್ತಾ
ಕಷ್ಟಾಂಚಿ ಸವಾಲಾಂ ಘೆವ್ನ್ ರಾಯಾಕ್ ಪರಿಕ್ಶ ಕರುಂಕ್ ತಿ ಯೆತಾ
ರಾಯ್ ಕಿತೆಂಚ್ ಕಾಷ್ಟ್ ನಾಸ್ತಾಂ ಹರ್ಯೆಕ್ ಸವಾಲಾಂಕ್ ಜಾಪ್ ದಿತಾ

ರಾಯಚ ಜಾಣ್ವಾಯೆಕ್ ಶೆಬಾಚಿ ರಾಣಿ ತಾಕ ಶಬಾಸ್ಕಿ ಪಾಟಾಯ್ತಾ
ಅಪ್ಲೊ ಗೌರವ್ ದಾಕೊವ್ನ್ ಬಂಗಾರ್ ರೂಪೆಂ ಉದಾರ್  ಜಾವ್ನ್ ದಿತಾ
ಪರಿಪೂರ್ಣ್ ಜಾಣ್ವಾಯ್ ದಿಲ್ಲ್ಯಾ ಇಸ್ರಾಯೆಲಾಚ ದೆವಾಕ್ ಮಾನ್ ಕರ್ತಾ
ಇಸ್ರಾಯೆಲಾಚ ಸೈನಿಕಾಂಚ ಶಿಸ್ತೆಕ್ ಆನಿ ರಾಜ್ವಾಟ್ಕೆಕ್ ಮೆಚ್ವಾತಾ

ಸಾಲ್ಮಾಂವ್ ರಾಯ್ ಹಸ್ತಿ ದಂತಾಚೆ ವ್ಹಡ್ ಏಕ್ ಸಿಂಹಾಸಣ್ ಕರಯ್ತಾ
ಬಂಗಾರಚ ಅಯ್ದಾನಾಂನಿ ಸಾಲ್ಮಾಂವ್ ರಾಯಾಚೆ ರಾವ್ಳೆರ್ ಸೊಬ್ತಾ
ಬಲಿಷ್ಟ್ ರಥಂ ಅಸ್‍ಲ್ಲ್ಯಾನ್ ರಾಯಾಚೆಂ ಸೈನ್ ಬಲಿಷ್ಟ್ ಜಾವ್ನಾಸ್ತಾ
ನಿಪುಣ್ ಅಧಿರಾರ್ಯಾಂ ಮುಖಾಂತ್ರ್ ರಾಯ್ ಇಸ್ರಾಯೆಲಾಕ್ ಬಲಿಷ್ಟ್ ಕರ್ತಾ

ಅಪ್ಲ್ಯಾ ಜಾಣ್ವಾಯೆ ನಿಮ್ತಿಂ ರಾಯ್ ಸಂಸಾರಾಂತ್ ನಾಂವ್ ಜೊಡ್ತಾ
ರಾಯಾಕ್ ಮೆಳೊಂಕ್ ವಿವಿಧ್ ದೆಶಾಚೊ ಲೋಕ್ ಅಶೆತಾ
ದೇವ್ ಸಲ್ಮಾಂವ್ ಸವೆಂ ಅಸ್‍ಲ್ಲ್ಯಾನ್ ತೊ ತಾಕ ಬಲಿಷ್ಟ್ ಕರ್ತಾ
ಇಸ್ರಾಯೆಲಿತಾಂಕ್ ಚಲಯಿಲ್ಲೊ ಏಕ್ ಬಲಿಷ್ಟ್ ರಾಯ್ ತೊ ಜಾವ್ನಾಸ್ತಾ

ಚೆಡುಂ ಬಿಜ್ಲಾಂ - ಸುಜ್ಲಾಂ...

ಬಿಜ್ಲಾಂಯ್ ಗೊ ಚೆಡ್ವಾ ತುಂ ಬಿಜ್ಲಾಂಯ್
ದಾದ್ಲ್ಯಾಂಚ ಅಯ್ಡ್ಯಾಂನ್ ತುಂ ಬಿಜ್ಲಾಂಯ್
ಸುಜ್ಲಾಂಯ್ ಗೊ ಚೆಡ್ವಾ ತುಂ ಸುಜ್ಲಾಂಯ್
ಪೊಕ್ರಿ ದೊಳ್ಯಾಂಚ ನದ್ರೆನ್ ತುಂ ಸುಜ್ಲಾಂಯ್

ಮಧುರ್ ವೊಂಟಾಂಕ್ ದಾಕೊವ್ನ್ ಕಾಳಿಜ್ ಕಾಂತಯ್ತಾಯ್
ದೊಳ್ಯಾಂಚ ಅಮಲ್ ನದ್ರೆನ್ ಮುಟ್ಯೆಂತ್ ಗಾಲ್ತಾಯ್
ಲಾಂಬ್ ಕೆಸಾಂಕ್ ಸಾಜೊವ್ನ್ ದೀಸ್ ಭರ್ ನಾಡ್ತಾಯ್
ಹಸ್ಕುರೆಂ ತೊಂಡ್ ದಾಕೊವ್ನ್ ಮೊಗಾ ಉಜೊ ಪೆಟಾಯ್ತಾಯ್

ಸೊಭಿತ್ ಕುಡಿಕ್ ಹಾಲೊವ್ನ್ ಧಲೊವ್ನ್ ಮತ್ ಚುಕಾಯ್ತಾಯ್
ಕಾಗ್ಣಾಂ-ಪೈಂಜಾಣಾಂಚೊ ಅವಾಜ್ ಶಿರಾನಿಂ ಭರ್ತಾಯ್
ಹಂಸಚಿ ಚಾಲ್ ದಾಕೊವ್ನ್ ತುಜ್ಯಾ ವಾಟೆಕ್ ವೊಡ್ತಾಯ್
ಬೊಗ್ಣಾಂಕ್ ಮೊಗಾಚೊ ಲೇಪ್ ದೀವ್ನ್ ಪಿಶ್ಯಾರ್ ಗಾಲ್ತಾಯ್

ಸನ್ನ್ಯಾಚ ಉಜ್ವಾಡಾಕ್ ಸಾವ್ಳಿ ದಾಕೊವ್ನ್ ಪರತ್ ಲಿಪ್ತಾಯ್
ಚಂದ್ರಕ್ ಅಪ್ಣಕ್ ಸರಿ ಕಾರ್ನ್ ನದರ್ ಗುಂವ್ಡಾಯ್ತಾಯ್
ದರ್ಯಾಚ ಲಾರಾನಿಂ ಮೇಟ್ ಕಾಡ್ನ್ ಮಾಯಕ್ ಜಾತಯ್
ಸುರ್ಯಾಚ ಕಿರ್ಣಾನಿಂ ಪರ್ಜಳುನ್ ಅಪಾಂ-ಲಿಪಾಂ ಖೆಳ್ತಾಯ್

ಗುಡ್ಯಾ ದೊಂಗ್ರಾರ್ ಚಿತಳ್ ಜಾವ್ನ್ ಉಡ್ಕಣ ಗಲ್ತಾಯ್
ಗೂಂಡ್ ಸಾಗೊರಾಂತ್ ಮೊತಿಂ ಜಾವ್ನ್  ಲಿಪೊನ್ ಬಸ್ತಾಯ್
ಫಾಂತ್ಯಾಫರಚೊ ದೋವ್ ಜಾಂವ್ನ್ ಜಿರೊನ್ ವೆತಾಯ್
ವಾರ್ಯಾರ್ ಫರ್ಮಳ್ ಶಿಂಪ್ಡಾವ್ನ್ ಸೊದುಂಕ್ ಕರ್ತಾಯ್

ಕಶೆಂ ವರ್ಣುಂ ಚೆಡ್ವಾ ತುಜಿ ತಿ ಅಪುರ್ಬಾಯ್
ದಿಸಾಕ್ ರಾತಿಕ್ ದೊಸ್ತಾ ಗೋ ತುಜಿ ತಿ ಸೊಭಾಯ್
ದಾದ್ಲ್ಯಾಂಚ ಅಂಯ್ಡ್ಯಾನ್ ತು ಭಿಜೊನ್ ಗೆಲಾಂಯ್
ಪೊಕ್ರಿ ದೊಳ್ಯಾಂಚ ನದ್ರೆನ್ ತುಂ ಸುಜೊನ್ ಪುಲ್ಲಾಂಯ್